ព្រះសីហនុៈ ជំនន់ទឹកភ្លៀងបានជន់លិចយ៉ាងខ្លាំង នៅតំបន់ជាច្រើនក្នុងក្រុងព្រះសីហនុ ជាពិសេសនៅចំណុចអូរ ៥ ស្ថិតនៅក្នុងភូមិ ៥ សង្កាត់លេខ ៤ ដែលបានបណ្តាលឱ្យមនុស្សម្នាក់ស្លាប់ ដោយសារទឹកហូរកួច ហើយផ្ទះប្រជាពលរដ្ឋជាច្រើន និងផ្លូវថ្នល់ត្រូវបានទឹកជន់លិច ខណៈមកដល់ល្ងាចថ្ងៃទី ២៥ សីហា មេឃនៅតែកំពុងបន្តធ្លាក់ភ្លៀងនៅឡើយ។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុថ្លែងប្រាប់ ភ្នំពេញ ប៉ុស្ដិ៍ថា រដ្ឋបាលខេត្តនៅពុំទាន់មានតួលេខពីទំហំនៃការខូចខាត ដោយសារជំនន់ទឹកភ្លៀងនេះនៅឡើយទេ ដោយសាររហូតមកដល់ល្ងាចថ្ងៃទី ២៥ សីហា ក្នុងភូមិសាស្ដ្រខេត្ដព្រះសីហនុ មេឃនៅតែកំពុងបន្តមានភ្លៀងធ្លាក់ខ្លាំងនៅឡើយ ខណៈហេដ្ឋារចនាសម្ព័ន្ធផ្លូវថ្នល់ និងផ្ទះប្រជាពលរដ្ឋជាច្រើនត្រូវបានទឹកជន់លិច។
លោក ភារម្យ បានថ្លែងថា៖ «រដ្ឋបាលខេត្តសូមអំពាវនាវដល់បងប្អូនប្រជាពលរដ្ឋទាំងអស់ត្រូវបង្កើនការប្រុងប្រយ័ត្នឱ្យបានខ្ពស់បំផុត ដោយស្វែងរកទីតាំងដែលមានសុវត្ថិភាព និងកុំចាកចេញពីផ្ទះ បើគ្មានភាពចាំបាច់។ ជាពិសេសកុំធ្វើដំណើរតាមដងផ្លូវជម្រាលភ្នំ និងទីកន្លែងដែលមានទឹកហូរកាត់ខ្លាំង ដើម្បីបញ្ចៀសគ្រោះថ្នាក់ដែលអាចកើតឡើងជាយថាហេតុ»។
លោកបានឱ្យដឹងថា នៅយប់ថ្ងៃទី ២៤ ខែសីហា នៅក្នុងក្រុងព្រះសីហនុ ចាប់ពីចន្លោះម៉ោង ៥:០០ នាទីល្ងាច ដល់ម៉ោង ៨:០០ នាទីយប់ មានភ្លៀងធ្លាក់ក្នុងកម្រិតបង្គួរទៅខ្លាំង ដោយកម្រិតទឹកភ្លៀងកើនឡើងពីចន្លោះ ១២០ មិល្លីម៉ែត្រទៅដល់ ២៧៩ មិល្លីម៉ែត្រ។
សរុបបរិមាណទឹកភ្លៀងនៅថ្ងៃទី ២៤ ខែសីហានេះ មានប្រមាណ ២ ៨៥៨,១ មិល្លីម៉ែត្របណ្តាលឱ្យទឹកជន់លិចនៅតំបន់ទំនាបមួយចំនួន រហូតមកដល់ម៉ោង ១០:០០ នាទីយប់ ទើបទឹកភ្លៀងបានស្រកវិញនៅតាមអូរប្រឡាយសំខាន់ៗនៅក្នុងក្រុងព្រះសីហនុ។
