.jpg)
អ្នកចាក់វ៉ាក់សាំងបង្ការជំងឺកូវីដក្នុងខណ្ឌទួលគោកពីថ្ងៃទី ១២ សីហា។ ហុង មិនា
ភ្នំពេញៈ លោកនាយករដ្ឋមន្ត្រី ហ៊ុន សែន បានសម្រេចដាក់ចេញនូវគោលនយោបាយចាក់វ៉ាក់សាំងកូវីដ ១៩ ដូសជំរុញ ដល់ប្រជាជនទូទៅដែលមានអាយុពី ១២ ឆ្នាំឡើងទៅ ដែលការចាក់នេះនឹងចាប់ផ្តើមពីខែសីហា ឆ្នាំនេះរហូតដល់អំឡុងពាក់កណ្តាលឆ្នាំ ២០២២។
ជាមួយគ្នានេះ លោកនាយករដ្ឋមន្ត្រីក៏បានឱ្យគណៈកម្មការចំពោះកិច្ចទទួលបន្ទុកលទ្ធកម្មវ៉ាក់សាំងកូវីដ ១៩ ត្រូវបន្តយកមិត្តចិន ធ្វើជាបង្អែកផ្នែកយុទ្ធសាស្ត្រក្នុងការផ្គត់ផ្គង់វ៉ាក់សាំងដល់កម្ពុជា ហើយប្រភពផ្សេងទៀតនៅបន្តជាប្រភពគាំទ្រ។
រាជរដ្ឋាភិបាលបានចាត់ទុកគោលនយោបាយចាក់វ៉ាក់សាំងកូវីដ ១៩ គឺជាយុទ្ធសាស្ត្រគន្លឹះដ៏សំខាន់មួយ និងជាខ្សែក្រវាត់ការពារទី ១ សំខាន់ជាងគេ ដើម្បីការពារអាយុជីវិតប្រជាជនក៏ដូចជាដើម្បីបង្កើតឱ្យបាននូវភាពស៊ាំក្នុងសហគមន៍ ដើម្បីទប់ទល់នឹងមេរោគនេះសំដៅឈានឆ្ពោះទៅបើកដំណើរការប្រទេសជាតិពេញលេញឡើងវិញលើគ្រប់វិស័យ និងការរស់នៅជាមួយនឹងជំងឺនេះតាមគន្លងប្រក្រតីភាពថ្មី។
លោក ហ៊ុន សែន បញ្ជាក់ក្នុងសេចក្តីប្រកាសដាក់ឱ្យអនុវត្តនូវគោលនយោបាយចាក់វ៉ាក់សាំងកូវីដ ១៩ ដូសជំរុញ នាថ្ងៃទី ២៥ សីហាថា រាជរដ្ឋាភិបាលសម្រេចចាក់វ៉ាក់សាំងកូវីដ ១៩ ដូសជំរុញដល់ប្រជាជនទូទៅចាប់ពីអាយុ ១២ ឆ្នាំឡើងទៅ ក្នុងគោលបំណងបង្កើតឱ្យបានឆាប់រហ័សនូវភាពស៊ាំសហគមន៍រឹងមាំពិតប្រាកដមួយដែលជាមូលដ្ឋានដ៏សំខាន់សម្រាប់ការពារអាយុជីវិតប្រជាជនពីមេរោគកូវីដ ១៩ ពិសេស ប្រភេទដែលតា (Delta) និងប្រភេទបំប្លែងថ្មីផ្សេងទៀត។
លោកថា ដោយសារប្រជាជនកម្ពុជាភាគច្រើនលើសលប់បានទទួលការចាក់វ៉ាក់សាំងប្រភេទស៊ីណូហ្វាម និងស៊ីណូវ៉ាក់ជាវ៉ាក់សាំងមូលដ្ឋាន ហើយក្រុមការងារជំនាញថា វ៉ាក់សាំងនេះអាចជាជម្រើសមានប្រសិទ្ធភាពមួយក្នុងការប្រើប្រាស់សម្រាប់ជាដូសជំរុញ ទាំងចំពោះអ្នកដែលបានចាក់វ៉ាក់សាំងប្រភេទទាំង ២ នេះ និងទាំងអ្នកដែលបានចាក់វ៉ាក់សាំងប្រភេទ Astra-Zeneca ឬ Johnson & Johnson។
