.jpg)
លោក លី ធុជ ក្នុងកិច្ចប្រជុំតាមអនឡាញជាមួយម្ចាស់ជំនួយ។ រូបថត CMAA
ភ្នំពេញៈ អាជ្ញាធរមីននៃរាជរដ្ឋាភិបាលកម្ពុជាបានអំពាវនាវដល់ប្រទេសជាមិត្ត និងសហគមន៍ផ្តល់ជំនួយបន្តចូលរួមជាមួយរាជរដ្ឋាភិបាលបោសសម្អាតមីន ដើម្បីអភិវឌ្ឍ និងកាត់បន្ថយគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមនៅកម្ពុជាឱ្យអស់ក្នុងឆ្នាំ ២០២៥។
យោងតាម លោក លី ធុជ អនុប្រធានទី ១ អាជ្ញាធរមីន ថ្លែងនៅក្នុងកិច្ចប្រជុំក្រុមការងារបច្ចេកទេសចម្រុះរាជរដ្ឋាភិបាលដៃគូអភិវឌ្ឍន៍លើវិស័យមីន ដើម្បីផ្សព្វផ្សាយអំពីសមិទ្ធផលការងារសម្រេចបានក្នុងការអនុវត្តផែនការសកម្មភាព ៣ ឆ្នាំ ២០១៨-២០២០ កន្លងមក តាមរយៈប្រព័ន្ធវីដេអូ។
កិច្ចប្រជុំនេះមានការចូលរួមពីភ្នាក់ងារអន្តរជាតិ តំណាងដៃគូអភិវឌ្ឍន៍ ក្រសួង/ស្ថាប័នពាក់ព័ន្ធ តំណាងអង្គទូត ប្រចាំនៅកម្ពុជា និងប្រតិបត្តិករបោសសម្អាតមីនជាតិ-អន្តរជាតិ ព្រមទាំងគណៈកម្មាធិការសកម្មភាពមីនរាជធានី-ខេត្ត ផងដែរ។
លោក បានឱ្យដឹងថា សមិទ្ធផលការងារសម្រេចបានក្នុងការអនុវត្តផែនការសកម្មភាព ៣ ឆ្នាំ ២០១៨-២០២០ កន្លងមក កម្ពុជាបានរំដោះផ្ទៃដីចំនួន ៤២១ គីឡូម៉ែត្រក្រឡា ស្មើនឹង ៦៦% នៃផែនការ ៣ ឆ្នាំ។ ក្នុងនោះរកឃើញ និងកម្ទេចគ្រាប់មីនប្រឆាំងមនុស្សចំនួន ៤៩ ២៥៦ គ្រាប់ មីនប្រឆាំងរថក្រោះចំនួន ៩៥៦ គ្រាប់ និងសំណល់ជាតិផ្ទុះពីសង្គ្រាមចំនួន ២២១ ៣៧២ គ្រាប់ ព្រមទាំងមានអ្នកទទួលផលចំនួនប្រមាណ ២ លាននាក់។ ក្នុងនោះក៏មានប្រជាពលរដ្ឋចំនួន ២ ៨៤០ ៦១២ នាក់បានទទួលសារអប់រំអំពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមផងដែរ។
លោក លី ធុជ ថ្លែងថា៖ «ខ្ញុំក៏អំពាវនាវឱ្យប្រទេសជាមិត្ត និងសហគមន៍ផ្តល់ជំនួយបន្តចូលរួមជាមួយរាជរដ្ឋាភិបាលកម្ពុជាក្នុងកិច្ចខិតខំប្រឹងប្រែងបោសសម្អាតមីន ដើម្បីអភិវឌ្ឍ និងកាត់បន្ថយគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមនៅកម្ពុជា ព្រមទាំងចូលរួមកម្ទេចគ្រាប់មីនឱ្យអស់ពីទឹកដីកម្ពុជាត្រឹមឆ្នាំ ២០២៥ ខាងមុខ»។
លោកបានបន្តថា ការចូលរួមដ៏សប្បុរសនេះ គឺជាការបង្ហាញនូវសមិទ្ធផលដ៏គួរឱ្យកត់សម្គាល់ ដែលបានមកពីការរួមចំណែកក្នុងការធ្វើឱ្យមានការផ្លាស់ប្តូរចំពោះសុខសុវត្ថិភាព សន្តិសុខ និងការរស់នៅរបស់ប្រជាជនកម្ពុជា ដែលងាយរងគ្រោះ និងកំពុងរស់នៅក្នុងសហគមន៍ដែលរងផលប៉ះពាល់ដោយមីន។
លោកថ្លែងថា ការកៀរគរធនធានគាំទ្រការអនុវត្តផែនការសកម្មភាព ៣ ឆ្នាំ បន្ត ២០២១-២០២៣ ដែលបញ្ហាទាំងនេះ ពិតជាមានសារៈសំខាន់ក្នុងការឆ្លើយតបទៅនឹងការអនុវត្តផែនការយុទ្ធសាស្ត្រជាតិសកម្មភាពមីន ២០១៨-២០២៥ ក៏ដូចជាឆ្លើយតបទៅនឹងការគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាម ដែលនៅតែបន្តកើតមានឡើងក្នុងអត្រាខ្ពស់។
