កោះកុងៈ អាជ្ញាធរស្រុកបុទុមសាគរ បានកំណត់អត្តសញ្ញាណ និងកសាងសំណុំរឿងបញ្ជូនទៅតុលាការ ករណីមានមេខ្លោងជួលពលរដ្ឋចំនួន ២៧ គ្រួសារ ទៅសាងសង់ខ្ទម និងធ្វើរបងបន្លាលួសខុសច្បាប់លើដីរបស់រដ្ឋ ស្ថិតនៅតំបន់ឧទ្យានជាតិ បុទុមសាគរ ក្នុងភូមិចម្លងគោ ឃុំថ្មសស្រុកបុទុមសាគរ។
លោកហាក់ ឡេងអភិបាលស្រុកបូទុមសាគរ បានថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ២៦ សីហាថា នៅថ្ងៃទី ២៥ សីហា សមត្ថកិច្ចស្រុកបុទុមសាគរ បានសហការជាមួយមន្ដ្រីនៃមន្ទីរបរិស្ថាន ចុះទៅរុះរើខ្ទមចំនួន ២៧ និងរបងបន្លាលួសមួយចំនួន ដែលប្រជាពលរដ្ឋបានចូលទៅសាងសង់នៅតំបន់ ឧទ្យានជាតិបុទុមសាគរ ក្នុងភូមិចម្លងគោ ឃុំថ្មស។
លោកថ្លែងថា៖«យើងបានចុះរុះរើងខ្ទម និងឱ្យប្រជាពលដ្ឋចំនួន ២៧ គ្រួសារ ធ្វើកិច្ចសន្យាបញ្ឈប់ការចូលទៅរំលោភទន្ទ្រានដីនៅក្នុងតំបន់ការពារបន្តទៀត។ ពលរដ្ឋទាំងនេះ ពួកគាត់ជាពលរដ្ឋរស់នៅក្នុងមូលដ្ឋាននៃស្រុកបុទុមសាគរ គាត់ចូលទៅទន្ទ្រានដីរដ្ឋដោយសារមានមេខ្លោងជួលពួកគាត់។ ពេលនេះយើងកំណត់អន្តសញ្ញាណមេខ្លោងបាន ហើយ កំពុងកសាងសំណុំរឿងបញ្ជូនទៅតុលាការ»។
បើតាមលោក អភិបាលស្រុក ប្រជាពលរដ្ឋទាំង ២៧ គ្រួសារ ដែលចូលទៅទន្ទ្រានដីរដ្ឋខុសច្បាប់នេះ ជាប្រជាពលរដ្ឋក្រីក្រមានផ្ទះសម្បែងដីធ្លីសម្រាប់រស់នៅប្រចាំថ្ងៃរួចហើយ មិនមែនជាពលរដ្ឋក្រីក្រគ្មានផ្ទះរស់នៅនោះទេ។ ប៉ុន្ដែពួកគាត់ត្រូវបានមេខ្យល់ញុះញង់ជួលឱ្យទៅទន្ទ្រានដីរដ្ឋ។
លោកបញ្ជាក់ថា៖«យើងចាប់បានកាលពីយប់ថ្ងៃទី ២៥ ខែសីហា ពួគាត់បានផ្ដិតមេដាយយកលុយចំនួន ១០០ ដុល្លារ ហើយចូលទៅទន្ទ្រានដីរដ្ឋនៅឧទ្យានជាតិ។ យើងកំណត់អត្ដសញ្ញាណមេខ្យល់បានខ្លះហើយ។ មេខ្លោងមានទាំងអ្នកនៅខេត្ដកោះកុង និងអ្នកមកពីខាងក្រៅ»។
លោក វ៉េន សុនីម អនុប្រធានមន្ទីរបរិស្ថានខេត្តកោះកុង ដោយមានការសម្របសម្រួលនីតិវិធីច្បាប់ពីលោកអេង ចាន់ភារ៉ា ព្រះរាជ្ញារង អមសាលាដំបូងខេត្ត នៅថ្ងៃទី ២៥ ខែសីហា បានដឹកនាំក្រុមការងារមន្ត្រីការពារឧទ្យានជាតិ កម្លាំងអាវុធហត្ថខេត្ត ចុះរុះរើខ្ទមចំនួន ២៧ ខ្ទម ដែលបានសាងសង់លើដីឧទ្យានជាតិ អនាធិបតេយ្យ ល្មើសច្បាប់ស្ថិតនៅចំណុចភូមិចម្លងគោ ឃុំថ្មស ស្រុកបូទុមសាគរ។
លោក ហ៊ុន ម៉ារ៉ាឌី អនុប្រធានមន្ទីរបរិស្ថានខេត្ដកោះកុង ថ្លែងនៅថ្ងៃទី ២៥ ខែសីហាថា មន្ដ្រីជំនាញ បានចុះទៅអនុវត្ដច្បាប់រុះរើសំណង់ខ្ទម និងរបងលួស ល្មើសច្បាប់នេះ គឺអនុវត្ដតាមការណែនាំ របស់រដ្ឋបាលខេត្ដ និងក្រោយពីមន្ដ្រីជំនាញ នៃមន្ទីបរិស្ថានបានណែនាំរួចជាច្រើនលើកដល់ប្រជាពលរដ្ឋ។