លោកនាយករដ្ឋមន្ត្រីបានឱ្យដឹងថា៖ «ដូច្នេះក្នុងការចាក់ដូសជំរុញនេះ ត្រូវបន្តយកមិត្តចិនធ្វើជាបង្អែកផ្នែកយុទ្ធសាស្ត្រ ក្នុងការផ្គត់ផ្គង់វ៉ាក់សាំងដល់កម្ពុជា ហើយប្រភពផ្សេងទៀតនៅបន្តជាប្រភពគាំទ្រ ដែលបម្រើឱ្យតម្រូវការចាំបាច់នៃផែនការវ៉ាក់សាំងរបស់កម្ពុជាទាំងជាវ៉ាក់សាំងដូសជំរុញ ទាំងជាវ៉ាក់សាំងសម្រាប់ជុំទី២ ផ្អែកតាមលទ្ធភាពរបស់កម្ពុជាក្នុងការស្វែងរក និងទទួលបានវ៉ាក់សាំងកូវីដ ១៩»។
រាជរដ្ឋាភិបាលក៏បានបញ្ជាក់ផងដែរថា សម្រាប់ការអនុវត្តគោលនយោបាយចាក់វ៉ាក់សាំងកូវីដ ១៩ ដូសជំរុញនេះ គឺរាជរដ្ឋាភិបាលនៅតែបន្តអនុវត្តគោលការណ៍ស្ម័គ្រចិត្ត គោលការណ៍ឥតគិតថ្លៃ ការធ្វើអាទិភាវូបនីយកម្មនៃការចាក់វ៉ាក់សាំងកូវីដ ១៩ ដូសជំរុញទៅលើក្រុមមនុស្ស និងតាមទីតាំង ភូមិសាស្ត្រ ការធានាប្រសិទ្ធភាព និងសុវត្ថិភាពនៃការចាក់វ៉ាក់សាំងដូសជំរុញ និងយន្តការអនុវត្តគោលនយោបាយ។
លោក ហ៊ុន សែន បានលើកឡើងថា៖ «រាជរដ្ឋាភិបាលនៅតែបន្តអនុវត្តគោលការណ៍ស្ម័គ្រចិត្តដដែលចំពោះការចាក់វ៉ាក់សាំងដូសជំរុញនេះ ជូនដល់ប្រជាជន។ ប្រជាជនដែលបានចាក់វ៉ាក់សាំងជុំទី១ រួចមកទទួលយកវ៉ាក់សាំងដូសជំរុញនេះឱ្យបានគ្រប់ៗគ្នា ដើម្បីជួយបង្កើនភាពឆ្លើយតបនៃអង្គបដិបក្ខនៃប្រព័ន្ធការពារក្នុងខ្លួនឱ្យកាន់តែប្រសើរឡើង ប្រឆាំងនឹងមេរោគកូវីដ ១៩ ជាពិសេសប្រភេទដែលតា»។
ជាមួយគ្នានេះដែរ រាជរដ្ឋាភិបាលក៏បានអំពាវនាវដល់ប្រជាជន ដែលមានលទ្ធភាពគ្រប់គ្រាន់ឱ្យទៅទទួលយកការចាក់វ៉ាក់សាំងដូសជំរុញនេះនៅតាមគ្រឹះស្ថានសុខាភិបាលឯកជន ដែលទទួលបានការអនុញ្ញាតឱ្យផ្តល់សេវាចាក់វ៉ាក់សាំងកូវីដ ១៩ នេះ។
ដោយឡែក បណ្តារោងចក្រសហគ្រាស និងម្ចាស់អាជីវកម្មទាំងអស់ក៏ត្រូវបានលើកទឹកចិត្តឱ្យចូលរួមចំណែក ចែករំលែកបន្ទុកចំណាយជាមួយរាជរដ្ឋាភិបាលក្នុងការផ្តល់ការចាក់វ៉ាក់សាំងដូសជំរុញនេះដល់បុគ្គលិក និងកម្មករ-និយោជិតរបស់ខ្លួនឱ្យបានគ្រប់គ្នាផងដែរ។
លោក ហ៊ុន សែន ថា៖ «រាជរដ្ឋាភិបាលនឹងរៀបចំឱ្យមានយន្តការ ដើម្បីសម្របសម្រួលជាមួយវិស័យឯកជន និងតួអង្គពាក់ព័ន្ធទាំងលើការរួមចំណែករបស់រោងចក្រសហគ្រាស និងម្ចាស់អាជីវកម្មធំៗក្នុងការជួយរ៉ាប់រងចំណាយដើម្បីចាក់វ៉ាក់សាំងដូសជំរុញដល់បុគ្គលិក និងកម្មករ-និយោជិតរបស់ខ្លួនទាំងលើការជួយគាំទ្រដល់វិស័យឯកជនក្នុងការនាំចូល និងចែកចាយវ៉ាក់សាំងកូវីដ និងផ្តល់សេវាចាក់វ៉ាក់សាំងកូវីដ ១៩ ជូនពលរដ្ឋកម្ពុជាក្នុងតម្លៃសមស្រប»។
