.jpg)
រដ្ឋសភាកម្ពុជាចូលរួមប្រជុំអាយប៉ានាថ្ងៃទី ២៤ សីហា តាមអនឡាញ។ រូប រដ្ឋសភាជាតិ
ភ្នំពេញៈ មហាសន្និបាតប្រចាំឆ្នាំនៃអន្តរសភាអាស៊ាន ហៅកាត់ថា (AIPA) លើកទី៤២ នៅថ្ងៃទី ២៥ ខែសីហា បានសម្រេចឱ្យសភាកម្ពុជាធ្វើជាម្ចាស់ផ្ទះរៀបចំសភាកម្ពុជាធ្វើជាប្រធាន ដឹកនាំកិច្ចប្រជុំ អាយប៉ា លើកទី៤៣ នៅឆ្នាំក្រោយនេះ បន្តពីសភាប្រទេសប្រ៊ុយណេដារូស្សាឡឹម។
ក្នុងមហាសន្និបាតប្រចាំឆ្នាំនេះ លោក ប៉េហីន ដាតូ អាប់ឌុល រ៉ាម៉ាន ទីប ប្រធានមហាសន្និបាត AIPA លើកទី៤២ ប្រធានក្រុមប្រឹក្សានីតិប្បញ្ញត្តិនៃប្រទេសប្រ៊ុយណេដារូស្សាឡឹម ធ្វើជាម្ចាស់ផ្ទះបានប្រគល់ញញួរឱ្យស្ថានទូតកម្ពុជាប្រចាំប្រទេសប្រ៊ុយណេដារូស្សាឡឹមធ្វើជាតំណាងសភាកម្ពុជាក្នុងការទទួលជានិមិត្តរូប។
លោក ហេង សំរិន ប្រធានរដ្ឋសភាកម្ពុជាបានថ្លែងថា លោកនឹងទទួលយកការទទួលខុសត្រូវក្នុងនាមជាប្រធានអាយប៉ាប្តូរវេនពីលោក ប៉េហីន ដាតូ អាប់ឌុលរ៉ាម៉ាន ទីប ប្រធានក្រុមប្រឹក្សានីតិប្បញ្ញត្តិនៃប្រទេសប្រុយណេដារូស្សាឡឹម។ មហាសន្និបាតអាយប៉ាលើកទី៤៣ ដែលសភានៃកម្ពុជាធ្វើជាម្ចាស់ផ្ទះនឹងគ្រោងរៀបចំឡើងក្នុងខែកញ្ញា ឆ្នាំ ២០២២។
ទោះជាយ៉ាងណាលោកបញ្ជាក់ថា ដោយសារភាពមិនច្បាស់លាស់ជុំវិញនៃការរីករាលដាលនៃជំងឺរាតត្បាតកូវីដ ១៩ អាយប៉ានឹងជួបគ្នាតាមរយៈវិធីណាមួយដែលអាចធ្វើទៅបាន។ ប៉ុន្តែលោកមានជំនឿថា មហាសន្និបាតលើកទី៤៣ គ្រួសារ អាយប៉ា អាចនឹងជួបគ្នាដោយផ្ទាល់នៅលើទឹកដីនៃកម្ពុជា ដោយសារពេលនោះជំងឺកូវីដ ១៩ នេះអាចនឹងត្រូវបានគ្រប់គ្រង និងសាបរលាបពីពិភពលោកនេះ។
លោក ហេង សំរិន ថ្លែងថា៖ «សភាកម្ពុជារង់ចាំធ្វើការយ៉ាងជិតស្និទ្ធជាមួយលេខាធិការដ្ឋាន អាយប៉ា ក៏ដូចជាសភាសមាជិកអាយប៉ា ព្រមទាំងបណ្តាប្រទេសជាដៃគូនានា ដើម្បីបន្តពង្រឹងការងារល្អរបស់យើង និងធានាឱ្យសម្រេចបាននូវចក្ខុវិស័យ និងសេចក្តីប្រាថ្នារួមរបស់អាស៊ាន។ ជាពិសេសការសម្រេចឱ្យបាននូវសហគមន៍អាស៊ានដែលផ្តោតលើប្រជាជន និងមានប្រជាជនជាស្នូល»។
លោក ឈាង វុន ប្រធានគណៈកម្មការ កិច្ចការបរទេស និងសហប្រតិបត្តិការអន្តរជាតិ ឃោសនាការ និងព័ត៌មាន រដ្ឋសភាកម្ពុជា ប្រាប់ក្រុមអ្នកសារព័ត៌មាន ក្រោយបិទបញ្ចប់មហាសន្និបាតលើកទី៤២ ដែលសភាប្រទេសប្រ៊ុយណេដារូស្សាឡឹម តាមវីដេអូខុនហ្វើរ៉ិននៅថ្ងៃទី ២៥ សីហាថា នេះគឺជាមោទនភាពមួយរបស់កម្ពុជាដែលធ្វើជាម្ចាស់ផ្ទះ។ លោក ហេង សំរិន នឹងដឹកនាំកិច្ចប្រជុំ អាយប៉ា លើកទី៤៣ នាឆ្នាំក្រោយនេះ។
លោកបន្តថា បើសិនជាពិភពលោកគ្រប់គ្រងជំងឺកូវីដ ១៩ បាននៅឆ្នាំក្រោយនេះកម្ពុជានឹងអាចរៀបចំមហាសន្និបាតនេះដោយផ្ទាល់បាន ព្រោះកម្ពុជាត្រូវបានគេវាយតម្លៃថា ចាប់ពីខែកញ្ញាតទៅនឹងអាចស្តារឡើងវិញនូវផលប៉ះពាល់សេដ្ឋកិច្ចពីជំងឺកូវីដ ១៩។
លោកថ្លែងថា៖ «អាយប៉ានេះមានសារៈសំខាន់ណាស់ និងជាមោទនៈរបស់កម្ពុជា ហើយបើយើងមិនចូលរួមជាមួយគេទេ យើងនៅឯកោដូចនៅប្រទេសមីយ៉ាន់ម៉ានៅឆ្នាំនេះ។ អ៊ីចឹង អត់បានចូលរួម ដោយសារសភារបស់គាត់ត្រូវបានរំលាយ។ មិនត្រឹមតែប៉ុណ្ណោះកម្ពុជានឹងត្រូវបានគេចាត់ទុកជាអ្នកដឹកនាំកិច្ចប្រជុំដ៏សំខាន់មួយនៅក្នុងតំបន់អាស៊ាននេះ»។
ទោះជាយ៉ាងណា លោកថាសភាកម្ពុជា មិនទាន់បានសម្រេចជ្រើសរើសប្រធានបទសម្រាប់ត្រៀមរៀបចំកិច្ចប្រជុំមហាសន្និបាតលើកទី៤៣ នេះនៅឡើយទេ ព្រោះនៅមានរយៈពេល ១ ឆ្នាំជាងទៀត ហើយបន្ទាប់ពីកម្ពុជាបញ្ចប់ធ្វើជាម្ចាស់ផ្ទះ នៅឆ្នាំ ២០២២ នឹងត្រូវប្តូរឱ្យសភាប្រទេសឥណ្ឌូនេស៊ីធ្វើជាម្ចាស់ផ្ទះម្តងនៅឆ្នាំបន្ទាប់៕
