ភ្នំពេញៈ គណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ ១៩ (គ.អ.ក) ប្រកាសនៅព្រឹកថ្ងៃទី ៣០ សីហានេះថា សមត្ថកិច្ចបានឃាត់មនុស្សធ្វើការអប់រំនិងពិន័យចំនួន ៦១៩ នាក់ បញ្ជូនទៅតុលាការ ១ នាក់ និងឃាត់យានយន្ត ២៩៥ គ្រឿង ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាលកាលពីថ្ងៃ ២៩ សីហា។
តាមសេចក្តីជូនដំណឹង (គ.អ.ក) បានឲ្យដឹងថា សមត្ថកិច្ចបានឃាត់រថយន្ត ៦៩ គ្រឿង ម៉ូតូ ២២៦ គ្រឿង និងឃាត់ខ្លួនមនុស្សធ្វើការអប់រំ និងពិន័យចំនួន ៦១៩ នាក់ បញ្ជូនទៅតុលាការ ១ នាក់ នៅថ្ងៃទី ២៩ ខែសីហា ពាក់ព័ន្ធករណីល្មើសវិធានការរដ្ឋបាល និងវិធានការសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ ១៩។
ក្នុងសេចក្តីជូនដំណឹងបានបញ្ជាក់ថា នៅថ្ងៃដដែលនោះ សមត្ថកិច្ចបានអនុវត្តវិធានការច្បាប់ចំនួន ១៨៨ ករណី និងផ្សព្វផ្សាយច្បាប់ទៅលើទីតាំងសរុបចំនួន ៧៦៧ កន្លែង និងពិន័យជាប្រាក់បានចំនួន ៣ ២០០ ០០០ រៀល៕