.jpg)
លោក ឆាយ សុផល និងសៀវភៅថ្មីទើបចេញផ្សាយ។ រូបថត Sophal Chhay page
ភ្នំពេញៈ «រាជរដ្ឋាភិបាលកម្ពុជាសង្គ្រាមដណ្តើមជីវិតពលរដ្ឋពីមាត់ជ្រោះមរណៈកូវីដ ១៩» គឺជាសៀវភៅថ្មី ១ ទៀតដែលត្រូវបានសាស្ត្រាចារ្យផ្នែកសារព័ត៌មាន ១ រូប រៀបរៀងឡើងដើម្បីឆ្លុះបញ្ចាំងពីកិច្ចខិតខំប្រឹងប្រែងរបស់ប្រមុខរាជរដ្ឋាភិបាលកម្ពុជាក្នុងការស្វះស្វែងរកវ៉ាក់សាំងបង្ការជំងឺកូវីដ-១៩ មកចាក់ជូនពលរដ្ឋ និងការរិះរកវិធានការនានា ដើម្បីទប់ស្កាត់ការឆ្លងរីករាលដាលនៃជំងឺដ៏កាចសាហាវនេះ។
សៀវភៅនេះមានកម្រាស់ជិត ៩០០ ទំព័របែងចែកជា ៦ ជំពូក និងត្រូវបានប្រកាសចេញផ្សាយជាផ្លូវការកាលពីថ្ងៃទី ២៨ ខែ សីហា ឆ្នាំ ២០២១ ក្នុងចំនួន ៥ ០០០ ច្បាប់។ វាត្រូវបានគេចាត់ទុកជាឯកសារកាលប្បវត្តិថ្មីដ៏កម្រមួយសម្រាប់ប្រវត្តិសាស្ត្រមនុស្សជាតិទូទៅទាំងបច្ចុប្បន្ន និងជំនាន់ក្រោយបានដឹងអំពីផលប៉ះពាល់ដ៏ស្រួចស្រាល់ដល់អាយុជីវិត សេដ្ឋកិច្ច និងសង្គមជាតិដែលបណ្ដាលមកពីជំងឺកូវីដ ១៩។
លោក ឆាយ សុផល សាស្ត្រាចារ្យផ្នែកសារព័ត៌មាន និងជាអ្នកនិពន្ធសៀវភៅមួយនេះបានប្រាប់ភ្នំពេញប៉ុស្តិ៍ថា សៀវភៅនេះជាកំណត់ត្រាប្រវត្តិសាស្ត្រមនុស្សជាតិដ៏កម្រមួយដែលបានចារទុកពីសកម្មភាពរបស់រាជរដ្ឋាភិបាលកម្ពុជា ជាពិសេសលោកនាយករដ្ឋមន្ត្រី ហ៊ុន សែន ក្នុងការស្វះស្វែងរកវ៉ាក់សាំងបង្ការជំងឺកូវីដ ១៩ គ្រប់ច្រកល្ហកយកមកចាក់ជូនប្រជាជនកម្ពុជារាប់លាននាក់ រួមទាំងជនបរទេសដែលរស់នៅ និងធ្វើការនៅកម្ពុជាដោយឥតគិតថ្លៃ។
លោកបានថ្លែងថា៖ «សង្គ្រាមប្រឆាំងជំងឺកូវីដ ១៩ គឺជាសង្គ្រាមដណ្ដើមជីវិតពលរដ្ឋចេញពីមាត់ជ្រោះមរណៈ។
ប្រសិនបើគ្មានវ៉ាក់សាំងបង្ការជំងឺកូវីដ ១៩ ចាក់បានទាន់ពេលវេលាទេនោះ ហើយបើសម្តេចតេជោ មិនមានយុទ្ធសាស្ត្រត្រៀមប្រយុទ្ធ ដើម្បីទប់ទល់នឹងជំងឺនេះទុកជាមុនទេនោះមហន្តរាយដ៏ធំអាចនឹងកើតមានចំពោះប្រទេស និងប្រជាជនកម្ពុជា»។
បើតាមលោក ឆាយ សុផល ការសរសេរ និងរៀបរៀងចងក្រងសៀវភៅនេះឡើង គឺលោកបានចំណាយពេលតាមដាន អានប្រមូល និងសន្សំឯកសារជារៀងរាល់ថ្ងៃ ដែលក្នុងនោះមានសម្រង់សម្ដី សុន្ទរកថាគន្លឹះ សេចក្តីសម្រេច សេចក្តីណែនាំអំពាវនាវ សេចក្តីថ្លែងការណ៍ពិសេស ប្រកាស និងលិខិតបទដ្ឋានគតិយុត្តជាច្រើនទៀតដែលរួមបញ្ចូលទាំងសារាចរណែនាំ វិធានការ របាយការណ៍ ច្បាប់ អនុក្រឹត្យ គោលការណ៍ប្រតិបត្តិស្ដង់ដា (SOP) ...និងអត្ថបទព័ត៌មានដែលទាក់ទិននឹងជំងឺកូវីដ ១៩ នៅកម្ពុជាផងដែរ ដើម្បីចងជាបណ្តុំឯកសារជំនួយស្មារតី។
លោក សុផល និយាយបែបកំប្លែងថា៖ «តាមពិត ទម្រាំបានសៀវភៅមួយច្បាប់ៗគឺហត់ណាស់ ពេលខ្លះស្ត្រេស ហើយយប់ខ្លះខួរក្បាល Error ដេកអត់លក់ ខុសពីអ្នកលក់អត់ដេក។ បើគ្មានការព្យាយាម និងមិនអត់ធ្មត់ទេ នោះអំបិលជាគ្នា»។
