កណ្តាលៈ បុរសម្នាក់ត្រូវបានតុលាការសម្រេចឃុំខ្លួនក្នុងពន្ធនាគារខេត្តកណ្តាល កាលពីថ្ងៃទី ២៩ សីហា ពាក់ព័ន្ធករណីជួញដូរគ្រឿងញៀន។ នេះបើតាមមន្ត្រីនាំពាក្យសាលាដំបូងខេត្តកណ្តាល។
លោក សូ សារិន អ្នកនាំពាក្យសាលាដំបូងខេត្តកណ្តាលថ្លែងថា ចៅក្រមស៊ើបសួរនៃសាលាដំបូងខេត្តកណ្តាល នៅថ្ងៃទី ២៩ សីហា បានសម្រេចឃុំខ្លួនឈ្មោះ កុសល្យ វាស្នា ក្នុងពន្ធនាគារខេត្តកណ្តាលពាក់ព័ន្ធនឹងករណីជួញដូរគ្រឿងញៀន។
លោកថ្លែងថា៖ «ជននេះត្រូវបានបញ្ជូនទៅឃុំខ្លួននៅពន្ធនាគារ តាមដីកាចាប់ខ្លួនរបស់ចៅក្រមជម្រះហើយ»។
នៅពេលទាក់ទងពីថ្ងៃទី ២៩ សីហា លោក ឈុន ជីឈួន នាយការិយាល័យប្រឆាំងគ្រឿងញៀនខេត្តកណ្តាលថ្លែងថា កម្លាំងសមត្ថកិច្ចគ្រាន់តែធ្វើការស្វែងរកចាប់ខ្លួនតាមដីការបស់តុលាការ មិនបានដឹងចំនួនគ្រឿងញៀនប៉ុន្មានទេ។
ជុំវិញករណីនេះ មិនមានប្រភពណាមួយបញ្ជាក់ឱ្យបានច្បាស់ថា តើបុរសជាប់ចោទរូបនោះពាក់ព័ន្ធនឹងការជួញដូរគ្រឿងញៀនទម្ងន់ប៉ុន្មានគីឡូក្រាមនោះទេ។
លោ អាំ ធូ អធិការនគរបាលស្រុកលើកដែកថ្លែងនៅថ្ងៃទី ២៩ សីហា ថា កម្លាំងសមត្ថកិច្ចបានធ្វើការស្រាវជ្រាវចាប់ខ្លួន ឈ្មោះ កុសល្យ វាស្នា តាមដីកាបង្គាប់ឱ្យចាប់ខ្លួនរបស់ចៅក្រមស៊ើបសួរ និងចៅក្រមជំនុំជម្រះនៃសាលាដំបូងខេត្តកណ្តាល។ លោកថា សមត្ថកិច្ចបានឃាត់ខ្លួនជននោះនៅថ្ងៃទី ២៨ សីហា នៅភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល។
លោកថ្លែងថា៖ «ជននោះជាប់ក្នុងដីកាបង្គាប់ឱ្យចាប់ខ្លួន។ ខ្ញុំតាមប្រមាញ់រហូត គ្រាន់តែថា ពេលដែលគាត់គេចពីសមត្ថកិច្ច គាត់ឆ្លៀតម្តងម្កាលធ្វើសកម្មភាព។ យើងក៏ទទួលបានព័ត៌មានជាបន្តបន្ទាប់ ព្រោះដឹងថា គាត់នៅក្នុងមូលដ្ឋាន រហូតប្រមាញ់បានតែម្តង»។
បើតាមលោក អាំ ធូ ព័ត៌មានដែលសរសេរក្នុងផេចក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលខេត្តកណ្តាល ដែលថាមានការលួចថតនារីងូតទឹក និងគំរាមរំលោភនោះ គឺជាការលើកឡើងរបស់ប្រជាពលរដ្ឋ ដើម្បីឱ្យសមត្ថកិច្ចឆាប់មានចំណាត់ការឱ្យបានទាន់ពេលវេលា។ ព្រោះគាត់បារម្ភខ្លាចកើតមានរឿង ដូចដែលបុគ្គលល្មើសពាក់ព័ន្ធគ្រឿងញៀននោះបានដើរនិយាយ។
លោកថ្លែងថា៖ «ព័ត៌មាននៅក្នុងផេចហ្នឹង គឺប្រជាពលរដ្ឋមានការភ័យខ្លាច ដោយសារគាត់ហ្នឹង [ជនត្រូវចោទ] បាននិយាយសម្តីអីខាងក្រៅដូចថា ជាការចេះតែនិយាយ អ៊ីចឹងទៅ ហើយប្រជាពលរដ្ឋភ័យខ្លាច។ អ៊ីចឹងគាត់ជូនដំណឹងដាក់ចូលក្នុងផេចក្នុងអីអ៊ីចឹងទៅ ដើម្បីឱ្យសមត្ថកិច្ចយើងមានចំណាត់ការ» ។
លោកអធិការនគរបាលស្រុកលើកដែកបញ្ជាក់ថា ជនត្រូវចោទមាន ឈ្មោះ កុសល្យ វាស្នា ហៅ (វាសនា) ភេទប្រុស អាយុ ២៦ ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល។
យោងតាមដីកាបង្គាប់ឱ្យចាប់ខ្លួនលេខ ៥២៤ ចុះថ្ងៃទី ២០ ខែកក្កដា ឆ្នាំ ២០២០ របស់លោក អឿង វណ្ណា ចៅក្រមស៊ើបសួរនៃសាលាដំបូងខេត្តកណ្តាលបានចោទឈ្មោះ កុសល្យ វាស្នា ពីបទជួញដូរដោយខុសច្បាប់នូវសារធាតុញៀននៅភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល កាលពីថ្ងៃទី ១ ខែមិថុនា ឆ្នាំ ២០២០ តាមបញ្ញត្តិមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន។
បន្ថែមលើនោះ តាមដីកាបង្គាប់ឱ្យចាប់ខ្លួនលេខ ៨២៤ ដកបខ ចុះថ្ងៃទី ៥ ខែវិច្ឆិកា ឆ្នាំ ២០២០ របស់លោក ជួន វណ្ណៈ ចៅក្រមជំនុំជម្រះនៃសាលាដំបូងខេត្តកណ្តាលក៏បានចោទជននេះពីបទជួញដូរដោយខុសច្បាប់នូវសារធាតុញៀននៅភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្តាល កាលពីថ្ងៃទី ១ មិថុនា ឆ្នាំ ២០២០ ផងដែរ៕