.jpg)
អ្នកកាសែត ២ រូបត្រូវបានឃាត់ខ្លួនពីបទចូលថតផ្សាយបំពានសិទ្ធិបុគ្គលនៅខណ្ឌសែនសុខ។ រូប ប៉ូលិស
ភ្នំពេញៈ អ្នកសារព័ត៌មានចំនួន ២ នាក់ត្រូវបានបញ្ជូនទៅអយ្យការអមសាលាដំបូងរាជធានីភ្នំពេញនៅថ្ងៃទី ៣០ សីហា ដើម្បីអនុវត្តនីតិវិធីបន្ត ចំពោះករណីថតឡាយរូបភាពលំនៅឋានបំពានលើសិទ្ធិបុគ្គល នៅចំណុចផ្ទះលេខ ១២០២ ផ្លូវ ១០០៧ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ កាលពីថ្ងៃទី ២៩ សីហា។
លោក ហួរ ម៉េងវ៉ាង អធិការនគរបាលខណ្ឌសែនសុខប្រាប់ ភ្នំពេញ ប៉ុស្តិ៍ នៅថ្ងៃទី ៣០ ខែសីហា ថា ព្រះរាជអាជ្ញាបានឱ្យលោករៀបចំបញ្ជូនជនសង្ស័យទាំង ២ រូបនេះ ទៅអយ្យការសាលាដំបូងរាជធានីភ្នំពេញ។ ទោះជាយ៉ាងណា លោក ថាមិនដឹងពីមូលហេតុដែលជនសង្ស័យទាំង ២ រូប ទៅឡាយរូបភាពលំនៅឋាន បំពានលើសិទ្ធិបុគ្គលរបស់ប្រជាពលរដ្ឋនេះ ដោយសារមានរឿងរ៉ាវអ្វីនោះទេ។
លោកថ្លែងថា៖ «គាត់ទៅឡាយ ហ្នឹងគាត់មិនដឹងថាផ្ទះពីណាពីណី ចេះតែឡាយ ប៉ុន្តែបើគាត់មានវិជ្ជាជីវៈគ្រប់គ្រាន់ គាត់ដឹងខ្លួនគាត់ហើយ។ បើគាត់យល់ពីច្បាប់គាត់ដឹងហើយថា ធ្វើអ្វីត្រូវ និងធ្វើអ្វីខុសនោះ»។
លោកអធិការបន្តថា លោកបានទទួលការរាយការណ៍ពីម្ចាស់ផ្ទះពាក់ព័ន្ធនឹងអ្នកសារព័ត៌មានទាំង ២ រូបនេះទៅឡាយក្នុងផ្ទះរបស់គេ លោកក៏បានស្នើសុំគោលការណ៍ពីព្រះរាជអាជ្ញាមកចុះធ្វើការឃាត់ខ្លួនអ្នកសារព័ត៌មានទាំង ២ នាក់។ ម្ចាស់ផ្ទះបានអះអាងថា អ្នកសារព័ត៌មានទាំង ២ រូបនេះបានទៅថត និងធ្វើការឡាយពេញផ្ទះរបស់គេ ដែលធ្វើឱ្យប៉ះពាល់ដល់សណ្តាប់ធ្នាប់ និងសិទ្ធិរបស់បុគ្គល។
របាយការណ៍របស់អធិការដ្ឋាននគរបាលខណ្ឌសែនសុខបានឱ្យដឹងថា នៅថ្ងៃទី ២៩ ខែ សីហា ឆ្នាំ ២០២១ ម៉ោង ១៥ និង ៣០ នាទី ប៉ុស្តិ៍នគរបាលរដ្ឋបាលភ្នំពេញថ្មី ឃាត់ខ្លួនជនសង្ស័យ ២ នាក់ ១- ឈ្មោះ ស៊ិន ឡូត ភេទប្រុស អាយុ ៣៩ ឆ្នាំ ជនជាតិខ្មែរ មុខរបរអ្នកសារព័ត៌មានកម្ពុជាតេជោសន្តិភាព។ ជននេះស្នាក់នៅបន្ទប់ជួល ផ្លូវបេតុង សង្កាត់ច្រាំងចំរេះ ៣ ខណ្ឌឫស្សីកែវ (គ្មានសារធាតុញៀន)។ ២- ឈ្មោះ ប៉ាន់ ផល្លា ភេទប្រុស អាយុ ៣៧ ឆ្នាំ ជនជាតិខ្មែរ មុខរបរអ្នកសារព័ត៌មានអាស៊ាន TV។
