ភ្នំពេញៈ វ៉ាក់សាំងស៊ីណូវ៉ាក់ ដែលត្រូវបានរាជរដ្ឋាភិបាលកម្ពុជាបានបញ្ជាទិញពីសាធារណរដ្ឋប្រជាមានិតចិន ចំនួន ២ លានដូសទៀត ត្រូវបានដឹកមកដល់នៅព្រឹកថ្ងៃទី ៣១ ខែសីហានេះ ហើយរាជរដ្ឋាភិបាល ក៏បានបញ្ជាទិញបន្ថែមទៀត ពីក្រុមហ៊ុនស៊ីណូវ៉ាក់នូវវ៉ាក់សាំងចំនួន៥លានដូសដែលនឹងដឹកមកដល់នៅខែកញ្ញា។ នេះបើតាម លោកស្រី យក់ សម្បត្តិ រដ្ឋលេខាធិការក្រសួងសុខាភិបាល។
លោកស្រីបានថ្លែងនៅពេលចុះទៅទទួលវ៉ាក់សាំងស៊ីណូវ៉ាក់ នៅព្រលានយន្តហោះអន្តរជាតិភ្នំពេញថា សរុបមកដល់ពេលនេះ កម្ពុជាទទួលបានវ៉ាក់សាំង សរុបទាំងជំនួយនិងការបញ្ជាទិញ គឺមានចំនួនជាង ២៧ លានដូសហើយ។
លោកស្រី យក់ សម្បត្តិ បានថ្លែងថា៖ «វ៉ាក់សាំងស៊ីណូវ៉ាក់ ចំនួន ២ លានដូសនេះ គឺសម្រាប់ផ្តល់ជូនទៅតាមគោលដៅផែនការចាក់ដូសទី៣ ឬដូសជំរុញ សម្រាប់ប្រជាពលរដ្ឋក្នុងគោលនយោបាយចាក់វ៉ាក់សាំងរបស់យើងដែលដាក់ដោយសម្តេចតេជោ»។
ជាមួយគ្នានេះដែរ រាជរដ្ឋាភិបាលក៏ដូចជាក្រសួងសុខាភិបាល មិនទាន់មានផែនការណាមួយនៅឡើយទេសម្រាប់ការចាក់វ៉ាក់សាំងទៅដល់ក្រុមមនុស្សអាយុពី ១២ ឆ្នាំចុះក្រោម ដោយសារ ក្រុមគណៈកម្មការជំនាញកំពុងតែធ្វើការសិក្សាជាមួយនឹងអង្គការដៃគូ និងក្រុមហ៊ុនផលិតវ៉ាក់សាំងផងដែរ៕