គិតត្រឹមរយៈពេលប្រមាណ ៧ ខែ ក្នុងឆ្នាំ ២០២១ នេះ មានជនរងគ្រោះចំនួន ៣២ នាក់។ លោកបានបញ្ជាក់ថា ឆ្នាំ ២០២០ វិស័យសកម្មភាពមីននៅកម្ពុជា បានឈានដល់ចំណុចរបត់មួយបញ្ចប់នៃផែនការអនុវត្ត ៣ ឆ្នាំ ២០១៨-២០២០ ក្នុងពេលជាមួយគ្នា ដែលប្រទេសកម្ពុជា ក៏កំពុងរងគ្រោះដោយជំងឺរាតត្បាតសកលកូវីដ ១៩ និងបានរារាំងដល់កំណើនសេដ្ឋកិច្ចរបស់ប្រទេសកម្ពុជា។
លោក លី ធុជ បានថ្លែងអំណរគុណដល់ប្រទេសជាមិត្ត និងសហគមន៍ម្ចាស់ជំនួយរួមមាន សហរដ្ឋអាមេរិក ជប៉ុន ចិន អង់គ្លេស អូស្ត្រាលី អាល្លឺម៉ង់ នូវែលសេឡង់ សាធារណរដ្ខកូរ៉េ កាណាដា ស្វ៊ីស ន័រវែស ឥណ្ឌា បារាំង អៀរឡង់ បែលហ្ស៊ិក អូទ្រីស អេស្ប៉ាញ ស៊ុយអែត ហុងគ្រី UNDP និង UNICEF ព្រមទាំងមូលនិធិ អង្គការសង្គមស៊ីវិល និងសប្បុរសជន ដែលតែងតែគាំទ្រដល់វិស័យសកម្មភាពមីននៅកម្ពុជា។
លោក Rho Hyun Jun តំណាង KOICA នៅកម្ពុជាបានថ្លែងថា ប្រទេសកូរ៉េ មានប្រវតិ្តសាស្ត្រស្រដៀងគ្នាទៅនឹងប្រទេសកម្ពុជា ដោយសារតែមានមីននៅតាមព្រំដែនកូរ៉េខាងត្បូង និងកូរ៉េខាងជើងផងដែរ។ នេះជាសមិទ្ធផលដ៏សំខាន់មួយនៃវិស័យមីនសម្រាប់ជាឯកសារមានតម្លៃមួយដើរតួជាឯកសារយោងណែនាំដល់ដៃគូអភិវឌ្ឍន៍ទាំងអស់ តាមប្រទេសកម្ពុជាជាប្រទេសគ្មានមីនហើយជាកន្លែងអភិវឌ្ឍសង្គមសេដ្ឋកិច្ច និងសង្គមមនុស្សឱ្យមានការរីកចម្រើន។
លោកថ្លែងថា៖ «យើងចង់សម្រេចទៅដល់គោលដៅនេះ ហើយនៅតែប្ដេជ្ញាគាំទ្រ អាជ្ញាធរមីន ដើម្បីសម្រេចតាមផែនការ។ KOICA ប្តេជ្ញាគាំទ្រ យុទ្ធសាស្ត្រគ្មានមីនរបស់កម្ពុជា រួមទាំងការផ្តល់ថវិកា ដើម្បីកម្ចាត់មីន ការពង្រឹងសមត្ថភាព ការគាំទ្រជនរងគ្រោះ និងការលើកកម្ពស់ការយល់ដឹងអំពីបញ្ហាមីន ដើម្បីធ្វើឱ្យកម្ពុជាក្លាយជាប្រទេសគ្មានមីននៅត្រឹមឆ្នាំ ២០២៥»។
លោក ANATOLY BOROVIK ឯកអគ្គរដ្ឋទូតរុស្ស៊ីប្រចាំកម្ពុជាសាទរចំពោះសមិទ្ធផលដែលសម្រេចបានក្នុងវិស័យមីននៅកម្ពុជានេះ ដោយចាត់ទុកថា ភាពជោគជ័យនេះបង្ហាញពីការខិតខំប្រឹងប្រែងរបស់រាជរដ្ឋាភិបាលក្នុងការធ្វើឱ្យប្រសើរឡើងសុវត្ថិភាពរបស់ប្រជាជនកម្ពុជា។
លោកថ្លែងថា៖ «កិច្ចខិតខំប្រឹងប្រែងរបស់រាជរដ្ឋាភិបាល និងស្ថាប័នពាក់ព័ន្ធទាំងអស់ក្នុងការធានាបាននូវការបោសសម្អាតមីន ក៏ដូចជាជូនពរឱ្យសម្រេចបាននូវចក្ខុវិស័យនៃយុទ្ធសាស្ត្រជាតិសកម្មភាពមីន ២០១៨-២០២៥ ដើម្បីកម្ពុជាគ្មានមីន និងសម្រេចបានការអភិវឌ្ឍសេដ្ឋកិច្ចសង្គមប្រកបដោយសុវត្ថិភាព និងជឿជាក់ថា ទំនាក់ទំនងជិតស្និទ្ធជាងមុនដែលបានបង្កើតឡើងជាមួយទីភ្នាក់ងាររុស្ស៊ីពាក់ព័ន្ធនឹងសកម្មភាពកម្ចាត់មីនរួមទាំងមជ្ឈមណ្ឌលសកម្មភាពកំចាត់មីនអន្តរជាតិនៃកងកម្លាំងប្រដាប់អាវុធនៃសហព័ន្ធរុស្ស៊ី»៕
