.jpg)
ដុំឈើដែលមន្ត្រីបរិស្ថានរឹបអូសនៅក្រោយផ្ទះពលរដ្ឋក្នុងស្រុកជីក្រែង កាលពីថ្ងៃទី ២៥ ឧសភា។ រូបថត ហ្វេសប៊ុក
សៀមរាបៈ ឈើចម្រុះប្រភេទ ចំនួន ១៦៥ ដុំ មានប្រវែងសរុប ៣,៥ ម៉ែត្រគុប ត្រូវបានមន្ត្រីបរិស្ថាននៃការិយាល័យដែនជម្រកសត្វព្រៃបឹងពែរ ភ្នំត្នោត ភ្នំពក បង្ក្រាបចាប់រឹបអូសពីក្នុងព្រៃក្រោយផ្ទះប្រជាពលរដ្ឋក្នុងភូមិអូរខ្វាវ ឃុំខ្វាវ ស្រុកជីក្រែង ខេត្តសៀមរាប។
លោក ពី ប៊ុនចង អនុប្រធានការិយាល័យ ដែនជម្រកសត្វព្រៃបឹងពែរ ភ្នំពក ភ្នំត្នោត បានប្រាប់ ភ្នំពេញ ប៉ុស្តិ៍ នៅព្រឹកថ្ងៃទី ២៦ ខែសីហា ថា ឈើទាំងនោះ ត្រូវបានកម្លាំងមន្ត្រីឧទ្យានុរក្ស ស្នាក់ការបរិស្ថានស្រោង នៃតំបន់ដែនជម្រកសត្វព្រៃបឹងពែរ រកឃើញកាលពីព្រឹកថ្ងៃទី ២៥ ខែ សីហា ឆ្នាំ ២០២១ នៅចំណុចតំបន់អូរខ្វាវ ស្ថិតក្នុងភូមិសាស្ត្រឃុំខ្វាវ ស្រុកជីក្រែង ខេត្តសៀមរាប។
លោកថ្លែងថា៖«ឈើទាំងនោះភាគច្រើនជាប្រភេទឈើសុក្រម ផ្ចឹក និងស្ដៅ។ វាត្រូវបានគេអារច្រៀកជាប្រភេទកូនក្រឡឹងតូចៗ មានចំនួនសរុប ១៦៥ ដុំ ស្មើ ៣,៥ ម៉ែត្រគុប។ បច្ចុប្បន្នឈើទាំងនោះ ត្រូវបានមន្ត្រីយើងដឹកមករក្សាទុកនៅស្នាក់ការដែនជម្រកសត្វព្រៃបឹងពែរ ដើម្បីរង់ចាំម្ចាស់ឈើចូលខ្លួនដោះស្រាយតាមនីតិវីធីច្បាប់»។
បើតាមលោក ស៊ុន គង់ ប្រធានមន្ទីរបរិស្ថានខេត្តសៀមរាប នៅក្នុងករណីមិនឃើញមាននរណាម្នាក់ ចេញមុខមកអះអាងជាម្ចាស់ឈើទេនោះ សមត្ថកិច្ចជំនាញ នឹងកសាងសំណុំរឿងបញ្ជូនទៅតុលាការ ដោយចាត់ទុកឈើទាំងនេះ ជាឈើអញ្ញតជន និងស្នើសុំគោលការណ៍ពីតុលាការ រឹបអូសទុកជាសម្បត្តិរដ្ឋ។
យ៉ាងណាក៏ដោយ មន្ត្រីនគរបាលមូលដ្ឋានម្នាក់ បានប្រាប់ ភ្នំពេញ ប៉ុស្តិ៍ ក្នុងលក្ខខណ្ឌមិនបញ្ចេញឈ្មោះថា ឈើនោះគឺជារបស់បុរម្នាក់ឈ្មោះ ម៉ាប់ នៅក្រុងសៀមរាប និងជាបុគ្គលិកអង្គភាពសារព័ត៌មាន Online មួយនៅក្នុងខេត្តនេះ។
ឈើទាំងនោះ គាត់បានទិញពីអ្នកភូមិ ដើម្បីយកទៅលក់បន្ត នៅតាមទីតាំងកែច្នៃឈើធ្វើគ្រឿងសង្ហារឹម នៅក្នុងក្រុងសៀមរាប និង នៅរាជធានីភ្នំពេញ។
មន្ត្រីនគរបាលមូលដ្ឋានរូបនោះ បានបញ្ជាក់ថា៖ «ខ្ញុំមិនដឹងថា គាត់ឈ្មោះអ្វី ឲ្យពិតប្រាកដទេ តែអ្នកភូមិដែលធ្លាប់លក់ឈើឲ្យគាត់ហៅគាត់ថា តាម៉ាប់ៗ និងថាគាត់ជាអ្នកសារព័ត៌មានផងដែរ។ គាត់ទិញឈើគ្រប់ប្រភេទ លើកលែងតែឈើគ្រញូង ប៉ុន្តែឈើដែលគាត់ទិញ ពីអ្នកភូមិក្នុងឃុំខ្វាវ គឺជាឈើអត់ច្បាប់ទាំងអស់ហ្នឹង»៕
