.jpg)
ស្ថានភាពជំនន់ទឹកភ្លៀងនៅខេត្តព្រះសីហនុ កាលពីថ្ងៃទី ២៤ សីហា។ រូបថត រដ្ឋបាលខេត្តព្រះសីហនុ
ភ្នំពេញៈ មន្រ្ដីជំនាញនៃមន្ទីរធនធាតុទឹកខេត្ដព្រះសីហនុ អះអាងថា ជំនន់ទឹកភ្លៀងក្នុងខេត្ដព្រះសីហនុចាប់តាំងពីថ្ងៃទី ២៤ រហូតមកដល់ថ្ងៃទី ២៦ ខែសីហា គឺបានស្រកចុះវិញលឿន បើធៀបទៅនឹងជំនន់កាលពីឆ្នាំ ២០១៩។ ទោះយ៉ាងណា អាជ្ញាធរបន្តឱ្យពលរដ្ឋប្រុងប្រយ័ត្នខ្ពស់ព្រោះភ្លៀងបន្តធ្លាក់មិនឈប់។
លោក ហេង សោភ័ណរិទ្ធ ប្រធានមន្ទីរធនធានទឹក និងឧតុនិយម ខេត្ដព្រះសីហនុឱ្យដឹងថា ទឹកភ្លៀងធ្លាក់ចុះខ្លាំងនៅម៉ោងប្រហែល ៥ ល្ងាច ថ្ងៃទី ២៤ ខែសីហា។ បរិមាណទឹកនៅតំបន់ទំនាបក្នុងក្រុងព្រះសីហនុ កើនឡើងដល់ ២ ៨៥៨,១ មីល្លីម៉ែត្រ បណ្តាលឱ្យជន់លិចនៅតំបន់ទំនាបមួយចំនួន ពិសេសនៅក្នុងភូមិសាស្រ្ដសង្កាត់លេខ ៤។ ប៉ុន្ដែរយៈពេលជាង១ម៉ោង គឺដល់ម៉ោង ១០:០០ នាទីយប់ទឹកភ្លៀងបានស្រកវិញនៅតាមអូរប្រឡាយសំខាន់ៗក្នុងក្រុងព្រះសីហនុ។
លោកថ្លែងថា៖«ស្ថានភាពជំនន់ទឹកភ្លៀងនៅពេលនេះ បើយើងប្រៀបធៀបទៅនឹងស្ថានភាបជំនន់កាលពីឆ្នាំ ២០១៩ គឺទឹកបានស្រកចុះវិញក្នុងល្បឿនលឿនមិនបណ្ដាលឱ្យនៅជន់លិចយូរនោះទេ»។
បើតាមលោក សោភ័ណរិទ្ធ ស្ថានភាពទឹកជំនន់ស្រកចុះ និងហូរចេញលឿនបែបនេះ ក្រោយពីរដ្ឋបាលខេត្ដបានយកចិត្ដទុកដាក់កសាងហេដ្ឋារចនាសម្ព័ន្ធប្រព័ន្ធលូ ប្រឡាយ សម្រាប់ឱ្យទឹកហូរចេញបានទាន់ពេលតាំងពី ២ ឆ្នាំមុន។ លោកបញ្ជាក់ថា ទឹកភ្លៀងរយៈពេល៣ថ្ងៃនេះ មិនទាន់មានការប៉ះពាល់ដល់ហេដ្ឋារចនាសម្ព័ន្ធនានា ដូចជា ការបាក់បង្គោលភ្លើង ឬទឹកហូរដាច់ផ្លូវក្នុងខេត្ដនៅឡើយទេ។
លោក ឃាង ភារម្យ មន្រ្ដីនាំពាក្យរដ្ឋបាលខេត្ដព្រះសីហនុ បានប្រាប់ ភ្នំពេញ ប៉ុស្ដ៍ នៅថ្ងៃទី ២៦ សីហា ថា ភ្លៀងនៅបន្តធ្លាក់ ប៉ុន្ដែមិនសូវខ្លាំង ហើយសមត្ថកិច្ចកំពុងបន្តតាមដានស្ថានភាពទឹកភ្លៀងនេះ។
