បន្ទាយមានជ័យៈ រដ្ឋបាលខេត្តបន្ទាយមានជ័យសម្រេចបិទខ្ទប់ការធ្វើដំណើរចេញ-ចូលជាបណ្តោះអាសន្ននៅទីតាំងភូមិអូរបីជាន់ ឃុំអូរបីជាន់ ស្រុកអូរជ្រៅរយៈពេល ១៤ ថ្ងៃ ខណៈអាជ្ញាធរខេត្ត-រាជធានីមួយចំនួនបានបិទផ្សារ និងវត្ត បន្ទាប់ពីរកឃើញមានអ្នកវិជ្ជមានកូវីដ ១៩ នៅតាមទីតាំងទាំងនោះ។
លោក អ៊ុំ រាត្រី អភិបាលខេត្តបន្ទាយមានជ័យនៅថ្ងៃទី ២៩ ខែសីហា បានសម្រេចបិទខ្ទប់ការធ្វើដំណើរចេញ-ចូលភូមិអូរបីជាន់ ឃុំអូរបីជាន់។ ការបិទខ្ទប់នេះមានរយៈពេល ១៤ ថ្ងៃដោយគិតចាប់ពីថ្ងៃទី ២៩ ខែសីហា ដល់ថ្ងៃទី ១១ កញ្ញា ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ ១៩ នៅក្នុងភូមិសាស្ត្រដែលត្រូវបិទ និងទប់ស្កាត់ជំងឺនេះមិនឱ្យឆ្លងរាលដាលទៅកាន់តំបន់ផ្សេងទៀត។
ក្នុងអំឡុងពេលនៃការបិទខ្ទប់រដ្ឋបាលខេត្តបានប្រកាសហាមឃាត់បុគ្គលគ្រប់រូបមិនឱ្យធ្វើដំណើរចេញពីលំនៅឋាន ឬទីសំណាក់បច្ចុប្បន្ន លើកលែងតែក្នុងករណីចាំបាច់មួយចំនួនដូចជាការដឹកជញ្ជូនទំនិញគ្រប់ប្រភេទ ការធ្វើដំណើរទៅមន្ទីរពេទ្យ មណ្ឌលសុខភាព និងការធ្វើដំណើរដើម្បីទៅបង្ហាញខ្លួនដល់មន្ត្រីសុខាភិបាលយកសំណាកជាដើម។
ក្នុងលិខិតលោកអភិបាលខេត្តសរសេរថា៖ «រាល់ការលើកលែងបុគ្គលគ្រប់រូបមានកាតព្វកិច្ចត្រូវអនុវត្តវិធានការសុខាភិបាលរួមមាន ការពាក់ម៉ាស់ រក្សាគម្លាតសុវត្ថិភាព ព្រមទាំងប្រកាន់ខ្ជាប់ នូវការធ្វើអនាម័យ ដើម្បីសម្លាប់មេរោគ និងការវាស់កម្តៅ ដើម្បីប្រយុទ្ធ និងទប់ស្កាត់ការឆ្លងរាលដាលជំងឺកូវីដ ១៩»។
ជាមួយគ្នានេះ រដ្ឋបាលខេត្តបន្ទាយមានជ័យក៏បានដាក់បម្រាមគោចរ ចន្លោះពីម៉ោង ២០:០០ ដល់ម៉ោង ៥:០០ ព្រឹកផងដែរ ចំពោះរាល់ការធ្វើដំណើរ លើកលែងការធ្វើដំណើរដោយមូលហេតុសុខភាពបន្ទាន់ ឬមូលហេតុចាំបាច់ ចំណែកអាជីវកម្មផ្សេងៗត្រូវផ្អាកប្រតិបត្តិការនៅចន្លោះម៉ោងនេះដូចគ្នា។