កាន់តែលំបាក និងប្រយ័ត្នប្រយែងបំផុតនោះគឺការសរសេរ និងការចងក្រងសៀវភៅឯកសារក៏ដូចជាកំណត់ត្រាបែបប្រវត្តិសាស្ត្រ ដែលផ្ទុយពីសំណេរបែបអក្សរសិល្ប៍ ដូចជា ប្រលោមលោក កំណាព្យ និងចម្រៀងជាដើម ព្រោះបែបប្រវត្តិសាស្ត្រទាមទារបង្ហាញគន្ថនិទ្ទេស ឈ្មោះ និងកាលបរិច្ឆេទព្រឹត្តិការណ៍ឱ្យបានច្បាស់លាស់ ពោលគឺត្រូវផ្ទៀងផ្ទាត់ប្រភពឱ្យបានត្រឹមត្រូវ។ នេះមិនទាន់គិតពីការប្រើពាក្យ ប្រយោគ ឃ្លាឃ្លោង និងអក្ខរាវិរុទ្ធ រួមទាំងរចនាទំព័រផងទេ។
អ្នកនិពន្ធសៀវភៅរូបនេះបានបន្តថា៖ «ខ្ញុំខ្លាចគេឯងពិបាករកឯកសារនៅថ្ងៃក្រោយ។ ហេតុនេះខ្ញុំចេះតែអង្គុយសំកុកតាមដានព្រឹត្តិការណ៍ សន្សំឯកសារចារជាកម្រងចងទុកក្នុងសៀវភៅមួយទៅ ហើយថ្ងៃក្រោយ បើមាននរណាចង់រំឭក និងចង់ដឹងពីហេតុការណ៍នានាដែលកើតមាននៅក្នុងកាលនៃការរាតត្បាតមេរោគកូវីដ ១៩ នោះគេនឹងនឹកឃើញ និងដឹងថា តើប្រជាជន និងប្រទេសជាតិក៏ដូចជា ពិភពលោកទាំងមូលបានពើបប្រទះក្តីលំបាកបែបណា ហើយថ្នាក់ដឹកនាំប្រទេស អាជ្ញាធរគ្រប់លំដាប់ថ្នាក់ និងក្រុមគ្រូពេទ្យក្មេងចាស់ប្រុសស្រីប្រឹងប្រែងរបៀបម៉េចនៅចំពោះមុខកលិយុគដ៏ធំនេះ»។
ទោះយ៉ាងណាសៀវភៅនេះ គឺជាភាគ ១ ដែលផ្តោតលើព្រឹត្តិការណ៍ចាប់ពីចុងខែធ្នូ ឆ្នាំ ២០១៩ មកដល់ថ្ងៃទី ១ ខែ សីហា ឆ្នាំ ២០២១ ដែលជាថ្ងៃដំបូងនៃការបើកយុទ្ធនាការចាក់វ៉ាក់សាំងបង្ការជំងឺកូវីដ ១៩ ដល់កុមារ និងយុវវ័យអាយុចន្លោះពី ១២ ឆ្នាំដល់ក្រោម ១៨ ឆ្នាំ។
លោក សុផល បានថ្លែងថា ការកើតចេញជារូបរាងនៃសៀវភៅនេះឡើងក៏ ដោយសារមានការជួយគាំទ្រពីលោក ឃួង ស្រេង អភិបាលរាជធានីភ្នំពេញ និងអ្នកឧកញ៉ា ឡេង ណាវ៉ាត្រា ផងដែរ ហើយថាសៀវភៅនេះនឹងចែកជូនដល់បណ្ណាល័យជាតិ និងបណ្ណាល័យសាកលនៃវិទ្យាល័យនានានៅទូទាំងប្រទេស និងមានដាក់លក់តាមបណ្ណាគារមួយចំនួនផងដែរក្នុងតម្លៃ ១៤ ដុល្លារក្នុង ១ ក្បាល។
លោកបានបន្តថា ពេលនេះលោកកំពុងសរសេរសៀវភៅភាគ ២ ដែលបន្តចាប់ពីថ្ងៃទី ១ ខែសីហា ឆ្នាំ ២០២១ ដែលគិតមកទល់ចុងខែសីហានេះគឺបានសម្រេចជាង ១០០ ទំព័រហើយ។
ទន្ទឹមនឹងនេះ លោក សុផល ក៏បានអំពាវនាវដល់ពលរដ្ឋ ជាពិសេសយុវវ័យ និងយុវជនត្រូវឆ្លៀតពេលអានសៀវភៅឱ្យបានច្រើន តែត្រូវចងចាំថា «សៀវភៅល្អមិនអាស្រ័យលើគម្របមុខក្រោយ» នោះទេ។
ម្យ៉ាងទៀតសូមឪពុកម្តាយ និងអាណាព្យាបាលគួររៀបចំបណ្ណាល័យតូចមួយនៅផ្ទះសម្រាប់គ្រួសារ ហើយឧស្សាហ៍ទិញសៀវភៅឱ្យកូនអាន និងជំរុញកូនៗឱ្យប្រឹងរៀនសូត្រផង ព្រោះអានច្រើនកើនពុទ្ធិ គំនិតកាន់តែទូលាយ ការវិភាគកាន់តែស៊ីជម្រៅ ហើយការសម្រេចចិត្តបានកាន់តែត្រឹមត្រូវ។ ទោះយ៉ាងណា ក្នុងខណៈពេលនេះ «សូមកុំភ្លេច ៣ កុំ ៣ ការពារ”៕
