កំពតៈ តំណាងអយ្យការអមសាលាដំបូង ខេត្ដកំពត នៅថ្ងៃទី ៣០ សីហានេះ បានសម្រេច ចោទប្រកាន់បុរសម្នាក់ដែលប្រើហិង្សាលើកូនចុង ដែលជាអនីតិជន បណ្ដាលឱ្យរងរបួសធ្ងន់ កាលពីថ្ងៃទី ២៧ សីហា ពីបទហិង្សាដោយចេតនាមានស្ថានទំងន់ទោស។ នេះបើតាមអ្នកនាំពាក្យអយ្យការអមសាលាដំបូងខេត្ដពត។
កាលពីថ្ងៃទី ២៧ សីហា វេលាម៉ោងប្រហែល ២០ មានករណីហិង្សាដោយចេតនា លើអនីតិជន (ឪពុកចុងវាយកូនចុង) ស្ថិតនៅភូមិអូរច្រនៀង ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
ជនរងគ្រោះឈ្មោះ ឃុន សុខហេង ភេទប្រុស អាយុ ៨ ឆ្នាំ ទីលំនៅភូមិឃុំកើតហេតុខាងលើ រងរបួសខ្នង និងភ្លៅទាំងសងខាង ផ្ទៃមុខខាងស្តាំ ១ កន្លែង។ ចំណែក ជនដៃដល់ឈ្មោះ ខាន់ ខា ភេទប្រុស អាយុ ៣២ ឆ្នាំ ទីលំនៅភូមិអូរច្រនៀង ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
លោក លក ញ៉ាវ ស្នងការរងនៃស្នងការរដ្ឋាននគរបាលខេត្ដកំពត ទទួលបន្ទុកផ្នែកព្រហ្មទណ្ឌ ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ៣០ សីហាថា ក្រោយកើតហេតុ សមត្ថកិច្ចបានចុះអន្តរាគមន៍ឃាត់ខ្លួនជនបង្ករភ្លាមៗ និងបានកសាងសំណុំរឿង បញ្ជូនទៅតុលាការ នៅព្រឹកថ្ងៃទី ៣០ ខែសីហា។
លោក ខា ដែនណា អ្នកនាំពាក្យអយ្យការ អមសាលាដំបូងខេត្ដពត ថ្លែងនៅល្ងាចថ្ងៃទី ៣០ ខែសីហាថា៖ «តំណាងអយ្យការ បានចោទប្រកាន់ពីបទហិង្សាដោយចេតនា មានស្ថានទម្ងន់ទោសទាក់ទងទៅនឹងជនរងគ្រោះតាមមាត្រា ២១៩ នៃក្រមព្រហ្មទណ្ឌ ហើយបានបញ្ជូនសំណុំរឿងទៅចៅក្រមស៊ើបសួររួចហើយ»។
លោក លក ញ៉ាវ បានឱ្យដឹងថា ករណីហិង្សានេះកើតឡើងនៅពេលជនដៃដល់ បានត្រឡប់មកពីធ្វើការរោងចក្រ នៅវេលាម៉ោងប្រហែល២០ ថ្ងៃទី២៧ សីហា។
ជនដៃដល់ បានឃើញកុមាររងគ្រោះ យករបស់របររបស់ខ្លួនមកលេង និងហូបបាយម្ហូបអស់ មិនទុកឱ្យខ្លួនក៏កើតកំហឹងយកខ្សែភ្លើងវាយទៅលើក្មេងរងគ្រោះតែម្តង។
លោកបញ្ជាក់ថា៖«ឪពុកចុងរូបនេះ បានប្រព្រឹត្ដ អំពើហិង្សាមកលើកូនចុង មិនមែនទើបតែលើកទីមួយទេ កន្លងមកក៏កើតមានឡើងដែរ ប៉ុន្ដែមិនធ្ងន់ធ្ងរដូចលើកនេះ»។
តាមក្រមព្រហ្មទណ្ឌ នៃព្រះរាជាណាចក្រកម្ពុជា អំពើហិង្សាដោយចេតនា មានស្ថានទំងន់ទោស ទាក់ទងទៅនឹងជនរងគ្រោះតាមមាត្រា ២១៩ បានចែងថា ជាអំពើហិង្សាដោយចេតនា ត្រូវផ្ដន្ទាទោស ដាក់ពន្ធនាគារពី ២ ឆ្នាំ ទៅ ៥ ឆ្នាំ និងពិន័យជាប្រាក់ ពី ៤ លានរៀល ទៅ ១០ លានរៀល៕