ដោយឡែកនៅស្រុកបន្ទាយមាស ខេត្តកំពត រដ្ឋបាលស្រុកនេះបានសម្រេចបិទខ្ទប់ផ្សារទូកមាសចំនួន ១ សប្តាហ៍ ក្រោយមានអាជីវករលក់ដូរក្នុងផ្សារត្រូវបានរកឃើញមានជំងឺកូវីដ ១៩។
លោក មួង នឿន អភិបាលស្រុកបន្ទាយមាសថ្លែងនៅថ្ងៃទី ៣០ សីហាថា មន្ត្រីសុខាភិបាលបានចុះយកសំណាកអាជីវករ និងអ្នកពាក់ព័ន្ធទាំងអស់ ៣០៦ នាក់ក្នុងនោះមានវិជ្ជមានកូវីដ ១៦ នាក់។ អ្នកជំងឺទាំងអស់ត្រូវបាននាំយកទៅសម្រាកព្យាបាលនៅមន្ទីរពេទ្យបង្អែកស្រុកកំពង់ត្រាច និងមន្ទីរពេទ្យបង្អែកស្រុកអង្គរជ័យ។
លោក មួង នឿន បញ្ជាក់ថា ដំបូងពលរដ្ឋជាអាជីវករនៅក្នុងផ្សារកើតការមិនស្រួលខ្លួនក៏បានទិញឧបករណ៍តេស្តរហ័សមកធ្វើតេស្តដោយខ្លួនឯង ឃើញមានវិជ្ជមានកូវីដ ៧ នាក់ទើបរាយការណ៍ទៅអាជ្ញាធរ។
លោកថា៖ «អាជ្ញាធរយើងក៏ទាក់ទងខាងមន្ទីរពេទ្យបង្អែក មកយកគាត់ទៅព្យាបាល ហើយក៏យើងទាក់ទងខាងមន្ទីរពេទ្យបង្អែកស្រុកកំពង់ត្រាច ដើម្បីមកយកសំណាកបងប្អូនអាជីវករនៅក្នុងផ្សារទូកមាសហ្នឹង។ ដោយរកឃើញចំនួនច្រើនអ៊ីចឹងយើងមានគោលការណ៍បិទផ្សារ ១ សប្តាហ៍សិន»។
ចំណែកនៅរាជធានីភ្នំពេញនៅព្រឹកថ្ងៃទី ៣០ សីហា អាជ្ញាធរខណ្ឌទួលគោកបានបិទផ្លូវលេខ ៣៣៦ ស្ថិតនៅសង្កាត់ផ្សារដើមគ ដើម្បីយកសំណាកពីអាជីវករផ្សារដើមគ។ មូលហេតុដោយសារមានអ្នកជំងឺកូវីដ ១៩ បំប្លែងថ្មីដែលតាបានចេញ-ចូលក្នុងផ្សារ។ ក្រោយធ្វើតេស្តរហ័សភ្លាមៗក្រុមគ្រូពេទ្យបានរកឃើញអ្នកវិជ្ជមានកូវីដចំនួន ២ នាក់។
ដោយឡែកអាជ្ញាធរសង្កាត់ព្រែកថ្មី ខណ្ឌច្បារអំពៅ ក៏បានសម្រេចផ្អាកមិនឱ្យមានការចេញ ចូលជាបណ្តោះអាសន្ននៅផ្នែកខ្លះនៃវត្តគល់ទទឹង ក្រោយរកឃើញព្រះសង្ឃ ៦ អង្គមានជំងឺកូវីដ ១៩។ ក្រុមអាជ្ញាធរសង្កាត់ព្រែកថ្មីជាច្រើននាក់កំពុងប្រចាំការយាមកាមការពារសន្តិសុខនៅទីតាំងដែលត្រូវបិទ ដូចជាកន្លែងដែលពលរដ្ឋតែងនាំគ្នាទៅហាត់ប្រាណលម្ហែកាយ នៅក្នុងបរិវេណវត្ត និងទីតាំងមានការលក់ដូរគ្រឿងហូបចុកផ្សេងៗនៅក្នុងវត្ត៕