ភ្នំពេញៈ បុរសសង្ស័យម្នាក់ដែលនគរបាលប្រឆាំងគ្រឿងញៀនចាប់ខ្លួន កាលពីថ្ងៃទី ២៣ សីហា នៅភូមិកំរៀង សង្កាត់ព្រៃវែង ខណ្ឌដង្កោត្រូវបានបញ្ជូនទៅតុលាការរាជធានីភ្នំពេញនៅថ្ងៃទី ២៦ សីហា ពាក់ព័ន្ធនឹងករណីជួញដូរគ្រឿងញៀនមេតំហ្វេតាមីនជាង ២ គីឡូក្រាម។
លោក អ៊ិន សុង នាយករងមន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិប្រាប់ ភ្នំពេញ ប៉ុស្តិ៍ នៅថ្ងៃទី ២៦ សីហាថា បុរសសង្ស័យឈ្មោះមិល ពៅ អាយុ ៣១ ឆ្នាំ ត្រូវបានមន្រ្តីជំនាញនៃមន្ទីរប្រឆាំងគ្រឿងញៀនកសាងសំណុំរឿងបញ្ជូនទៅសាលាដំបូងរាជធានីភ្នំពេញនៅថ្ងៃទី ២៦ សីហា។
លោកថ្លែងថា៖ «ជនសង្ស័យម្នាក់នេះយើងបានបំពេញនីតិវិធីតាមជំនាញរបស់យើងហើយ។ យើងត្រូវបន្តសាកសួរនៅតុលាការទៀត»។
លោកឱ្យដឹងថា ការបង្ក្រាបជនសង្ស័យខាងលើ សមត្ថកិច្ចបានធ្វើឡើងនៅថ្ងៃទី ២៣ ខែ សីហា ឆ្នាំ ២០២១ នៅភូមិកំរៀងសង្កាត់ព្រៃវែង ខណ្ឌដង្កោ រាជធានីភ្នំពេញ។ ការចុះបង្ក្រាបនេះដឹកនាំ ដោយលោកយឹម សែនឧត្តម នាយករងមន្ទីរប្រឆាំងគ្រឿងញៀនក១០។
បើតាមលោក អ៊ិន សុង ប្រតិបត្តិការនេះក៏មានការចូលរួមពីស្នងការដ្ឋាននគរបាលរាជធានីភ្នំពេញ និងសម្របសម្រួលផ្លូវច្បាប់ពីអយ្យការអមសាលាដំបូងរាជធានីភ្នំពេញផងដែរ។
លោកប្រាប់ថា៖ «ការងារនេះមន្រ្តីជំនាញបានធ្វើការស្រាវជ្រាវស៊ើបអង្កេតទៅតាមជំនាញយ៉ាងដិតដល់ មុនឈានទៅបង្ក្រាបបទល្មើសនេះ»។
លោកបន្ថែមថា ចំពោះវត្ថុតាងដែលរឹបអូសបានក្នុងប្រតិបត្តិការនេះ ជាប្រភេទមេតំហ្វេតាមីន (ICE) មានទម្ងន់ ២០៥៤.២១ ក្រាម។ ពាក់ព័ន្ធការចោទប្រកាន់លើជនសង្ស័យពីសំណាក់តំណាងអយ្យការយ៉ាងណានោះ នៅរសៀលថ្ងៃទី ២៦ សីហា ភ្នំពេញ ប៉ុស្តិ៍ មិនទាន់បានទទួលចម្លើយតបពីលោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញនៅឡើយទេ៕