ភ្នំពេញៈ មេរោគកូវីដ ១៩ បំប្លែងថ្មីប្រភេទដែលតា (Delta) បានឆ្លងរីករាលដាលដល់ ២៣ រាជធានី-ខេត្ត ហើយបានឆ្លងទៅលើមនុស្សសរុប ជាង ១ ៧០០ ករណី ក្រោយពីវីរុសប្រភេទថ្មីនេះ ឆ្លងចូលមកកម្ពុជាចាប់តាំងពីចុងខែមីនា លើកលែងតែខេត្តក្រចេះនិងខេត្តកែប ដែលមិនមានការឆ្លងវីរុសបំប្លែងថ្មីនេះចូល។
អភិបាលរងខេត្តក្រចេះ លោក ប៉ែន លីណាត បានប្រាប់កាសែត ភ្នំពេញ ប៉ុស្តិ៍ នៅថ្ងៃទី ៣០ ខែសីហាថា វាជាមោទនភាព ដែលមកដល់ពេលនេះ ខេត្តនេះ បានទប់ស្កាត់បាននូវការឆ្លងចូលមេរោគបំប្លែងថ្មីប្រភេទដែលតា ហើយអ្វីដែលសំខាន់ក្នុងការទប់ស្កាត់បាននេះគឺវិធានការអប់រំ និងការចូលរួមពីប្រជាពលរដ្ឋគ្រប់គ្នា។
លោកថ្លែងថា៖ «វិធានការរបស់ខេត្ត គឺយើងសំខាន់ក្រៅពីវិធានការសុខាភិបាល គឺការអប់រំទៅដល់ប្រជាពលរដ្ឋឱ្យមានការប្រុងប្រយ័ត្នខ្ពស់ដោយត្រូវធ្វើការពាក់ម៉ាសជាប្រចាំឱ្យបានត្រឹមត្រូវ និងអនុវត្តចាំបាច់នូវវិធានការ ៣ ការពារ និង ៣ កុំ របស់រាជរដ្ឋាភិបាលផងដែរ»។
លោក ប៉ែន លីណាត បានឱ្យដឹងថា ការអប់រំ ការណែនាំទៅដល់ប្រជាពលរដ្ឋឱ្យមានការប្រុងប្រយ័ត្ន និងពិសេសអាជ្ញាធរនៅតាមមូលដ្ឋានដែលដើរតួនាទីសំខាន់ ក្នុងការតាមដាននិងត្រួតពិនិត្យចំពោះអ្នកចំណូលស្រុកថាតើពួកគាត់មកពីតំបន់ណា ឬមកពីខាងណាដើម្បីអាជ្ញាធរធ្វើចត្តាឡីស័កនិងពិនិត្យសុខភាពរបស់ពួកគាត់ជាប្រចាំ។
លោកថា សម្រាប់អ្នកដែលជាជនចំណាកស្រុក ឬប្រជាពលរដ្ឋដែលមកពីខេត្តផ្សេងចូលមកក្នុងខេត្តក្រចេះ គឺអាជ្ញាធរមានសមត្ថកិច្ចត្រូវតាមដាន និងរក្សាគម្លាតពីក្រុមគ្រួសាររបស់ពួកគាត់់ ដើម្បីចៀសវាងការឆ្លងវីរុសនេះ ដោយសារពេលចូលមកដល់ភ្លាម មិនទាន់ដឹងថាពួកគាត់មានវីរុសដែលតានោះទេ។ នៅតាមច្រកព្រំដែនខេត្តក្រចេះមិនមានការដាក់កម្លាំងសម្រាប់ធ្វើការពិនិត្យសុខភាពទេ។
លោកថ្លែងថា៖ «ខ្ញុំយល់ថា ប្រជាពលរដ្ឋក្នុងខេត្តក្រចេះមានការយល់ច្បាស់ណាស់ពីមេរោគ និងការការពារពីមេរោគកូវីដ ១៩ នេះដែរ ដោយសារការផ្សព្វផ្សាយ និងការអប់រំពីបញ្ហាមេរោគថ្មីមួយនេះគឺមានរយៈប្រមាណជិត ២ ឆ្នាំហើយ ចាប់តាំងពីប្រទេសយើងមានការឆ្លងចូលនូវជំងឺនេះ»។
លោក ប៉ែន លីណាត ក៏បានស្នើសុំទៅដល់ប្រជាពលរដ្ឋទាំងអស់បន្តការប្រុងប្រយ័ត្នទៀត ដើម្បីធ្វើការទប់ស្កាត់ការឆ្លងរាលដាលនូវជំងឺនេះ ពិសេសគឺប្រភេទដែលតា ហើយលោកក៏នឹងបន្តធ្វើការសហការជាមួយនឹងបណ្តាខេត្តជាប់ព្រំដែនជាមួយនឹងខេត្តក្រចេះទៀតក្នុងការទប់ស្កាត់នូវវីរុសកូវីដ ១៩ នេះ។
យោងតាមការប្រកាសរបស់ក្រសួងសុខាភិបាល នៅយប់ថ្ងៃទី ២៨ ខែសីហា បានឱ្យដឹងថា គិតចាប់ពីថ្ងៃទី ៣១ ខែមីនា មកដល់ថ្ងៃទី ២៨ ខែសីហា អ្នកឆ្លងវីរុសកូវីដ ១៩ បំប្លែងថ្មីប្រភេទដែលតានៅក្នុងប្រទេសកម្ពុជា មានចំនួន ១ ៧៥២ នាក់ ដែលភាគច្រើនរកឃើញនៅក្នុងរាជធានីភ្នំពេញ ខេត្តបន្ទាយមានជ័យ ខេត្តឧត្តរមានជ័យ និងខេត្តសៀមរាប ហើយមានតែខេត្ត ២ ប៉ុណ្ណោះ ដែលមិនមានវីរុសនេះឆ្លងចូល។
អ្នកវិជ្ជមានទាំងនោះរួមមាន អ្នកដំណើរតាមជើងហោះហើរ ពលករមកពីប្រទេសថៃ ពីប្រទេសវៀតណាម ប្រជាជនក្នុងសហគមន៍ ក្រុមហ៊ុនឯកជន បុគ្គលិកសុខាភិបាល អាជីវករ មន្រ្តីរាជការ យោធា ពិរុទ្ធជន អ្នកបកប្រែភាសា ជនជាតិបរទេស បុគ្គលិករោងចក្រកាត់ដេរ បុគ្គលិកធនាគារ ដូនជីនៅវត្ត និងសិស្ស។
លោកស្រី លី អៃឡែន តំណាងអង្គការសុខភាពពិភពលោកប្រចាំកម្ពុជា បានសរសេរលើបណ្តាញ Twitter កាលពីថ្ងៃទី ២៩ ខែសីហាថា វីរុសកូវីដ ១៩ បំប្លែងថ្មី វាមានកម្រិតឆ្លងខ្លាំង និងលឿនដែលមេរោគនេះបានកំពុងតែកើតមាននៅក្នុងសហគមន៍ក្នុងប្រទេសកម្ពុជា។
លោកស្រីបានឱ្យដឹងថា៖ «វីរុសបំប្លែងថ្មីប្រភេទដែលតា នៅទីនេះជាមួយយើង ហើយឥឡូវនេះវាពិតជាធ្វើការគំរាមកំហែងខ្លាំង នៅក្នុងប្រទេសកម្ពុជា»៕