កណ្តាលៈ ស្ត្រីម្នាក់ត្រូវបានកម្លាំងការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្ដាលបញ្ជូនទៅតុលាការ នៅថ្ងៃទី ២៦ សីហា បន្ទាប់ពីបានចាប់ឃាត់ខ្លួនពាក់ព័ន្ធបទល្មើសចាប់បង្ខាំងក្មេងស្រីវ័យ ១១ ឆ្នាំម្នាក់ ដើម្បីកំហែងយកប្រាក់ពីក្រុមគ្រួសារក្មេងស្រីរងគ្រោះ។
លោក ឡាក់ ម៉េងធី ប្រធានការិយាល័យនគរបាលព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកណ្ដាលបានប្រាប់ភ្នំពេញប៉ុស្តិ៍នៅថ្ងៃទី ២៦ សីហាថា ស្ត្រីសង្ស័យឈ្មោះ ហេង ស្រីវី អាយុ ១៩ ឆ្នាំ មានលំនៅភូមិ-ឃុំខ្ពបអាទាវ ស្រុកលើកដែក ខេត្តកណ្ដាលត្រូវបានកម្លាំងនគរបាលជំនាញចាប់ឃាត់ខ្លួន នៅថ្ងៃទី ២៥ សីហា បន្ទាប់ពីនាងបានធ្វើសកម្មភាពចាប់បង្ខាំងកុមារី អាយុ ១១ ឆ្នាំម្នាក់ ឈ្មោះ ផេង ស្រីលាភ ដើម្បីកំហែងយកប្រាក់ចំនួន ១ ៥០០ ដុល្លារពីបុរសម្នាក់ឈ្មោះ រិ រី អាយុ ៣៣ ឆ្នាំ ជាឪពុកមារបស់កុមារីរងគ្រោះ។
លោក ម៉េងធី បានបញ្ជាក់ថា៖ «បើតាមចម្លើយសារភាពរបស់ស្ត្រីសង្ស័យ ករណីបង្ខាំងក្មេងស្រីដើម្បីកំហែងយកប្រាក់នេះគឺមានជាប់ពាក់ព័ន្ធនឹងបុរសម្នាក់ទៀត ឈ្មោះ ហេង សាទី មានលំនៅភូមិ-សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។ បច្ចុប្បន្ន កម្លាំងនគរបាលជំនាញកំពុងបន្តស្វែងរកចាប់ខ្លួន ដើម្បីចាត់វិធានការតាមនីតិវិធីច្បាប់»។
បើតាមលោក ម៉េងធី ស្ត្រីសង្ស័យត្រូវបានក្រុមមន្ត្រីនគរបាលជំនាញកសាងសំណុំរឿងចោទប្រកាន់ក្នុងបទល្មើស «កំហែងយកប្រាក់មានស្ថានទម្ងន់ទោស» និងត្រូវបានបញ្ជូនទៅតុលាការនៅថ្ងៃទី ២៦ សីហា។
យោងតាមកំណត់ហេតុរបស់នគរបាលនៅព្រឹកថ្ងៃទី ២៦ សីហា ស្ត្រីសង្ស័យឈ្មោះ ហេង ស្រីវី និងម្ដាយកុមារីរងគ្រោះ ផេង ស្រីលាភ គឺអ្នកស្រី រិ រួន បានរាប់អានធ្វើជាបងប្អូនធម៌នឹងគ្នារយៈពេលជាង ២ ឆ្នាំមកហើយ។ ពួកគេគឺជាកម្មករក្នុងការដ្ឋានសំណង់មួយ ដែលមានទីតាំងក្នុងសង្កាត់ព្រែកឯង ខណ្ឌច្បារអំពៅ។
