.jpg)
គ្រូពេទ្យចាក់វ៉ាក់សាំងបង្ការជំងឺដុំពកស្បែកដល់សត្វគោរបស់ប្រជាពលរដ្ឋនៅតាមខេត្ត។ រូបថត ក្រសួងកសិកម្ម
ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទ បានចាប់ផ្ដើមបើកយុទ្ធនាការចាក់វ៉ាក់សាំងបង្ការជំងឺដុំពកលើស្បែកគោ និងក្របី (Lumpy Skin- Disease) ដែលបានឆ្លងចូលមកក្នុងបណ្ដាខេត្តមួយចំនួននៅកម្ពុជា និងបានឆ្លងរាតត្បាតទៅលើសត្វគោក្របីជាង ៣ ម៉ឺនក្បាល។
ទំព័រហ្វេសប៊ុករបស់លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃទី ២៩ សីហាថា ជំងឺឆ្លងនេះបានរីករាលដាលយ៉ាងលឿនពីបណ្តាខេត្តជាប់ព្រំដែនថៃ មកតំបន់ទំនាបកណ្តាលនៃប្រទេសកម្ពុជា ជាពិសេសនៅខេត្តត្បូងឃ្មុំ កំពង់ចាម និងខេត្តព្រៃវែង។ មកទល់ពេលនេះ ជំងឺឆ្លងនេះបានធ្វើឱ្យប៉ះពាល់ និងធ្វើឱ្យសត្វគោឈឺចំនួនជាង ៣០ ០០០ ក្បាលមកហើយ ជាពិសេសបានឆ្លងទៅលើកូនគោដែលបានធ្វើឱ្យសត្វគោងាប់មួយចំនួន និងបានធ្វើឱ្យក្រសួងកសិកម្ម រុក្ខាប្រមាញ់ និងនេសាទមានការព្រួយបារម្ភជាខ្លាំង។
ជាមួយគ្នានេះ លោក វេងសាខុន បានអះអាងទៀតថា៖ «ការរីករាលដាលនៃជំងឺឆ្លងនេះបានរាលដាលយ៉ាងលឿនពីបណ្តាខេត្តជាប់ព្រំដែនថៃដែល ធ្វើក្រសួងមានការព្រួយបារម្ភជាខ្លាំង»។
លោក វេង សាខុន បានឱ្យដឹងកាលពីចុងសប្តាហ៍ថា ក្រសួងមានវ៉ាក់សាំងចំនួន ២ ម៉ឺនដូសនៅក្នុងដៃរួចហើយដោយបានបញ្ជាទិញពីប្រទេសវៀតណាម និង ៤០ ០០០ ដូសទៀតនឹងមកដល់ក្នុងសប្ដាហ៍បន្ទាប់ ក្រោយពីបញ្ជាទិញពីប្រទេសអាហ្វ្រិកខាងត្បូង។
លោកបានរៀបរាប់ថា៖ «វ៉ាក់សាំងនេះបានបង្កលក្ខណៈគ្រប់គ្រាន់សម្រាប់ក្រសួងមានលទ្ធភាពចាប់ផ្តើមបើកយុទ្ធនាការចាក់វ៉ាក់សាំងទប់ស្កាត់ជំងឺដុំពកលើស្បែកគោ និងក្របីដែលបានចេញប្រតិបត្តិការកាលពីថ្ងៃទី ២៨ ខែសីហា ឆ្នាំ ២០២១ នៅខេត្តត្បូងឃ្មុំ។ ដោយឡែកថ្ងៃនេះយើងបាននិងកំពុងបន្តចាក់វ៉ាក់សាំងការពារជំងឺដុំពកលើស្បែកគោនៅក្នុងខេត្តកំពង់ចាមទៀត»។
ជំងឺដុំពកស្បែកគោក្របី គឺជាជំងឺម្យ៉ាងដែលអាចបង្កទៅជាក្រមរ ហើយអាចបង្កទៅជាដំបៅ។ ចំពោះសត្វឈ្មោលអាចបាត់បង់សមត្ថភាពបង្កកំណើត និងមេផើមអាចរលូតកូន ហើយមេរោគនេះអាចឆ្លងពីសត្វ ១ ទៅសត្វ ១ តាមការប៉ះពាល់ផ្ទាល់ ឬពីសត្វទៅសត្វ ដោយប្រយោលតាមភ្នាក់ងារចម្លងផ្សេងៗ។ ជំងឺនេះអាចធ្វើឱ្យសត្វគោក្របីរបស់អ្នកស្រុកមានអត្រាឈឺពី ៥-៤៥ ភាគរយ និងអត្រាងាប់តិចជាង ១០ ភាគរយ។
