ភ្នំពេញៈ ក្រសួងអប់រំ យុវជន និងកីឡានឹងចាប់ផ្តើមចាក់វ៉ាក់សាំងកូវីដ ១៩ ប្រភេទ AstraZeneca ដូសជំរុញ ឬដូសទី៣ សម្រាប់មន្ត្រីក្រសួងចាប់ពីឋានៈប្រធាននាយកដ្ឋានចុះរហូតដល់មន្ត្រីជាប់កិច្ចសន្យា នៅមន្ទីរពេទ្យកុមារជាតិ រយៈពេល ៦ ថ្ងៃ ចាប់ពីថ្ងៃទី ៣០ ខែសីហា តទៅ។
យោងតាមសេចក្តីជូនដំណឹងដែលចុះហត្ថលេខាដោយរដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន នៅថ្ងៃទី ២៧ ខែសីហា នេះ បានឱ្យដឹងថា គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) នឹងផ្តល់ការចាក់វ៉ាក់សាំងកូវីដ ១៩ ប្រភេទ AstraZeneca ដូសទី៣ ជូនដល់មន្ត្រីនៃក្រសួងអប់រំនៅមន្ទីរពេទ្យកុមារជាតិ ចាប់ពីថ្ងៃទី ៣០ ខែ សីហា ដល់ថ្ងៃទី ០៤ ខែ កញ្ញា ឆ្នាំ ២០២១ នៅរៀងរាល់ម៉ោងធ្វើការ។
សេចក្តីជូនដំណឹងបានបន្តថា ការចាក់នេះនឹងធ្វើឡើងពេលព្រឹកចាប់ពីម៉ោង ០៨:០០ នាទី ដល់ម៉ោង ១១:០០ នាទី និងពេលរសៀលចាប់ពីម៉ោង ១៤:០០ នាទី ដល់ម៉ោង ១៧:០០ នាទី។
អ្នកដែលត្រូវចាក់ត្រូវយកមកជាមួយនូវឯកសារ រួមមាន បណ្ណចាក់វ៉ាក់សាំងកូវីដ ១៩ បណ្ណសម្គាល់ខ្លួនមន្ត្រីរាជការ ឬបណ្ណសម្គាល់មន្ត្រីជាប់កិច្ចសន្យា និងអត្តសញ្ញាណប័ណ្ណសញ្ជាតិខ្មែរ ឬឯកសារដែលប្រើប្រាស់ក្នុងការចាក់វ៉ាក់សាំងដូសទី៣៕