.jpg)
ជនសង្ស័យក្រោយឃាត់ខ្លួន និងស្នាមរបួសលើកុមារ។ រូបថត ប៉ូលិស
កំពតៈ នគរបាលខេត្ដកំពតគ្រោងបញ្ជូនបុរសម្នាក់ទៅតុលាការនៅថ្ងៃ ៣០ សីហានេះ ក្រោយពីបានឃាត់ខ្លួនពាក់ព័ន្ធនឹងករណីប្រើហិង្សាដោយចេតនាលើអនីតិជនជាកូនចុងអាយុ ៨ ឆ្នាំបង្កឱ្យរបួសធ្ងន់ ប្រព្រឹត្តកាលពីយប់ថ្ងៃទី ២៧ ខែសីហា នៅភូមិអូរច្រនៀង ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។ នេះបើតាមលោក លក ញ៉ាវ ស្នងការរងនគរបាលខេត្ដកំពតពីថ្ងៃទី ២៩ សីហា។
លោក លក ញ៉ាវ ថ្លែងប្រាប់ ភ្នំពេញ ប៉ុស្ដិ៍ថា កាលពីថ្ងៃទី ២៧ សីហា វេលាម៉ោងប្រហែល ២០ មានករណីប្រើហិង្សាលើអនីតិជន (ឪពុកចុងវាយកូនចុង) នៅភូមិខាងលើ។
លោកបានឱ្យដឹងថា ជនរងគ្រោះឈ្មោះ ឃុន សុខហេង ភេទប្រុស អាយុ ៨ ឆ្នាំ មានលំនៅក្នុងភូមិឃុំកើតហេតុ រងរបួសត្រង់ខ្នង និងភ្លៅ ទាំងសងខាង ផ្ទៃមុខខាងស្តាំ ១ កន្លែង។ រីឯជនដៃដល់ឈ្មោះ ខាន់ ខា អាយុ ៣២ ឆ្នាំ មានលំនៅក្នុងភូមិអូរច្រនៀង ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
លោកថា៖ «ឪពុកចុងរូបនេះបានប្រព្រឹត្ដអំពើហិង្សាលើកូនចុងមិនមែនទើបតែលើកទី ១ ទេ កន្លងមកក៏កើតមានឡើងដែរ ប៉ុន្ដែមិនធ្ងន់ធ្ងរដូចលើកនេះ»។
លោក ញ៉ាវ បានឱ្យដឹងថា ករណីនេះកើតឡើងពេលជនដៃដល់ត្រឡប់មកពីធ្វើការរោងចក្រពូចិន ហើយបានឃើញជនរងគ្រោះយករបស់របររបស់ខ្លួនលេង និងហូបបាយម្ហូបមិនទុកឱ្យគាត់ ក៏កើតកំហឹងយកខ្សែភ្លើងវាយលើជនរងគ្រោះតែម្តង។ ក៏ប៉ុន្តែក្រោយកើតហេតុភ្លាមនគរបាលស្រុកបានឃាត់ខ្លួនរួចបញ្ជូនបន្តមកស្នងការដ្ឋាននគរបាលខេត្ត។
លោកបានបញ្ជាក់ថា៖ «ជនបង្កហិង្សាពេលនេះ យើងឃាត់ខ្លួនបណ្ដោះអាសន្ននៅស្នងការដ្ឋាននគរបាលខេត្ដកំពត។ យើងនឹងបញ្ជូនជនបង្កទៅតុលាការនៅព្រឹកស្អែកថ្ងៃទី ៣០ ខែសីហានេះ»។
បើតាមលោក លក ញ៉ាវ សមត្ថកិច្ចបានកសាងសំណុំរឿង ជនបង្កក្នុងករណីហិង្សាដោយចេតនាមានស្ថានទម្ងន់ទោសលើអនីតិជន។ ចំណែកការចោទប្រកាន់បន្តយ៉ាងណាគឺជានីតិវិធីរបស់តុលាការ៕