លោក តាន់ ផានណារ៉ា អគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វ បានប្រាប់ភ្នំពេញប៉ុស្តិ៍នៅថ្ងៃទី ២៩ សីហាថា កម្ពុជានឹងប្រើប្រាស់វ៉ាក់សាំងដែលទទួលបានក្នុងពេលនេះចាក់ស្រោចទៅលើតំបន់ដែលមានការផ្ទុះរាលដាលខ្លាំងនៃជំងឺនេះ ដើម្បីកាត់ផ្តាច់ការចម្លងទៅកាន់សត្វគោ និងក្របីរបស់អ្នកស្រុក។
លោកបានថ្លែងថា៖ «យុទ្ធនាការផ្តល់វ៉ាក់សាំងនេះដែរ យើងអត់មានយកលុយយកកាក់អីពីប្រជាជនទេ។ ដោយសារតែវ៉ាក់សាំង យើងទើបទទួលបាន ២ ម៉ឺនដូស យើងនឹងធ្វើការបែងចែងទៅតាមខេត្តអាស្រ័យស្ថានភាពឆ្លងជាក់ស្តែងនៃជំងឺ។ យើងនឹងពិនិត្យទៅលើជំងឺដែលឆ្លងពីណាទៅណា ហើយយើងនឹងចាក់កាត់ផ្តាច់»។
ទោះយ៉ាងណា លោកថ្លែងថា៖ «យើងនៅមានវ៉ាក់សាំង ដែលស្ថិតក្នុងកម្រិតតិចតួច»។
លោក ថេង សាវឿន ប្រធានសម្ព័ន្ធសហគមន៍កសិករកម្ពុជា (CCFC) បានថ្លែងឱ្យដឹងថា ការផ្តល់វ៉ាក់សាំងឱ្យដល់សត្វចិញ្ចឹមរបស់ប្រជាពលរដ្ឋក្នុងពេលនេះ គឺមានសារៈសំខាន់ណាស់ ព្រោះយុទ្ធនាការផ្តល់វ៉ាក់សាំង គឺអាចកាត់បន្ថយការងាប់ និងឈឺ ដែលជាគ្រឿងសម្រាប់ជួយសម្រាលបន្ទុកប្រជាកសិករខ្មែរ នឹងកាត់បន្ថយការព្រួយបារម្ភរបស់ពលរដ្ឋក្នុងការចិញ្ចឹមសត្វគោ និងក្របីរបស់ពួកគេ។
លោកថ្លែងថា៖ «ខ្ញុំគិតថា បេសកកម្មនេះ គឺជាកាតព្វកិច្ចរបស់អាជ្ញាធរ ដែលគាត់ត្រូវតែឆ្លើយតប ដើម្បីដោះស្រាយបញ្ហាដែលប្រជាពលរដ្ឋកំពុងជួបប្រទះបែបនេះ ហើយវាគឺជារឿងល្អមួយដែលបង្ហាញអំពីសេវាកម្ម និងការទទួលខុសត្រូវ របស់អាជ្ញាធរ ក្នុងការដោះស្រាយបញ្ហាប្រជាពលរដ្ឋទៅតាមវិស័យរបស់ខ្លួននីមួយៗ»។
លោក ថេង សាវឿន បានថ្លែង ដោយរំពឹងថា រដ្ឋាភិបាលនឹងស្វែងរកវ៉ាក់សាំងប្រភេទនេះ ដើម្បីផ្តល់ជូនប្រជាពលរដ្ឋដែលមានសត្វគោ និងក្របីឱ្យបានគ្រប់ៗគ្នាក្នុងពេលឆាប់ៗ ជាពិសេសចំពោះប្រជាកសិករដែលចិញ្ចឹមសត្វគោ និងក្របីសម្រាប់ប្រើប្រាស់ផ្ទាល់ខ្លួន ដើម្បីបញ្ចៀសនូវការខាតបង់ចំពោះប្រជាពលរដ្ឋក្រីក្រ ដែលពឹងផ្អែកទៅលើសត្វ៕
