.jpg)
សមត្ថកិច្ចខណ្ឌសែនសុខចុះណែនាំម្ចាស់អាហារដ្ឋានដែលលក់ល្មើសនឹងបម្រាមទប់ស្កាត់ការឆ្លងកូវីដ។ រូបថត រដ្ឋបាលខណ្ឌសែនសុខ
ភ្នំពេញៈ គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ (គ.អ.ក) ប្រកាសនៅព្រឹកថ្ងៃទី ២៩ សីហានេះថា សមត្ថកិច្ចបានឃាត់មនុស្សធ្វើការអប់រំ និងពិន័យចំនួន ៥២៦ នាក់ បញ្ជូនទៅតុលាការ ២ នាក់ និងឃាត់យានយន្ត ២៦ គ្រឿង ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាលនៅថ្ងៃទី ២៨ សីហា។
តាមសេចក្តីជូនដំណឹង (គ.អ.ក) នៅព្រឹកថ្ងៃទី ២៩ ខែសីហានេះ បានឲ្យដឹងថា សមត្ថកិច្ចបានឃាត់រថយន្ត ១ គ្រឿង ម៉ូតូ ២៥ គ្រឿង និងឃាត់ខ្លួនមនុស្សធ្វើការអប់រំនិងពិន័យចំនួន ៥២៦ នាក់ បញ្ជូនទៅតុលាការ ២ នាក់ នៅថ្ងៃទី ២៨ ខែសីហា ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ ១៩។
ក្នុងសេចក្តីជូនដំណឹងបានបញ្ជាក់ថា នៅថ្ងៃដដែលនោះ សមត្ថកិច្ចបានអនុវត្តវិធានការច្បាប់ចំនួន ៧៧ ករណី និងផ្សព្វផ្សាយច្បាប់ទៅលើទីតាំងសរុបចំនួន ៨០២ និងពិន័យជាប្រាក់បានចំនួន ៤ ៤០០ ០០០ រៀល៕
