.jpg)
យុវជនដែលរួមភេទជាមួយក្មេងស្រីវ័យ ១២ ឆ្នាំ។ រូបថត កងរាជអាវុធហត្ថ
បាត់ដំបងៈ តុលាការខេត្តបាត់ដំបងនៅថ្ងៃទី ២៥ សីហា បានធ្វើការចោទប្រកាន់យុវជនម្នាក់ពាក់ព័ន្ធនឹងការរួមភេទជាមួយក្មេងស្រីម្នាក់អាយុ ១២ ឆ្នាំ ប្រព្រឹត្តនៅឃុំតាសែន ស្រុកកំរៀង ដែលត្រូវបានសមត្ថកិច្ចចាប់ខ្លួនកាលពីថ្ងៃទី ២៣ សីហា។
លោក ដួង សាវ៉ន អ្នកនាំពាក្យអយ្យការអមសាលាដំបូងខេត្តបាត់ដំបងឱ្យដឹងនៅថ្ងៃទី ២៥ សីហាថា យុវជនឈ្មោះ ម៉ី ច័ន្ទឧសភា ហៅ ត្រេស អាយុ ១៨ ឆ្នាំ រស់នៅឃុំតាសែន ស្រុកកំរៀង ត្រូវបានតំណាងអយ្យការចោទប្រកាន់នៅថ្ងៃទី ២៥ សីហា និងបានបញ្ជូនទៅចៅក្រមស៊ើបសួរ។
លោកថ្លែងថា៖ «ជនម្នាក់នេះត្រូវចោទពីបទរួមភេទជាមួយអនីតិជនអាយុក្រោម ១៥ ឆ្នាំ តាមមាត្រា ៤២ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ និងបានបញ្ជូនទៅចៅក្រមស៊ើបសួររួចហើយ»។
បើតាមមាត្រា ៤២ នៃច្បាប់ខាងលើ ប្រសិនបើជនត្រូវចោទត្រូវបានតុលាការរកឃើញថា ពិតជាមានកំហុសមែននោះនឹងត្រូវប្រឈមជាប់ពន្ធនាគារពី ៥ ទៅ ១០ ឆ្នាំ។
ពាក់ព័ន្ធអង្គហេតុនេះត្រូវបានលោក សូ ឌី ប្រធានមន្ទីរយុត្តិធម៌នៃកងរាជអាវុធហត្ថខេត្តបាត់ដំបងប្រាប់នៅថ្ងៃទី ២៥ សីហាថា បើតាមការរៀបរាប់ពីម្តាយក្មេងរងគ្រោះថា កូនស្រីរបស់គាត់ឈ្មោះ ម.ប អាយុ ១២ ឆ្នាំ រស់នៅឃុំតាសែន ស្រុកកំរៀងជាមួយជនល្មើសដែរ។
ម្តាយក្មេងរងគ្រោះ មានមុខរបរជាអ្នកលក់ខោអាវតាមអនឡាញ។ ស្ត្រីជាម្តាយតែងតែធ្វើការផ្សព្វផ្សាយលក់ទំនិញតាមអនឡាញ ហើយពេលខ្លះក្មេងរងគ្រោះក៏ជួយបង្ហោះលក់ខោអាវដែរ។ ពេលបង្ហោះតាមហ្វេសប៊ុកផ្សព្វផ្សាយលក់ខោអាវនោះរវាងជនសង្ស័យ និងក្មេងរងគ្រោះតែងទាក់ទងសារទៅមករហូតស្គាល់គ្នា។
លោក សូ ឌី បន្តទៀតថា លុះដល់ថ្ងៃទី ២២ សីហា ស្រាប់តែជនសង្ស័យខំមិនចូលក្នុងផេចហ្វេសប៊ុកទិញខោអាវ ហើយណាត់ឱ្យក្មេងរងគ្រោះយកខោអាវទៅឱ្យរួចក៏បបួលទៅដេករួមភេទជាមួយគ្នាតែម្តង។
បន្ទាប់ពីបាត់កូនស្រី ១ យប់មកនៅថ្ងៃទី ២៣ សីហា ម្តាយបានដាក់ពាក្យបណ្តឹងទៅកងរាជអាវុធហត្ថស្រុកកំរៀងហើយសមត្ថកិច្ចអាវុធហត្ថស្រុក ក៏ចាប់ផ្តើមធ្វើការស្រាវជ្រាវ។ នៅពេលនោះក្មេងរងគ្រោះក៏ត្រឡប់មកផ្ទះវិញនៅថ្ងៃទី ២៣ សីហានោះដែរ។
លោក សូ ឌី បញ្ជាក់តាមសម្តីម្តាយក្មេងស្រីរងគ្រោះថាក្រោយពីឃើញកូនស្រីត្រឡប់ចូលផ្ទះវិញ បន្ទាប់ពីបាត់ ១ យប់នោះមក ម្តាយបានជជីកសួរកូនហើយក្មេងរងគ្រោះក៏ប្រាប់ថា ឈ្មោះ ត្រេស ជាអ្នកហៅនាងទៅដេករួមភេទជាមួយ។
បន្ទាប់ពីម្តាយក្មេងស្រីប្រាប់សមត្ថកិច្ចមក សមត្ថកិច្ចអាវុធហត្ថ ស្រុកកំរៀង បានហៅជនសង្ស័យមកសាកសួរ ហើយជនសង្ស័យបានសារភាពថា រូបគេពិតជាបានបបួលក្មេងរងគ្រោះទៅរួមភេទមែន។ នៅពេលនោះសមត្ថកិច្ចក៏ចាប់ខ្លួនជនសង្ស័យតែម្តងទៅ។ តាមការបំភ្លឺពីភាគីទាំងសងខាងបង្ហាញថារវាងក្មេងរងគ្រោះ និងជនសង្ស័យគឺបានស្គាល់គ្នាពីមុនមក៕
