ភ្នំពេញៈ មន្ត្រីជំនាញរាជធានីភ្នំពេញបន្តស៊ើបអង្កេតរកអ្នកពាក់ព័ន្ធករណីជួញដូរភ្លុកដំរីឆ្លាក់រួចនិងមិនទាន់ឆ្លាក់សរុប ១០៩ ដុំ ដែលមានទម្ងន់ជាង ៤ គីឡូក្រាម បន្ទាប់ពីសមត្ថកិច្ចកងរាជអាវុធហត្ថសហការជាមួយមន្ត្រីរដ្ឋបាលព្រៃឈើ បានឃាត់ខ្លួនមនុស្សប្រុសស្រី ២ នាក់ ដែលបានលួចជួញដូរដោយខុសច្បាប់។
កាលពីថ្ងៃទី ២៥ សីហា សមត្ថកិច្ចចម្រុះបានចុះប្រតិបត្តិការបង្ក្រាបឈ្មួញជួញដូរសំណាកភ្លុកដំរីនៅទីតាំងលួចលាក់ជួញដូរភ្លុកដំរីចំនួន ២ កន្លែង នៅជាប់គ្នាដែលស្ថិតក្នុងភូមិក្រោលគោ សង្កាត់គីឡូម៉ែត្រលេខ ៦ ខណ្ឌឫស្សីកែវ រាជធានីភ្នំពេញ។
លោក គាំ សីហា នាយខណ្ឌរដ្ឋបាលព្រៃឈើភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ២៦ សីហាថា បន្ទាប់ពីបង្ក្រាបបទល្មើសនេះ សមត្ថកិច្ចកំពុងបន្តស៊ើបអង្កេតដើម្បីស្វែងរកអ្នកពាក់ព័ន្ធ ខណៈជនសង្ស័យទាំង ២ នាក់ និងភ័ស្តុតាងត្រូវបញ្ជូនបន្តទៅចាត់ការតាមនីតិវិធីច្បាប់។
លោកបានបញ្ជាក់ថា៖ «ករណីនេះខណ្ឌរដ្ឋបាលព្រៃឈើគាត់ចាត់ការដោយខ្លួនឯងហើយ ហើយយើងបានចូលរួមក្នុងប្រតិបត្តិការនេះ។ ឥឡូវនេះ ករណីនេះ កំពុងស្ថិតក្នុងដំណាក់ការស៊ើបអង្កេត ដែលខ្ញុំមិនអាចផ្តល់ព័ត៌មានអ្វីបានផ្សេងទេ»។
យោងតាមរបាយការណ៍ដែលបានផ្សព្វផ្សាយនៅថ្ងៃទី ២៥ សីហា ឲ្យដឹងថា ប្រតិបត្តិការចុះបង្ក្រាបបទល្មើសនេះគឺបានដកហូតភ្លុកដំរីសរុបចំនួន ១០៩ ដុំ ស្មើនឹងទម្ងន់ ៤,២ គីឡូក្រាម។ ក្នុងនោះមានភ្លុកដំរីឆ្លាក់រួចចំនួន ៨ ដុំ និងភ្លុកដំរីមិនទាន់ឆ្លាក់ចំនួន ២៦ ដុំ សរុបមានចំនួន ៣៤ ដុំ ស្មើនឹងទម្ងន់ ១,៨ គីឡូក្រាម ត្រូវបានដកហូតពីទីតាំងទី១ នៅផ្ទះលេខ E41 ស្ថិតក្នុងបុរីមនោរម្យ ស្ថិតនៅភូមិក្រោលគោ សង្កាត់គីឡូម៉ែត្រលេខ ៦ ដែលមានម្ចាស់ឈ្មោះ ស៊ិន សុភាព ភេទប្រុស អាយុ ៣៨ ឆ្នាំ មុខរបរជាជាងចម្លាក់។
ចំណែកភ្លុកដំរីឆ្លាក់រួចចំនួន ១៥ ដុំ ដែលមានទម្ងន់ ០,៩០ គីឡូក្រាម និងភ្លុកដំរីមិនទាន់ឆ្លាក់ចំនួន៦០ដុំដែលមានទម្ងន់ ១,៥០ គីឡូក្រាមសរុបទាំងឆ្លាក់រួច និងមិនទាន់ឆ្លាក់ចំនួន ៧៥ ដុំ ស្មើនឹងទម្ងន់ ២,៤ គីឡូក្រាម ត្រូវបានសមត្ថកិច្ចក៏ដកហូតពីទីតាំងទី២ នៅផ្ទះលេខ E43 ស្ថិតនៅជាប់គ្នា ដែលមានម្ចាស់ឈ្មោះ ធី សុម៉ាលី ភេទស្រី អាយុ ២១ ឆ្នាំមុខរបរលក់ដូរ៕