រដ្ឋបាលខេត្ដព្រះសីហនុបានឱ្យដឹងថា គ្រោះទឹកជំនន់ទឹកភ្លៀងនៅថ្ងៃទី ២៤ សីហា បានបណ្ដាលឱ្យមនុស្សម្នាក់បានស្លាប់ដោយសារទឹកហូរកួចយកទៅពេលកំពុងមានភ្លៀងធ្លាក់ខ្លាំងនៅចំណុចអូរ៥ស្ថិតនៅក្នុងភូមិ ៥ សង្កាត់លេខ ៤ ក្រុងព្រះសីហនុ។ សមត្ថកិច្ចបានរកឃើញសាកសពជនរងគ្រោះដែលជាបុរសជនជាតិចិនកាលពីម៉ោងប្រមាណ ៩ ព្រឹកថ្ងៃទី ២៥ សីហា ដោយបានអណ្តែតតាមទឹកហូរ ទៅទើរជាប់នៅតំបន់អូរអាចម៍មឹក ស្ថិតនៅក្នុងភូមិ ៤ សង្កាត់លេខ ៤ ក្រុងព្រះសីហនុ។
លោក ស៊ុន សុផាត តំណាងសម្ព័ន្ធសហគមន៍កសិករកម្ពុជាប្រចាំខេត្តព្រះសីហនុ (CCFC) បានឱ្យដឹងថា នៅល្ងាចថ្ងៃទី ២៥ សីហា ក្នុងភូមិសាស្ដ្រខេត្ដព្រះសីហនុ គឺនៅបន្តមានភ្លៀងធ្លាក់ពីតិចទៅច្រើនជាប់រហូត។
លោកប្រាប់ថា៖ «ជំនន់ទឹកភ្លៀងនៅក្នុងក្រុងព្រះសីហនុកើតឡើងដោយសារតែតំបន់នេះជាតំបន់ភ្នំ ខ្ពង់រាប និងជម្រាលភ្នំច្រើន ហើយប្រព័ន្ធលូបង្ហូរទឹក នៅក្នុងក្រុងមិនទាន់អាចទ្រទ្រង់ចំពោះបរិមាណទឹកក្នុងចំនួនច្រើនបាននៅពេលមានភ្លៀងខ្លាំង»។
បើតាមលោក សុផាត រដ្ឋបាលខេត្ដព្រះសីហនុ គួរធ្វើបណ្ដាញរំដោះទឹកចេញពីក្រុង ដើម្បីឱ្យទឹកហូរទៅសមុទ្រ ២-៣ ទីតាំងបន្ថែមទៀត និងរៀបចំប្រព័ន្ធបង្ហូរទឹកជាប្រឡាយ ជាជាងការធ្វើលូបង្ហូរទឹក។
លោកបញ្ជាក់ថា៖ «បើសិនជាក្នុងភូមិសាស្ដ្រក្រុងព្រះសីហនុ នៅតែបន្តធ្វើលូបង្ហូរទឹក នោះទឹកជំនន់ទឹកភ្លៀងគឺនៅតែបន្តជន់លិចដោយសារតែល្បឿនទឹកហូរតាមប្រព័ន្ធលូ គឺហូរមិនទាន់បរិមាណទឹកភ្លៀងដែលធ្លាក់មកច្រើនទេ។ ប្រព័ន្ធលូបង្ហូរទឹក នៅពេលភ្លៀងខ្លាំង វានឹងមានការកកស្ទះកាកសំណល់ផ្សេងៗ ហើយមិនអាចហូរលឿនដូចប្រឡាយទេ»។
ចំណែកនៅឯខេត្តកោះកុង ជំនន់ទឹកភ្លៀងក៏បានជន់លិចផ្លូវ និងផ្ទះប្រជាពលរដ្ឋផងដែរ។