កាលពីថ្ងៃទី ២១ ខែសីហា លោក រិ រី ដែលជាប្អូនប្រុសរបស់អ្នកស្រី រួន បាននាំក្មួយស្រីឈ្មោះ ផេង ស្រីលាភ [កុមារីរងគ្រោះ] ទៅលេងផ្ទះយាយតានៅឯស្រុកកំណើតក្នុងភូមិបាក់ដាវលើ ឃុំបាក់ដាវ ស្រុកខ្សាច់កណ្តាល ហើយស្ត្រីសង្ស័យក៏តាមទៅជាមួយ។
ស្ត្រីសង្ស័យបានដេកស្នាក់នៅផ្ទះឪពុកម្ដាយរបស់លោក រី ជាមួយនឹងស្រីលាភ អស់រយៈពេល ៣ ថ្ងៃក្នុងអំឡុងពេលនោះនាងបានប្រើល្បិចខ្ចីទូរស័ព្ទរបស់លោក រី ប្រើទាក់ទងទៅបុរសម្នាក់ឈ្មោះ ហេង សាទី ដើម្បីសហការបោកយកម៉ូតូម៉ាក Dream ១២៥ សេរីថ្មីរបស់លោក រី។
ដោយគិតថា ជាមនុស្សរាប់អានគ្នា លោក រី ក៏ព្រមឱ្យនាងខ្ចីប្រើប្រាស់ជាបណ្ដោះអាសន្ន។ លុះដល់ព្រឹកថ្ងៃទី ២៤ សីហា បុរសឈ្មោះ ហេង សាទី បានធ្វើពុតជាទូរស័ព្ទមកប្រាប់ថា ម្ដាយនាងចង់ផ្ញើលុយ ៥០ ដុល្លារឱ្យនាងតាមរយៈប្រព័ន្ធវីងវេលុយ។ លោក រី ដែលមិនដឹងពីល្បិចកលនេះក៏ព្រមឱ្យនាងខ្ចីម៉ូតូរបស់ខ្លួនទៅដកលុយ ដោយបានឱ្យក្មួយស្រីរបស់ខ្លួនទៅជាមួយគ្រាន់បានជាគ្នាផងដែរ។
កំណត់ហេតុរបស់នគរបាលបានដកស្រង់សម្ដីរបស់លោក រី មកបញ្ជាក់ថា៖ «ខ្ញុំភ័យណាស់ នៅពេលក្មួយស្រីខ្ញុំប្រាប់ថា នាងនៅក្នុងផ្ទះសំណាក់មួយនៅអ្នកលឿងហើយស្ត្រីសង្ស័យបានប្រាប់ខ្ញុំឱ្យ ផ្ញើលុយ ១ ៥០០ ដុល្លារឱ្យនាង ដើម្បីលោះយកក្មួយស្រី និងម៉ូតូត្រឡប់ទៅវិញ»។
ពេលនោះ លោក រី ក៏បានទូរស័ព្ទប្ដឹងសមត្ថកិច្ចឱ្យជួយអន្តរាគមន៍ស្រាវជ្រាវ និងស្វែងរកចាប់ខ្លួនស្ត្រីសង្ស័យ។
មិនយូរប៉ុន្មាន នៅរសៀលថ្ងៃទី ២៥ ខែ សីហា ឆ្នាំ ២០២១ ក្រុមសមត្ថកិច្ចបានចាប់ស្ត្រីសង្ស័យបាននៅចំណុចក្បែរផ្ទះសំណាក់ភ្នំមាស ក្នុងសង្កាត់ព្រែកឯង ខណ្ឌច្បារអំពៅ និងបានឈានទៅរំដោះកុមារីរងគ្រោះពីផ្ទះសំណាក់មួយដែលនាងបានបង្ខាំងទុក រួចហើយទៅយកម៉ូតូដែលនាងបានបញ្ចាំ។ ប៉ុន្តែទូរស័ព្ទដៃដែលនាងខ្ចីប្រើនោះ រកមិនឃើញទេ ទំនងជាត្រូវបុរសសង្ស័យឈ្មោះ សាទី យកទៅបាត់៕