.jpg)
អ្នកគ្រូពេទ្យដែលទទួលមរណភាពដោយសារជំងឺកូវីដ ១៩។ រូបថត ហ្វេសប៊ុក
ភ្នំពេញៈ អ្នកគ្រូពេទ្យ អឹុម ស្រីនិ អាយុ ២៨ ឆ្នាំ ដែលបម្រើការងារនៅមន្ទីរពេទ្យបង្អែកខេត្តព្រះសីហនុ បានស្លាប់បាត់បង់ជីវិតនៅយប់ថ្ងៃទី២៩ ខែសីហា ក្រោយឆ្លងវីរុសកូវីដ ១៩ និងមានជំងឺធ្ងន់ធ្ងរ។ នេះបើយោងតាមលិខិតរំលែកមរណទុក្ខរបស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជា។
លោកបានសរសេរថា៖ «មរណភាពរបស់ កញ្ញា អឹុម ស្រីនិ គឺជាការបាត់បង់នូវបុគ្គលិកសុខាភិបាលមួយរូប ដែលបានលះបង់កម្លាំងកាយ-ចិត្ត ក្នុងការរួមចំណែកថែទាំអ្នកជំងឺកូវីដ ១៩»។
ភ្នំពេញ ប៉ុស្តិ៍ មិនអាចសុំអត្ថាធិប្បាយពីអ្នកនាំពាក្យក្រសួងសុខាភិបាលបានទេនៅថ្ងៃទី ៣០ ខែសីហានេះ ប៉ុន្តែ បើតាមការចុះផ្សាយរបស់សារព័ត៌មាន Fresh News បានឱ្យដឹងថាអ្នកគ្រូពេទ្យ អឹុម ស្រីនិ បានឆ្លងជំងឺកូវីដ ១៩ ក្នុងនោះដំបូងបានព្យាបាលនៅមន្ទីរពេទ្យបង្អែកខេត្តព្រះសីហនុ ប៉ុន្តែដោយសារស្ថានភាពជំងឺខ្លាំង គួបផ្សំនឹងមានជំងឺថ្លើមធ្ងន់ធ្ងរផង ក៏ត្រូវបានបញ្ជូនទៅព្យាបាលបន្ត នៅមណ្ឌលព្យាបាលជំងឺកូវីដ ១៩ ព្រីមៀម សែនសុខ បានតែរយៈពេល ២ ថ្ងៃ អ្នកគ្រូពេទ្យរូបនេះ ក៏បានទទួលមរណភាព ដោយសារស្ថានភាពជំងឺធ្ងន់ធ្ងរ មិនអាចជួយសង្គ្រោះបាន។
លោក ឃាង ភារម្យ អ្នកនាំពាក្យរដ្ឋបាលខេត្តព្រះសីហនុ បានថ្លែងឱ្យដឹងថា ខេត្តព្រះសីហនុ បានចាត់ទុកមរណភាពរបស់អ្នកគ្រូពេទ្យរូបនេះ គឺជាការបាត់បង់មន្ត្រីជួរមុខដ៏សំខាន់ក្នុងការប្រយុទ្ធប្រឆាំងទៅនឹងជំងឺកូវីដ ១៩ នៅក្នុងប្រទេសកម្ពុជា។
លោកបន្តថា៖ «កញ្ញា អឹុម ស្រីនិ កន្លងមកនេះ បានបូជាកម្លាំងកាយចិត្តក្នុងការព្យាបាលអ្នកជំងឺកូវីដ ១៩ នៅក្នុងខេត្តព្រះសីហនុ យើងមានតែសម្តែងមរណទុក្ខចំពោះគ្រួសារសពរបស់គាត់។ នេះគឺការបាត់ធនធានមនុស្សមួយរូបប្រចាំខេត្តព្រះសីហនុ»៕
