.jpg)
ទិដ្ឋភាពពលរដ្ឋនៅលើដីទំនាស់ពីថ្ងៃ ២៥ សីហា។ រូបថត ហ្វេសប៊ុក
មណ្ឌលគិរីៈ ក្រុមពលរដ្ឋចំនួន ១៨ គ្រួសារ ដែលមានគ្នាជាង ២០ នាក់ រស់នៅភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី ដាក់ពាក្យបណ្តឹងទៅអាជ្ញាធរពាក់ព័ន្ធមួយចំនួន ដើម្បីស្នើសុំកិច្ចអន្តរាគមន៍ដោយចោទបុគ្គលម្នាក់ថា បានឈូសឆាយបំផ្លាញទ្រព្យសម្បត្តិរបស់ពួកគេ ដើម្បីយកដីជាង ១០ ហិកតា។
តាមពាក្យបណ្តឹងរបស់ពលរដ្ឋ ដែលបានដាក់ជូនអភិបាលខេត្តមណ្ឌលគិរី តំណាងរាស្ត្រខេត្តមណ្ឌលគិរី និងអាជ្ញាធរដែនដីបានប្តឹង ឈ្មោះ សាន សូត្រ ភេទប្រុស អាយុប្រហែល ៥០ ឆ្នាំ ជនជាតិខ្មែរ មុខរបរ ឈ្មួញដី រស់នៅភូមិព្រែកហូរកើត សង្កាត់ព្រែកហូរ ក្រុងតាខ្មៅ ខេត្តកណ្តាល ពីបទបំផ្លិចបំផ្លាញទ្រព្យសម្បត្តិអ្នកដទៃដោយចេតនា។
ពាក្យបណ្តឹងរបស់ពលរដ្ឋទាំង ១៨ គ្រួសារនោះ បានអះអាងថា កាលពីថ្ងៃទី ២០ សីហា បុគ្គលរូបនេះបានយកគ្រឿងចក្រមកឈូសឆាយលើដីពួកគាត់ជាង ១០ ហិកតា បណ្តាលឱ្យខូចខាតស្រូវ ដំណាំផ្សេងៗរួមនឹងស្ពានសាធារណៈរបស់អ្នកភូមិទៀតផង។
ពាក្យបណ្តឹងដដែលបានបញ្ជាក់ថា «អាស្រ័យហេតុនេះយើងខ្ញុំកើតទុក្ខមិនសុខចិត្ត និងសំណូមពរឯកឧត្តមមេត្តាជួយអន្តរាគមន៍ដល់អាជ្ញាធរខេត្ត ស្រុក ឃុំ ដើម្បីចុះពិនិត្យ និងដោះស្រាយបន្ទាន់លើការខូចខាត។
ទាមទារសំណងជំងឺចិត្ត និងការខូចខាតសរុបចំនួន ១០ ម៉ឺនដុល្លារ លើសកម្មភាពដែលបានឈូសឆាយ និងបំផ្លិចបំផ្លាញ»។
បន្ថែមពីនេះ ពលរដ្ឋទាំង ១៨ គ្រួសារនេះក៏ស្នើឱ្យអាជ្ញាធរពាក់ព័ន្ធចេញវិធានការទប់ស្កាត់ និងបញ្ឈប់រាល់សកម្មភាពឈូសឆាយ ដែលអាចកើតមានបន្តទៀត ដើម្បីរក្សាការពារដីពួកគាត់ជាម្ចាស់ពិតប្រាកដ។
លោក តែ រ៉ន ពលរដ្ឋម្នាក់ដែលបានផ្ដិតមេដៃដាក់ពាក្យបណ្តឹងបានប្រាប់ ភ្នំពេញ ប៉ុស្តិ៍ នៅថ្ងៃទី ២៥ សីហាថា ដីទាំងជាង ១០ ហិកតានេះ អ្នកភូមិទាំង ១៨ គ្រួសារ បានកាន់កាប់តជំនាន់គ្នាជាយូរឆ្នាំមកហើយ។
ប៉ុន្តែថ្មីៗនេះ ស្រាប់តែឈ្មោះ សាន សូត្រ មកអះអាងថា ជាដីកម្មសិទ្ធិរបស់ខ្លួនដោយសំអាងថា បានទិញពីពលរដ្ឋ។ ប៉ុន្តែជាក់ស្តែងគ្មានពលរដ្ឋណាបានលក់ឱ្យគាត់ទេ។