របាយការណ៍បន្តថា ជនសង្ស័យទាំង ២ រូបនេះបានធ្វើសកម្មភាពថតឡាយវីដេអូផ្ទះរបស់ជនរងគ្រោះ ឈ្មោះ ទឹម ស្រីតូច ភេទស្រី អាយុ ៣២ ឆ្នាំ ជនជាតិខ្មែរ មុខរបរអ្នកបកប្រែភាសាចិន ស្នាក់នៅផ្ទះជួល ១២០២ ផ្លូវ ១០០៧ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។ ក្នុងការចុះឃាត់ខ្លួននេះ សមត្ថកិច្ចប្រទះឃើញសម្ភារបន្សល់ទុក ទូរស័ព្ទដៃ ១ គ្រឿងម៉ាក VIVO និងដងឡាយ ១ ។
លោក មាន ចាន់ធី អគ្គនាយកសារព័ត៌មានអាស៊ាន TV ប្រាប់ ភ្នំពេញ ប៉ុស្តិ៍ ថា ករណីនេះ លោកមិនដឹងនោះទេ ព្រោះអ្នកសារព័ត៌មានរបស់លោករូបនេះ មិនបានឡាយនៅក្នុងផេករបស់សារព័ត៌មានរបស់លោកឡើយ។ បុគ្គលរូបនោះបានពាក់កាតអង្គភាពរបស់លោកទៅឡាយនៅក្នុងផេករបស់គេទេ [សារព័ត៌មានកម្ពុជាតេជោសន្តិភាព]។
លោក មាន ចាន់ធី បានទាក់ទងទៅលោក ស ថេត ស្នងការនគរបាលរាជធានីភ្នំពេញឱ្យជួយអន្តរាគមន៍ចំពោះករណីនេះដែរ ប៉ុន្តែលោក ស ថេត បានប្រាប់ឱ្យទាក់ទងទៅលោកព្រះរាជអាជ្ញាផ្ទាល់ ព្រោះករណីនេះគ្រាន់តែជាករណីជេរប្រទេចកម្លាំងមានសមត្ថកិច្ចប៉ុណ្ណោះ។
លោកថ្លែងថា៖ «ករណីនេះខ្ញុំអត់ដឹងទេ មិនដឹងថាគាត់ឡាយទាក់ទងនឹងអីទេ។ ក្នុងការឡាយ រាល់ទីតាំងទាំងអស់ត្រូវមានការអនុញ្ញាតពីខ្ញុំ។ គាត់ពាក់កាតខ្ញុំ គាត់ឡាយឱ្យគេ [តេជោសន្តិភាព]។ ខ្ញុំមានផេកដែរ ប៉ុន្តែគាត់អត់ឡាយទេ។ ប៉ុន្តែប្រហែលទីតាំងនោះមានករណីអ្វីម្យ៉ាងហើយ បានជាប្រភពរាយការណ៍មកពួកគាត់ឱ្យចុះទៅឡាយបែបនេះ»។
ទោះជាយ៉ាងណា លោកថា លោកបានមើលការឡាយនៅក្នុងផេកកម្ពុជាតេជោសន្តិភាព ក្រុមសមត្ថកិច្ចបានចុះធ្វើការហាមឃាត់មិនឱ្យឡាយបន្ត។ ប៉ុន្តែអ្នកសារព័ត៌មានទាំង ២ នេះមិនបញ្ឈប់នោះទេ ហើយស្នើឱ្យមានព្រះរាជអាជ្ញាមុននឹងធ្វើការឃាត់ខ្លួន និងបានបញ្ឈប់ការឡាយ ដែលធ្វើឱ្យមានការប៉ះពារពាក្យសម្តីមិនល្អដាក់គ្នា។
លោក ផុស សុវណ្ណ អ្នកនាំពាក្យក្រសួងព័ត៌មានប្រាប់ ភ្នំពេញ ប៉ុស្តិ៍ នៅថ្ងៃទី ៣០ សីហាថា តាមព័ត៌មានដែលលោកទទួលបានពាក់ព័ន្ធនឹងករណីអ្នកសារព័ត៌មានទាំង ២ នេះ គឺវាខុសទៅនឹងច្បាប់ និងក្រមសីលធម៌វិជ្ជាជីវៈនៃអ្នកសារព័ត៌មាន ព្រោះពួកគាត់បានចូលទៅថតឡាយនៅក្នុងរបងផ្ទះរបស់គេ។
លោកបន្តថា ដោយមើលឃើញពីសកម្មភាពបែបនេះ ម្ចាស់ផ្ទះក៏បានទាក់ទងទៅសមត្ថកិច្ចឱ្យចុះមកធ្វើការឃាត់ខ្លួនអ្នកសារព័ត៌មានទាំង ២ រូបនេះ។ ព្រោះវាហួសពីដែនសមត្ថកិច្ចរបស់អ្នកសារព័ត៌មាន ហើយក្រសួងក៏មិនគាំទ្រឱ្យធ្វើសកម្មភាពបែបនេះដែរ៕
វីដេអូ៖
