.jpg)
វ៉ាក់សាំងចិនប្រភេទស៊ីណូហ្វាម និងវ៉ាក់សាំងប្រភេទ COVISHIELD។ ហុង មិនា
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានអំពាវនាវទៅដល់ប្រជាពលរដ្ឋទាំងអស់មិនត្រូវរើសអើងប្រភេទវ៉ាក់សាំងកូវីដ ១៩ នោះទេ ដោយសារវ៉ាក់សាំងដែលផលិតចេញមកនេះមានការសិក្សា និងវាយតម្លៃយ៉ាងត្រឹមត្រូវ។
លោកស្រីបានលើកឡើងដូចនេះនៅក្នុងបទសម្ភាសន៍មួយកាលពីថ្ងៃទី ២៦ ខែសីហា អំពីការចាក់ដូសទី ៣ ឬដូសជំរុញការពារជំងឺកូវីដ ១៩។
លោកស្រី ឱ វណ្ណឌីន បានមានប្រសាសន៍ថា៖ «វ៉ាក់សាំងណាក៏ដោយគឺដូចតែគ្នាទេ ខ្ញុំឃើញបងប្អូនយើងមួយចំនួនហាក់មានការរើសអើងសម្រាប់វ៉ាក់សាំង។ មិនត្រូវធ្វើការរើសអើងសម្រាប់វ៉ាក់សាំងទេ ដោយសារវ៉ាក់សាំងនេះមុននឹងគេផលិតចេញមកគឺមានការសិក្សា ស្រាវជ្រាវ និងវាយតម្លៃត្រឹមត្រូវណាស់ មុននឹងគេដាក់ឱ្យប្រើប្រាស់នៅលើទីផ្សារ»។
អ្នកនាំពាក្យរូបនេះបានបន្ថែមថា ទាក់ទងនឹងវ៉ាក់សាំងនេះដែរ អ្នកជំនាញក៏កំពុងតែធ្វើការពិភាក្សាគ្នាថាតើវ៉ាក់សាំងនេះអាចនឹងឈានដល់ការចាក់ដូសរំឭកដែរឬទេ ប៉ុន្តែសម្រាប់លោកស្រីផ្ទាល់គិតថា វាប្រហែលជាអាចនឹងមានការចាក់ដូសរំឭក ដោយសារអង់ទីគ័រដែលបង្កើតនៅក្នុងខ្លួនមនុស្សមិនអាចនៅបានយូរ ដែលវាជាលទ្ធភាពរបស់វ៉ាក់សាំង និងការឆ្លើយតបរបស់សរីរាង្គរបស់មនុស្សម្នាក់ៗ។
លោកស្រី ឱ វណ្ណឌីន បានបញ្ជាក់ថា៖ «សុំបងប្អូនកុំមានការព្រួយបារម្ភច្រើនពេកលើបញ្ហានេះ ហើយសុំឱ្យអនុវត្តឱ្យបានត្រឹមត្រូវតាមកម្មវិធីនៃការចាក់វ៉ាក់សាំង និងការណែនាំរបស់រាជរដ្ឋាភិបាលរបស់យើង ដោយសារខ្ញុំគិតថាសម្តេចតេជោមានការពិចារណាល្អិតល្អន់ណាស់ ដោយមិនមែនចេះតែសម្រេចចិត្តដោយគ្មានមូលដ្ឋាននោះទេ»។
យោងតាមរបាយការណ៍របស់ក្រសួងសុខាភិបាលបានឱ្យដឹងថា កំណើនអត្រាចាក់វ៉ាក់សាំងកូវីដ ១៩ នៅកម្ពុជា គិតត្រឹមថ្ងៃទី ២៦ ខែសីហា មានចំនួនជាង ៨,៨ លាននាក់ ឬស្មើនឹង ៨៨,៧៤% ធៀបជាមួយចំនួនប្រជាជនគោលដៅ ១០ លាននាក់ និងលើក្រុមមនុស្សអាយុពី ១២ ឆ្នាំ ទៅក្រោម ១៨ ឆ្នាំ មានចំនួនជាង ១,៣ លាននាក់ ឬស្មើ ៦៦,២១% ធៀបជាមួយនឹងប្រជាជនគោលដៅជិត ២ លាននាក់។ សម្រាប់អ្នកដែលបានចាក់វ៉ាក់សាំងកូវីដ ១៩ ដូសទី ៣ មកដល់ពេលនេះមានចំនួនជាង ៥៦ ម៉ឺននាក់ផងដែរ៕
