.jpg)
ក្រុមសមត្ថកិច្ចជំនាញកំពុងគាស់សាកសពពិនិត្យ។ រូបថត នគរបាល
ភ្នំពេញៈ សមត្ថកិច្ចជំនាញកំពុងធ្វើកោសល្យវិច័យ សាកសពមនុស្សប្រុសស្រី ២ នាក់ ដែលត្រូវបានគេបាញ់ចំក្បាល និងម្នាក់ទៀតត្រូវគេវាយក្បាលសម្លាប់ បន្ទាប់ពីគេប្រទះឃើញសពកប់ក្នុងដីនៅវាលស្រែក្នុងភូមិកំរៀង សង្កាត់កន្ទោក ខណ្ឌកំបូល កាលពីព្រឹកថ្ងៃទី ២៧ សីហា។
លោក ឈឹម សាវុទ្ធ អធិការរងទទួលផែនការងារនគរបាលព្រហ្មទណ្ឌនៃអធិការដ្ឋាននគរបាលខណ្ឌកំបូលប្រាប់នៅថ្ងៃទី ២៩ សីហាថា ករណីសាកសពមនុស្សប្រុសស្រីចំនួន ២ នាក់ នៅពេលនេះនគរបាលជំនាញកំពុងយកសាកសពទាំង ២ ទៅធ្វើកោសល្យវិច័យ។
សាកសពទាំង ២ នាក់ ពាក់ព័ន្ធករណីមនុស្សឃាត។ លោកថ្លែងថា៖ «យើងកំពុងស្វែងរកសាច់ញាតិជនរងគ្រោះ ដើម្បីបញ្ជាក់អត្តសញ្ញាណ។ សាកសពនៅសល់តែគ្រោងឆ្អឹងទេ»។ លោក សាវុទ្ធ រៀបរាប់តាមសម្តីអ្នកភូមិថា នៅពេលល្ងាចថ្ងៃទី ២៧ សីហា ឆ្នាំ ២០២១ មានបុរសជាអ្នកភូមិម្នាក់បានដើររកជីកទំពាំងឫស្សីក្នុងព្រៃរបោះ។ ពេលគាត់កំពុងដើរកាត់វាលស្រែក៏ស្រាប់តែប្រទះឃើញលលាដ៍ក្បាលមនុស្សម្នាក់ហើយក៏រាយការណ៍ប្រាប់នគរបាលប៉ុស្តិ៍ រដ្ឋបាលសង្កាត់កន្ទោក ពីហេតុការណ៍នេះ។
បន្ទាប់មក នគរបាលប៉ុស្តិ៍ បានរាយការណ៍ទៅលោក ហង្ស មុនី អធិការខណ្ឌកំបូល។
បន្ទាប់ពីមានការរាយការណ៍មកលោកអធិការបានបញ្ជាឱ្យលោក ឈឹម សាវុទ្ធ ដឹកនាំកម្លាំងចុះដល់កន្លែងដែលឃើញសាកសពនោះភ្លាមៗ។
នៅពេលនោះក្រុមសមត្ថកិច្ចបានធ្វើការគាស់យកបានសាកសពបុរសម្នាក់ ដែលជនដៃដល់កប់ដីជម្រៅមិនដល់កន្លះម៉ែត្រផង។ បន្ទាប់មកដោយមានការសង្ស័យសមត្ថកិច្ចបានតាមជីករកមើលបន្តទៀតប្រមាណជា ១ ទៅ ២ ម៉ែត្រចម្ងាយពីគ្នាក៏ប្រទះឃើញសពស្ត្រីម្នាក់ទៀត។
លោកវេជ្ជបណ្ឌិត នង សុវណ្ណរ័ត្ន ជាគ្រូពេទ្យកោសល្យវិច័យរបស់ក្រសួងសុខាភិបាល បានប្រាប់ ភ្នំពេញ ប៉ុស្តិ៍ នៅថ្ងៃទី ២៩ សីហាថា ករណីនេះ រូបលោករួមនឹងនគរបាលកោសល្យវិច័យ បានចុះធ្វើការងារនេះពេញមួយថ្ងៃទី ២៨ សីហា។ ចំពោះសាកសពទី១ បានរលេះរលួយសាច់អស់ទៅហើយ ប៉ុន្តែនៅ សល់ផ្នែកខ្លះជាប្រដាប់ភេទ បុរស និងសម្គាល់ឆ្អឹងត្រគាក ជាឆ្អឹងត្រគាកមនុស្សប្រុស។ ជនរងគ្រោះមានស្នាមបាញ់ដោយគ្រាប់កាំភ្លើងពីថ្ងាសខាងមុខឆ្លុះដល់ក្បាលខាងក្រោយ។ លោកបន្តថា ជនរងគ្រោះមានអាយុចន្លោះពី ៤៥ ឆ្នាំទៅជិត ៦០ ឆ្នាំ។
ចំពោះសាកសពម្នាក់ទៀតជាស្ត្រី មានអាយុចន្លោះពី ៣៥ ឆ្នាំ ទៅជិត ៤០ ឆ្នាំ។ សាកសពមានសក់វែងហើយត្រូវគេវាយក្បាលព្រោះមានស្នាមប្រេះលលាដ៍ក្បាល ២ កន្លែង។ លោកថា៖ «សាកសពទាំង ២ នាក់អាចត្រូវគេសម្លាប់ចន្លោះពី ៤ ទៅ ៦ ខែមុន។ សាច់នៅសល់តែរលួយអស់ហើយ»៕
វីដេអូ៖
