ព្រះសីហនុៈ ជនសង្ស័យប្រុស-ស្រី ៣ នាក់ ជាជនជាតិចិន ដែលបានលួចទូរដែកដាក់លុយចំនួន ១១ ម៉ឺនដុល្លារអាមេរិករបស់បុរសជនជាតិចិនដូចគ្នា ដែលប្រព្រឹត្តនៅភូមិ ៣ សង្កាត់ ៤ ក្រុង-ខេត្តព្រះសីហនុ កាលពីថ្ងៃទី ២៥ សីហា នឹងត្រូវបញ្ជូនទៅតុលាការខេត្តនៅថ្ងៃទី ៣១ សីហា។
លោក លី សុខហ៊ី នាយការិយាល័យព្រហ្មទណ្ឌកម្រិតស្រាល នៃស្នងការនគរបាលខេត្តព្រះសីហនុឱ្យ ភ្នំពេញ ប៉ុស្តិ៍ ដឹងនៅរសៀលថ្ងៃទី ៣០ សីហាថា ពាក់ព័ន្ធអំពើចោរកម្មនេះ មានជនសង្ស័យ៣នាក់ ជាជនជាតិចិន។
ក្នុងនោះមានស្ត្រី ២ នាក់ និងបុរសម្នាក់។ ប៉ុន្តែលោកមិនអាចប្រាប់ឈ្មោះរបស់ពួកគេបានទេ ព្រោះពាក់ព័ន្ធនឹងនីតិវិធីរបស់តុលាការ។
លោកបញ្ជាក់ថា៖«ក្រុមជនសង្ស័យទាំង៣នាក់នេះ ខ្ញុំបញ្ជូនទៅតុលាការនៅថ្ងៃស្អែកហើយ(ថ្ងៃទី ៣១ សីហា)»។
លោក លី សុខហ៊ី មិនបានបញ្ជាក់លម្អិត អំពីអង្គហេតុ នៃការឃាត់ខ្លួនជនសង្ស័យទាំង៣នាក់ខាងលើនេះទេខណៈលោក តី វិសាល អធិការនគរបាលក្រុងព្រះសីហនុ ប្រាប់យ៉ាងខ្លីថា រឿងនេះជាសមត្ថកិច្ចរបស់ការិយាល័យព្រហ្មទណ្ឌជាម្ចាស់ករណី ហើយសមត្ថកិច្ច គ្រាន់តែសហការប៉ុណ្ណោះ។
ទោះយ៉ាងណាបើយោងតាមរបាយការណ៍ដែលបានសរសេរ ក្នុងផេកហ្វេសប៊ុករបស់ស្នងការដ្ឋាននគរបាលខេត្តព្រះសីហនុ បានឱ្យដឹងថា ការឃាត់ខ្លួនក្រុមជនសង្ស័យនេះ គឺធ្វើឡើងតាមបណ្តឹងរបស់បុរសជនជាតិចិនម្នាក់។ អំពើចោរកម្មនេះ បានកើតឡើងកាលពីថ្ងៃទី ២៥ ខែ សីហា ឆ្នាំ ២០២១ ហើយជនរងគ្រោះ បានដាក់ពាក្យប្តឹងមកសមត្ថកិច្ចនៅថ្ងៃទី ២៨ ខែ សីហា ឆ្នាំ ២០២១។
នគរបាលបានបង្ហាញតាមការរៀបរាប់របស់ជនរងគ្រោះថា នៅវេលាម៉ោង ៣ ទៀបភ្លឺ មានចោរបានលួចចូលទៅក្នុងបន្ទប់លេខ ៨៧២០ នៃកាស៊ីណូ មានយីហោឈ្មោះ ឆាងឆឹង ស្ថិតនៅ ភូមិ ៣ សង្កាត់ ៤ ក្រុង-ខេត្តព្រះសីហនុ។
ជនសង្ស័យបានធ្វើសកម្មភាពលួចទូរដែក ១ គ្រឿង ហើយគេចខ្លួនបាត់។ នៅក្នុងទូរដែកនោះមានលុយ ១១ ម៉ឺនដុល្លារអាមេរិក និងនាឡិការដៃ ១ គ្រឿង។
នគរបាលបន្តថា បន្ទាប់ពីកម្លាំងនគរបាលព្រហ្មទណ្ឌកម្រិតស្រាល ទទួលបានពាក្យបណ្តឹងពីជនរងគ្រោះមកក៏ធ្វើការស្រាវជ្រាវ រហូតឃាត់ខ្លួនជនសង្ស័យខាងលើបាន នៅវេលាប្រហែលម៉ោង៨យប់ថ្ងៃទី ២៩ សីហា តែម្តង៕