លោកថា៖ «ដីរបស់យើង មិនបានលក់ឱ្យគាត់ទេ។ គាត់ទិញពីពលរដ្ឋនៅខាងៗ ដីរបស់ពួកយើង ហើយគាត់ព័ទ្ធយកដីរបស់យើង។ យើងសង្ឃឹមថាអាជ្ញាធរនឹងជួយពួកយើងកុំឱ្យមានការមកឈូសឆាយដណ្តើមកាន់កាប់ដីយើងបន្តទៀត»។
យ៉ាងណាក្ដី លោក សាន សូត្រ ដែលរងការចោទប្រកាន់នេះបានប្រាប់ ភ្នំពេញ ប៉ុស្តិ៍ នៅថ្ងៃទី ២៥ សីហាថា លោក មិនបានឈូសឆាយលើដីអ្នកណាទេ ហើយដីដែលលោកបានឈូសឆាយនេះគឺបានទិញពីពលរដ្ឋស្របច្បាប់តាំងពីឆ្នាំ ២០០៧ មកម្ល៉េះ។ លោកបានអះអាងថា លោកបានទិញដីជាង ៥០០ ហិកតា ដោយបានផ្តល់ជាថវិការួចរាល់អស់ហើយ ប៉ុន្តែក្រោយមកក៏មានពលរដ្ឋថ្មីជាបន្តបន្ទាប់ចេញមុខមកទាមទារ ដើម្បីឱ្យលោកផ្តល់សំណងជាលុយជាហូរហែ។
លោកបានបញ្ជាក់ថា៖ «ខ្ញុំបានទិញជិត ៧ ទៅ ១០ ឆ្នាំហើយ ប្រជាជនបងប្អូនហ្នឹងគាត់បំប្លែងអ្នកថ្មីមកគាស់កកកាយខ្ញុំ រករឿងខ្ញុំរហូត នៅពេលដែលខ្ញុំធ្វើតែត្រឹមដីរបស់ខ្ញុំប៉ុណ្ណោះ។ តាំងពីទិញមកខ្ញុំដោះស្រាយ ២ ទៅ ៣ តង់ហើយកាលពីថ្មីនេះ ខ្ញុំទើបតែដោះស្រាយជាមួយពលរដ្ឋជាង ៧០ គ្រួសារ ហើយថ្មីៗលើដីទាំងនេះ»។
លើសពីនេះ លោក សាន សូត្រ បានអះអាងថា លោកមិនខ្លាចនឹងពាក្យបណ្តឹងដែលពលរដ្ឋទាំង ១៨ គ្រួសារ បានប្តឹងលោកនោះទេ ព្រោះដីដែលលោកបានកាន់កាប់ឈូសឆាយគឺជាដីដែលលោកបានទិញ និងមានឯកសារត្រឹមត្រូវ។
លោក ស៊ន សារុន នាយកផ្នែករដ្ឋបាល និងជាអ្នកនាំពាក្យសាលាខេត្តមណ្ឌលគិរីបានប្រាប់ ភ្នំពេញ ប៉ុស្តិ៍ នៅថ្ងៃទី ២៥ សីហាថា លោកមិនទាន់អាចបកស្រាយយ៉ាងណាចំពោះការចោទប្រកាន់គ្នាទៅវិញទៅមកលើដីជាង ១០ ហិកតានេះនៅឡើយទេ។ ប៉ុន្តែលោកបានអះអាងថា បន្ទាប់ពីទទួលបានពាក្យបណ្តឹងលោកនឹងចាត់ឱ្យមន្ត្រីចុះស្រាវជ្រាវ និងស៊ើបអង្កេតពីករណីនេះដល់ទីតាំងកើតហេតុដោយផ្ទាល់។
លោកបានបញ្ជាក់ថា៖ «យើងនឹងពិនិត្យលើពាក្យបណ្តឹងគាត់សិន ហើយបន្តមកទៀតយើងនឹងចុះទៅពិនិត្យជាក់ស្តែងថា នៅទីតាំងណាជាទីតាំងណា ដើម្បីយើងសិក្សាស្រាវជ្រាវពីប្រវត្តិដីថា ដើមចមនៃជម្លោះនេះកើតមកពីណា?»៕