លោកថ្លែងថា៖ «តាមការព្យាករនឹងមានករណីភ្លៀងធ្លាក់ជាបន្តបន្ទាប់នៅខេត្តព្រះសីហនុ។ ដូច្នេះរដ្ឋបាលខេត្តសូមអំពាវនាវដល់បងប្អូនប្រជាពលរដ្ឋទាំងអស់ត្រូវបង្កើនការប្រុងប្រយ័ត្នឱ្យបានខ្ពស់បំផុត ដោយស្វែងរកទីតាំងដែលមានសុវត្ថិភាព និងកុំចាកចេញពីផ្ទះ បើគ្មានភាពចាំបាច់។ ជាពិសេសកុំធ្វើដំណើរតាមដងផ្លូវជម្រាលភ្នំ និងទីកន្លែង ដែលមានទឹកហូរកាត់ខ្លាំង ដើម្បីបញ្ចៀសគ្រោះថ្នាក់ដែលអាចកើតឡើងជាយថាហេតុ»។
លោកភារម្យបញ្ជាក់ថា ពាក់ព័ន្ធនឹងរបាយការណ៍នៃផលប៉ះពាល់ ដោយសារទឹកជំនន់ គិតត្រឹមថ្ងៃទី ២៥ សីហា ក្រុមការងារជំនាញកំពុងចុះសិក្សាវាយតម្លៃនៅឡើយមិនទាន់អាចផ្តល់ជូននៅឡើយទេ។
លោកសុខ សុខុម ប្រធានអង្គការស្រាវជ្រាវជាតិកម្ពុជា (CNRO) បានឱ្យដឹងថា ភ្លៀងនៅថ្ងៃទី ២៦ ខែសីហា មានភាពធូស្បើយជាងកាលពីថ្ងៃទី ២៤-២៥ ខែសីហា ប៉ុន្ដែភ្លៀងនៅបន្តធ្លាក់មិនដាច់។
លោកបន្តថា៖ «ដោយសារស្ថានភាពភ្លៀងបានធូរស្បើយទឹកជំនន់ក៏បានស្រកចុះបានលឿនដែរ។ ប៉ុន្ដែមេឃនៅតែងងឹត ហើយទឹកភ្លៀងនៅបន្តធ្លាក់តិចតួចមើល៍ទៅប្រហែលជាធូរស្បើយហើយ»។
លោកសុខុមឱ្យដឹងថា ទឹកភ្លៀងរយៈពេល៣ថ្ងៃនេះ បណ្ដាលឱ្យជន់លិចតំបន់ទំនាបមួយចំនួន នៅសង្កាត់លេខ១ លេខ២ លេខ៣ និងលេខ៤។ ប៉ុន្ដែជំនន់បានលិចនៅតាមតំបន់ទំនាបៗប៉ុណ្ណោះ មិនបានលិចទូទាំងក្រុងព្រះសីហនុទេ។
លោកអះអាងថា អាជ្ញាធរខេត្ដ និងស្ថាប័នជំនាញពាក់ព័ន្ធ បានយកចិត្ដទុកដាក់ក្នុងការតាមដានស្ថានភាពនៃការវិវឌ្ឍជំនន់ទឹកភ្លៀងក្នុងខេត្ដព្រះសីហនុ ដើម្បីជួយសង្គ្រោះប្រជាពលរដ្ឋ និងបញ្ចៀសការកកស្ទះចរាចរណ៍ក្នុងភូមិសាស្រ្ដក្រុងព្រះសីហនុ។
លោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បញ្ជាក់ថា ត្រឹមថ្ងៃទី ២៦ ខែសីហា រដ្ឋបាលខេត្ដព្រះសីហនុ និងខេត្ដផ្សេងទៀតដែលរងគ្រោះដោយសារគ្រោះទឹកជំនន់ទឹកភ្លៀង មិនទាន់មានរបាយការណ៍ពីផលប៉ះពាល់បឋមដោយសារជំនន់ទឹកភ្លៀងនេះនៅឡើយទេ៕
