ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៅថ្ងៃទី ២៨ ខែសីហានេះ ប្រកាសថា មន្ត្រីជំនាញរបស់ខ្លួនរកឃើញដេប៉ូប្រេងឥន្ធនៈចំនួន ២ ទីតាំងនៅខេត្តតាកែវ និង ៦ ទីតាំងនៅភ្នំពេញ នៅតែបន្តប្រកបអាជីវកម្មមិនសុចរិត។
មន្ត្រីជំនាញ សាខា ក.ប.ប. ខេត្តតាកែវ បានចុះត្រួតពិនិត្យបរិមាណ និងតម្លៃលក់រាយប្រេងឥន្ធន: តាមបណ្តាស្ថានីយ និងដេប៉ូ ស្ថិតក្នុងឃុំពុទ្ធសរ និងឃុំក្រាំងធ្នុង ស្រុកបាទី ខេត្តតាកែវ នៅថ្ងៃទី ២៧ ខែសីហា បានរកឃើញថា ថ្លៃលក់រាយរបស់ស្ថានីយ និងដេប៉ូទាំងអស់បានអនុវត្តត្រឹមត្រូវតាមប្រកាសរបស់ក្រសួងពាណិជ្ជកម្ម ដោយឡែកមាន ២ ទីតាំងលក់មិនគ្រប់លីត្រ។ នេះបើតាមហ្វេសប៊ុក “ក.ប.ប” នៅរសៀលថ្ងៃទី ២៨ ខែសីហានេះ។
ហ្វេសប៊ុកនេះបញ្ជាក់ថា មន្ត្រីជំនាញបានរកឃើញដេប៉ូចំនួន ២ ទីតាំង ប្រកបអាជីវកម្មមិនអនុលោមតាមច្បាប់ស្តីពីកិច្ចការពារអ្នកប្រើប្រាស់ និងត្រូវបានចាត់វិធានការពិន័យអន្តរការណ៍លើម្ចាស់អាជីវកម្មទាំង ២ នោះផងដែរ។ ដោយឡែក ដេប៉ូលក់ប្រេងឥន្ធនៈមួយចំនួនក្នុងរាជធានីភ្នំពេញ ក៏នៅតែបន្តប្រកបអាជីវកម្មដោយមិនស្មោះត្រង់ផងដែរ។
នៅថ្ងៃដដែលនោះ មន្ត្រីសាខា ក.ប.ប. រាជធានី ភ្នំពេញ ក៏បានចុះប្រតិបត្តិការត្រួតពិនិត្យអាជីវកម្មប្រេងឥន្ធនៈតាមបណ្តាស្ថានីយ និងដេប៉ូ ក្នុងរាជធានីភ្នំពេញ ដោយរកឃើញមាន៦ទីតាំង នៅតែលក់មិនគ្រប់លីត្រ។
នៅលើហ្វេសប៊ុក “ក.ប.ប” សរសេរថា៖ «មន្ត្រីជំនាញបានរកឃើញដេប៉ូចែកចាយប្រេងឥន្ធន:ចំនួន ៦ ទីតាំងនៅភ្នំពេញ ប្រកបអាជីវកម្មមិនសុចរិត និងបានចាត់វិធានការពិន័យអន្តរការណ៍ ស្របតាមច្បាប់ស្តីពីកិច្ចការពារអ្នកប្រើប្រាស់»៕