ភ្នំពេញៈ រាជរដ្ឋាភិបាល តាមរយៈក្រសួងមហាផ្ទៃ និងអគ្គស្នងការដ្ឋាននគរបាលជាតិ បានបញ្ជាទិញរថយន្តពន្លត់អគ្គិភ័យចំនួន ២ គ្រឿង ឱ្យនាយកដ្ឋាននគរបាលពន្លត់អគ្គិភ័យ ១ គ្រឿង និងស្នងការដ្ឋាននគរបាលរាជធានីភ្នំពេញ ១ គ្រឿង សម្រាប់ពន្លត់អគ្គិភ័យដែលកើតឡើងនៅតាមអគារខ្ពស់ៗនៅក្នុងទីក្រុងភ្នំពេញ។
លោក នេត្រ វណ្ណថា ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្រ្គោះនៃអគ្គស្នងការដ្ឋាននគរបាលជាតិ ប្រាប់ ភ្នំពេញ ប៉ុស្តិ៍ នៅថ្ងៃទី ២៦ សីហាថា សម្រាប់រថយន្តពន្លត់អគ្គិភ័យចំនួន ២ គ្រឿងនេះ អាចប្រើប្រាស់បានតែនៅក្នុងរាជធានីភ្នំពេញប៉ុណ្ណោះ។ ប៉ុន្តែបើប្រើប្រាស់នៅទូទាំងប្រទេស ដូចជាខេត្តដែលមានអគារខ្ពស់ៗ មានខេត្តព្រះសីហនុ ជាដើម គឺមិនទាន់អាចឆ្លើយតបបានទេ។ ប៉ុន្តែទៅមុខទៀត រាជរដ្ឋាភិបាលអាចនឹងបញ្ជាទិញបន្ថែមទៀត ។
លោកបន្តថា រថយន្តពន្លត់អគ្គិភ័យចំនួន ២ គ្រឿងនេះ ពិតជាមានសារៈសំខាន់ណាស់ សម្រាប់ប្រទេសកម្ពុជា ក្នុងការពន្លត់អគ្គិភ័យ ដែលកើតឡើងនៅតាមអគារខ្ពស់ ព្រោះបច្ចុប្បន្ននេះ ជាពិសសទីក្រុងភ្នំពេញមានអគារខ្ពស់ៗច្រើន និងប្រឈមខ្លាំងជាងគេ។ ទោះជាយ៉ាងណាលោក មិនបានប្រាប់ពីតម្លៃលើការចំណាយចំពោះការទិញរថយន្តពន្លត់អគ្គិភ័យទាំង ២ គ្រឿងនេះនោះទេ គ្រាន់តែលោកបញ្ជាក់ថាមានតម្លៃខ្ពស់។
លោកថ្លែងថា៖«នេះជាដំបូងដែលយើងមានរថយន្តពន្លត់អគ្គិភ័យដែលមានជណ្តើរខ្ពស់ រហូតដល់ ៥០ ម៉ែត្រជាង។ ពីមុនមក កម្ពុជាមិនដែលមានទេ»។
លោកបន្តថា៖ «បើប្រទេសកម្ពុជា នៅតែមានការរីកចម្រើនបន្តទៀត កម្ពុជានឹងបន្តបញ្ជាទិញបន្ថែមទៀត ដើម្បីឆ្លើយទៅនឹងកំណើនសំណង់។ ប៉ុន្តែដំណាក់កាលនេះយើងមានតែ ២ គ្រឿងនេះ អាចប្រើបានហើយនៅក្នុងទីក្រុងភ្នំពេញ។ [ប៉ុន្តែ] សម្រាប់នៅខេត្តធំៗដូចជានៅក្រុងព្រះសីហនុ ក្រុងបាវិត និងក្រុងប៉ោយប៉ែតនៅ [មិនទាន់មាន] ទេ»។
បើតាមលោក នេត្រ វណ្ណថា រថយន្តពន្លត់អគ្គិភ័យទាំង ២ គ្រឿងនេះ ត្រូវបានបញ្ជាទិញពីប្រទេសអាល្លឺម៉ង់ តាមរយៈក្រុមហ៊ុន KNN។ ក្រុមហ៊ុននេះ បានចូលរួមបណ្តុះបណ្តាលមន្ត្រីឱ្យចេះប្រើប្រាស់នូវបច្ចេកទេសផ្សេងៗ ដោយក្នុងនោះ រថយន្ត ១ គ្រឿងត្រូវការមន្ត្រីចំនួន៧នាក់ តាមស្តង់ដាអន្តរជាតិ មានទាំងអ្នកបញ្ជាដង បញ្ជាជើងដំរី អ្នកបញ្ជាជណ្តើរ និងអ្នកបូមបាញ់អីជាដើម។
តាមការផ្សព្វផ្សាយលើហ្វេសប៊ុកផ្លូវការរបស់នាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ នៃអគ្គស្នងការដ្ឋាននគរបាលជាតិ កាលពីថ្ងៃទី២៦ ខែសីហា បានឱ្យដឹងថា លក្ខណៈសម្បត្តិរបស់រថយន្តនេះ មានកម្ពស់ ៤ ម៉ែត្រ បណ្ដោយប្រវែង១៣ម៉ែត្រ ទទឹងប្រវែង២,៥ម៉ែត្រ ដងចេញអស់៥៤ម៉ែត្រ។ ចំណុះទឹក ៣ ០០០ លីត្រ ហ្វម ១ ០០០ លីត្រ និងជាប្រភេទរថយន្តមូមបាញ់ និងសង្ភ្រោះ ហើយដងឡើង ១៥ ម៉ែត្របាញ់ចេញបាន៤០ម៉ែត្រ។
របាយការណ៍នាយកដ្ឋាននគរបាលបង្ការពន្លត់អគ្គិភ័យ និងសង្រ្គោះនៃអគ្គស្នងការដ្ឋាននគរបាលជាតិបានញ្ជាក់ថា នៅទីក្រុងភ្នំពេញ មានរថយន្តពន្លត់អគ្គិភ័យ ចំនួនជាង៥០គ្រឿង។ ក្នុងនោះក៏មានរថយន្តពន្លត់អគ្គិភ័យមួយចំនួនទៀត មកពីក្រុមហ៊ុនវិស័យឯកជន និងស្ថាប័នជាតិមួយចំនួនទៀតក្នុងការចូលរួមពន្លត់អគ្គិភ័យដែលកើតឡើងនៅក្នុងទីក្រុងភ្នំពេញ។
ពាក់ព័ន្ធនឹងវិស័យសំណង់នៅក្នុងប្រទេសកម្ពុជា តាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ ឆ្នាំ ២០២០ ឱ្យដឹងថា គម្រោងអគារខ្ពស់ៗចាប់ពី ៥ ជាន់ឡើងនៅប្រទេសកម្ពុជា មានចំនួន ២ ១៨០ អគារ ក្នុងនោះ ខេត្តព្រះសីហនុ មានចំនួន ៦១៥ អគារ៕
វីដេអូ៖