លោកថ្លែងថា៖ «ដោយសារតែពលរដ្ឋយល់ព្រមរុះរើខ្ទមចេញ មិនរឹងទទឹងជាមួយមន្ដ្រីអនុវត្ដច្បាប់ ដូច្នេះក្រោយការរុះរើយើងបានឱ្យពលរដ្ឋទាំង ២៧ គ្រួសារ ធ្វើកិច្ចសន្យា និងណែនាំដល់ពួកគាត់ ឱ្យបញ្ឈប់សកម្មភាពទន្ទ្រានដីរដ្ឋល្មើសច្បាប់បែបនេះទៀត»។
លោក ហ៊ុន ម៉ារ៉ាឌី បញ្ជាក់ថា ការកាប់ទន្ទ្រានរុករាន ដីរបស់រដ្ឋ នៅក្នុងតំបន់ការពារ ជាអំពើខុសច្បាប់ដ៏ធ្ងន់ធ្ងន ដែលត្រូវប្រឈមចំពោះច្បាប់។
លោកបានអំពានាវដល់ពលរដ្ឋ សូមឱ្យបញ្ឈប់ចូលកាប់ទន្ទ្រានដីរដ្ឋយកធ្វើជាកម្មសិទ្ធិបន្តទៀត នាំឱ្យមានទោសដល់ខ្លួន។
លោក ថោង ច័ន្ទតារា អ្នកសម្របសម្រួលសមាគមការពារសិទ្ធិមនុស្សអាដហុក ប្រចាំខេត្តកោះកុង បានឱ្យដឹងថា ដីធ្លីនៅក្នុងតំបបន់ឧទ្យានជាតិបុទុមសាគរ ក្នុងភូមិសាស្ដ្រ ភូមិចម្លងគោ ឃុំថ្មស គឺកើតមានការកាប់ទន្ទ្រាន រុករានជាយូរឆ្នាំមកហើយ ប៉ុន្ដែអាជ្ញាធរ មិនទាន់ឃាត់ខ្លួនជនល្មើសណាម្នាក់យកមកផ្ដន្ទាទោសតាមច្បាប់បាននៅឡើយទេ។
លោកថ្លែងថា៖«ការទន្ទ្រានដីរដ្ឋនៅក្នុងមូលដ្ឋាននៅតែបន្តកើតមានឡើងបែបនេះ ប្រហែលជាមានការត្រូវរូវគ្នារវាងជនល្មើស និងអាជ្ញាធរមូលដ្ឋាន ភូមិ ឃុំ។ ភាគច្រើនអ្នកមានលុយនៅតំបន់ថ្មស គេវាទទីយកដីដោយជួលពលរដ្ឋទៅធ្វើខ្ទម ធ្វើរបងដាំដំណាំនៅលើដីរបស់ពួកគេ»។
ប៉ុន្តែ លោកហាក់ ឡេង បញ្ជាក់ថា ករណីការទន្ទ្រាន រុករានយកដីរដ្ឋ នៅតំបន់ការពារនេះ អ្នកដែលចាំតែនិយាយ មិនអាចដឹងរឿងដូចអាជ្ញាធរដែលចុះបង្ក្រាប និងឃើញផ្ទាល់នោះទេ។ ករណីទន្ទ្រានដីធ្លីនេះ គឺត្រូវស្រាវស្រាវច្បាស់លាស់ទើបដឹងថា បុគ្គលល្មើសនៅពីក្រោយខ្នងជាអ្នកណា។
លោកបញ្ជាក់ថា៖ «ខ្ញុំក្នុងនាមអាជ្ញាធរ គឺត្រូវតែអនុវត្ដតាមច្បាប់ លើបទល្មើសទន្ទ្រានកាន់កាប់លើដីរដ្ឋនេះ។ អ្នកខ្លះ ចាំតែមើល ចាំតែនិយាយ ថាអាជ្ញាធរមិនអនុវត្ដច្បាប់ អាជ្ញាធរឃុបឃិត។ ប៉ុន្ដែតើមានដឹងទេថា ដីព្រៃរបស់រដ្ឋមានរាប់ម៉ឺនហិតា ក្នុងខេត្ដកោះកុង ហើយមន្ដ្រីឧទ្យានុរក្សមានតែ ១០ នាក់ អ្នកណាមើលអស់»។
លោកបន្តថា៖ «សកម្មភាពទន្ទ្រានដីរដ្ឋនេះ កើតឡើងស្ទើគ្រប់កន្លែង ដូច្នេះអាជ្ញាធរមើលមិនសព្វលើករណីខ្លះ។ ប៉ុន្ដែបើអ្នកដែលឃើញបទល្មើសនោះ បើប្រាប់មកអាជ្ញាធរ ហើយអាជ្ញាធរមិនបានចុះទៅអនុវត្ដបង្ក្រាប នោះទើបជាករណីឃុបឃិត។ បើគ្រាន់តែយើងទទួលបានព័ត៌មានភ្លាម យើងចុះទៅបង្ក្រាបភ្លាម បែរមកចោទថា ជាករណីឃុបឃិត វាមិនត្រឹមត្រូវទេ វាជារឿងបុគ្គលហើយ»៕
វីដេអូ៖