លោកស្រី មិថុនា ភូថង អភិបាលខេត្ដកោះកុងបានឱ្យដឹងកាលពីថ្ងៃទី ២៥ សីហាថា ខេត្ដកោះកុងនៅយប់ថ្ងៃទី ២៤ សីហា មានភ្លៀងធ្លាក់មួយមេយ៉ាងធំ (កម្ពស់ទឹកភ្លៀង ១៨៥ មិល្លីម៉ែត្រ) បណ្តាលឱ្យមានទឹកលិចផ្លូវ និងហូរចូលផ្ទះសំបែងប្រជាពលរដ្ឋមួយចំនួន និងនៅជុំវិញផ្សារដងទង់ក្នុងក្រុងខេមរភូមិន្ទ ដោយសារតែចំនួនទឹកកើនឡើងលឿនពេកហូរចេញមិនទាន់។ លោកស្រីថ្លែងថា៖ «សូមពូមីងបងប្អូនប្រជាពលរដ្ឋទាំងអស់មេត្តាយកចិត្តទុកដាក់ ប្រុងប្រយ័ត្នបន្ថែមចំពោះបាតុភូតធម្មជាតិនារដូវវស្សានេះ»។
លើសពីនេះ លោកស្រីបានអំពាវនាវដល់អ្នកបើកបរយានយន្តតូចធំគ្រប់ប្រភេទ មេត្តាបើកបរដោយប្រុងប្រយ័ត្ន ជាពិសេសត្រូវបើកបរក្នុងល្បឿនយឺតៗ ដើម្បីកុំឱ្យទឹកដែលលិចផ្លូវសាចហូរហៀរចូលក្នុងផ្ទះប្រជាពលរដ្ឋ។
លោក សុខ សុទ្ធី អ្នកនាំពាក្យរដ្ឋបាលខេត្ដបញ្ជាក់ថា នៅថ្ងៃទី ២៥ សីហា ភូមិសាស្ដ្រខេត្ដកោះកុងក៏កំពុងបន្តមានភ្លៀងធ្លាក់ពីតិច ទៅមធ្យម ប៉ុន្ដែមិនបណ្ដាលឱ្យមានគ្រោះថ្នាក់ដល់ប្រជាពលរដ្ឋ និងធ្វើឱ្យលិចលង់ហេដ្ឋារចនាសម្ព័ន្ធក្នុងខេត្ដទេ។
លោកថ្លែងថា៖ «កាលពីយប់ថ្ងៃទី ២៤ ខែសីហា ធ្លាក់ភ្លៀងខ្លាំងបណ្ដាលឱ្យលិចចូលផ្ទះប្រជាពលរដ្ឋមួយចំនួន ប៉ុន្ដែព្រឹកឡើងថ្ងៃទី ២៥ ខែសីហា ទឹកភ្លៀងក៏បានស្រកចុះវិញអស់ ហើយអាកាសធាតុពេលនេះ (ថ្ងៃទី ២៥ សីហា) ក៏កំពុងភ្លៀងដែរ ប៉ុន្ដែភ្លៀងតិច»។
ក្រសួងធនធានទឹក និងឧតុនិយមនៅថ្ងៃទី ២៤ ខែសីហាបានធ្វើសេចក្តីជូនដំណឹងស្តីពីស្ថានភាពធាតុអាកាស (ចាប់ពីថ្ងៃទី ២៥ ដល់ថ្ងៃ ៣១ ខែសីហា ឆ្នាំ ២០២១) ដោយបញ្ជាក់ថា កម្ពុជានឹងទទួលរងឥទ្ធិពលពីជ្រលងសម្ពាធទាបឥណ្ឌាក្នុងកម្រិតខ្លាំង ទន្ទឹមនោះក៏សង្ឃឹមនឹងអាចកើតមាននៅជ្រលងសម្ពាធទាប ITCZ សាជាថ្មីផងដែរ។
ក្រសួងបញ្ជាក់ថា ស្ថានភាពបែបនេះនឹងធ្វើឱ្យតំបន់មាត់សមុទ្រមានសីតុណ្ហភាពអប្បបរមាមានពី ២៣ ទៅ ២៥ អង្សាសេ សីតុណ្ហភាពអតិបរមាមានពី ៣៣ ទៅ ៣៥ អង្សាសេ ដែលអាចនឹងមានភ្លៀងធ្លាក់ក្នុងកម្រិតពីមធ្យមទៅច្រើន។ នៅលើផ្ទៃសមុទ្រអាចមានភ្លៀងធ្លាក់ច្រើន និងរលកសមុទ្រមធ្យម។
ក្រសួងអំពាវនាវដល់សាធារណជនសូមប្រុងប្រយ័ត្នចំពោះបាតុភូតភ្លៀងផ្គររន្ទះខ្យល់កន្ត្រាក់ និងរលកសមុទ្រ៕