សម្រាប់អ្នកអាទិភាពចាក់វ៉ាក់សាំងដូសជំរុញនេះត្រូវផ្តើមចេញពីក្រុមមន្ត្រីសុខាភិបាល និងមន្ត្រីបម្រើការជួរមុខក្នុងការប្រយុទ្ធនឹងជំងឺកូវីដ ១៩ និងចាប់ផ្តើមពីតំបន់ដែលមានហានិភ័យខ្ពស់ ពលរដ្ឋដែលមានអាយុចាប់ពី ៦០ ឆ្នាំឡើងទៅ និងប្រជាពលរដ្ឋដែលមានប្រព័ន្ធការពាររាងកាយខ្សោយមុននឹងបន្តទៅចាក់ជូនពលរដ្ឋទូទៅ។
លោកថា៖ «ការចាក់ដូសជំរុញនេះ សម្រាប់ប្រជាជនទូទៅគឺត្រូវអនុវត្តស្របតាមអភិក្រម ផ្ការីកដូចដែលបានអនុវត្តសម្រាប់យុទ្ធនាការជាតិ ចាក់វ៉ាក់សាំងកូវីដ ១៩ នៅជុំទី១ ដោយផ្តើមចេញពីរាជធានីភ្នំពេញ ខេត្តកណ្តាល និងបន្តទៅកាន់បណ្តាខេត្តនានាទូទាំងប្រទេស»។
គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសត្រូវរៀបចំផែនការ សកម្មភាពចាក់វ៉ាក់សាំងដូសជំរុញ និងត្រូវខិតខំដឹកនាំសម្របសម្រួល ការអនុវត្តផែនការនេះឱ្យបានចប់សព្វគ្រប់តាមការគ្រោងទុកនៅក្នុងអំឡុងពាក់កណ្តាលឆ្នាំ ២០២២ ខាងមុខ។
ទាក់ទងនឹងការចាក់វ៉ាក់សាំងដូសទី៣ ឬដូសជំរុញនេះ តំណាងអង្គការសុខភាពពិភពលោកប្រចាំកម្ពុជាលោកស្រី លី អៃឡែន បានលើកឡើងកាលពីថ្ងៃទី ២២ សីហាថា ការសម្រេចចិត្តរបស់ប្រទេសកម្ពុជាក្នុងការចាក់ដូសបន្ថែមនៅពេលនេះគឺជាការដើរទៅមុខ ១ ជំហានទៀតនៃការការពារមុនពេលអ្វីៗកើតឡើងពីមេរោគកូវីដ ១៩ នេះ ខណៈដែលប្រទេសកម្ពុជាបានបង្កើតនូវយុទ្ធសាស្ត្រ និងគោលនយោបាយក្នុងការឆ្លើយតបបានយ៉ាងល្អផងដែរ។
លោកស្រីថា៖ «យុទ្ធនាការចាក់វ៉ាក់សាំងកូវីដ ១៩ ក្នុងប្រទេសកម្ពុជា មានដំណើរការយ៉ាងល្អ និងមានល្បឿនលឿន ហើយចំណុចមួយទៀត គឺការថែទាំ និងព្យាបាលអ្នកជំងឺកូវីដ ១៩ ជាពិសេសគឺការជួយសង្គ្រោះជីវិតអ្នកជំងឺដែលមានកម្រិតធ្ងន់ធ្ងរ គឺទាន់ពេលតែម្តង។ ទាំងនេះគឺជាគោលនយោបាយមួយដែលល្អ»។
គិតត្រឹមថ្ងៃទី ២៤ សីហា ពលរដ្ឋអាយុចាប់ពី ១៨ ឆ្នាំឡើងជាង ៨,៨ លាននាក់ឬជាង ៨៨% បានចាក់វ៉ាក់សាំង ហើយជាមួយគ្នានោះ ប្រជាពលរដ្ឋជិត ៥៣ ម៉ឺននាក់បានទទួលការចាក់វ៉ាក់សាំងដូសទី៣ ឬដូសជំរុញផងដែរ៕
វីដេអូ៖
