ភ្នំពេញៈ អនុគណៈកម្មការស្រាវជ្រាវជំងឺកូវីដ ១៩ នៃក្រសួងសុខាភិបាល បានឲ្យដឹងថា អាជីវករផ្សារអូឫស្សីចំនួន ៦ នាក់ ត្រូវបានរកឃើញ ឆ្លងជំងឺកូវិដ ១៩ ដែលអាចពាក់ព័ន្ធនឹងវីរុសបំប្លែងថ្មី Delta។
ទំព័រហ្វេសប៊ុករបស់អនុគណៈកម្មការ ស្រាវជ្រាវជំងឺកូវីដ ១៩ បានឲ្យដឹងថា នៅថ្ងៃទី ២៩ សីហា នេះ ក្រុមគ្រូពេទ្យ «សម្ដេចតេជោប្រឆាំងកូវីដ ១៩» បានយកសំណាកអាជីវករ នៅផ្សារអូរឫស្សី ក្នុងសង្កាត់បឹងព្រលឹត ខណ្ឌ៧មករា បន្ទាប់ពីនៅថ្ងៃទី ២១ សីហា មានអ្នកជំងឺ បានចូលក្នុងផ្សារ ដើម្បីទិញនំពងទា និងបន្លែ សម្រាប់សែន។
ស្ថាប័ននេះ បានបញ្ជាក់ថា៖ «លទ្ធផលតេស្តរហ័សលើកទី១ រកឃើញវិជ្ជមានកូវីដ ០៦ នាក់ ក្នុងចំណោមអ្នកធ្វើតេស្ត ៣៣៣ នាក់។ ក្នុងនោះមានអាជីវករលក់បន្លែ និងជាងអ៊ុតសក់)»។
ក្រៅពីរកឃើញលទ្ធផលនេះ អនុគណៈកម្មការបញ្ជាក់ថា ក្រុមគ្រូពេទ្យនៅបន្តរង់ចាំលទ្ធផលវិភាគរកមេរោគកូវីដ ១៩ បំប្លែងថ្មី Delta ដោយសូមឲ្យប្រជាពលរដ្ឋ និងអាជីវករទាំងអស់ ដែលពាក់ព័ន្ធនិងទីតាំងខាងលើ មេត្តាសហការទៅយកសំណាក និងដាក់ខ្លួនដាច់ដោយឡែក រយះពេល ២១ ថ្ងៃ ដើម្បីសុវត្ថិភាពទាំងអស់គ្នា៕