.jpg)
ជនសង្ស័យក្រោយសមត្ថកិច្ចចាប់ខ្លួនពីថ្ងៃ ២៩ សីហា។ រូបថត ប៉ូលិស
បាត់ដំបងៈ នគរបាលស្រុកមោងឫស្សីបានបញ្ជូនបុរសម្នាក់ទៅស្នងការដ្ឋាននគរបាលខេត្តបាត់ដំបងកាលពីថ្ងៃ ៣០ សីហា បន្ទាប់ពីឃាត់ខ្លួនករណីរំលោភកូនស្រីចុង ប្រព្រឹត្តនៅឃុំមោង ស្រុកមោងឫស្សី ខេត្តបាត់ដំបងពីថ្ងៃទី ២៧ សីហា។
លោក ស គឹមឡុង អធិការនគរបាលស្រុកមោងឫស្សីប្រាប់ ភ្នំពេញ ប៉ុស្តិ៍ នៅថ្ងៃទី ៣០ សីហាថា ជនសង្ស័យឈ្មោះ វ៉ាង សីហៈ អាយុ ២៧ ឆ្នាំ រីឯកូនស្រីចុងឈ្មោះ ន.ធ មានអាយុ ១៣ ឆ្នាំ។ ពួកគេរស់នៅឃុំមោង ស្រុកមោងឫស្សី ខេត្តបាត់ដំបង។ ចំពោះជនសង្ស័យគឺលោកបញ្ជូនទៅស្នងការដ្ឋាននគរបាលខេត្តបាត់ដំបងនៅថ្ងៃទី ៣០ សីហានេះ ដើម្បីកសាងសំណុំរឿងបញ្ជូនបន្តទៅសាលាដំបូងខេត្តបាត់ដំបង។
លោកថា៖ «ជនសង្ស័យបានសារភាពថា គាត់ពិតជាបានប្រព្រឹត្តដូចការចោទប្រកាន់មែន។ ដូច្នេះយើងមានភ័ស្តុតាងគ្រប់គ្រាន់ក្នុងរឿងនេះ»។
លោក អោក សុភ័ក្ត្រ នាយនគរបាលប៉ុស្តិ៍ឃុំមោង ស្រុកមោងឫស្សីបានឱ្យដឹងតាមសម្តីស្ត្រីម្តាយក្មេងរងគ្រោះថា គាត់មានស្រុកកំណើតនៅខេត្តព្រៃវែង និងជាស្ត្រីមេម៉ាយមានតែកូនស្រីជាជនរងគ្រោះម្នាក់ប៉ុណ្ណោះ។ ប៉ុន្តែក្រោយមកបានឈ្មោះ វ៉ាង សីហៈ ដែលមានស្រុកកំណើតនៅឃុំមោង ស្រុកមោងឫស្សីជាប្ដីចុង និងបានមករស់នៅខាងប្ដី។
លោកបន្តថា ដោយសារស្ត្រីជាម្តាយក្មេងរងគ្រោះត្រូវទៅធ្វើជាកម្មករនៅភ្នំពេញយូរថ្ងៃគាត់ក៏បានផ្ញើកូនស្រីនឹងស្ត្រីចំណាស់ម្នាក់ដែលត្រូវជាម្តាយធម៌ក្នុងភូមិ ដោយមិនហ៊ានឱ្យនៅផ្ទះជាមួយប្ដីចុងទេ ។
លោក សុភ័ក្ត្រ បន្តថា ហេតុការណ៍ចាប់រំលោភនេះបានកើតឡើងតាំងពីថ្ងៃទី ២៧ សីហាមកម្ល៉េះ ខណៈជនសង្ស័យបានមកយកក្មេងស្រីរងគ្រោះទៅលេងនៅផ្ទះរបស់ខ្លួន។ ពេលរំលោភរួច ជនសង្ស័យបានគំរាមមិនឱ្យនាងប្រាប់នរណាទេ ហើយបើរឿងនេះបែកការណ៍ គេនឹងសម្លាប់នាងចោល។
លោកថា៖ «ក៏ប៉ុន្តែក្មេងស្រីនោះនិយាយប្រាប់យាយធម៌នាងពីបញ្ហានេះទើបយាយធម៌ក៏ទូរស័ព្ទទៅម្តាយក្មេងនៅភ្នំពេញ»។
បើតាមលោក សុភ័ក្ត្រ បន្ទាប់ពីម្តាយក្មេងស្រីដឹងរឿងនេះភ្លាមក៏ជិះរថយន្តមកដាក់ពាក្យប្តឹងនៅប៉ុស្តិ៍នគរបាលរបស់លោកនៅថ្ងៃ ២៩ សីហា ហើយសមត្ថកិច្ចក៏ចុះឃាត់ខ្លួនជនសង្ស័យនៅល្ងាចថ្ងៃដដែលតែម្តង។ ករណីនេះម្តាយក្មេងស្រីរងគ្រោះក៏ទៅស្នងការដ្ឋាននគរបាលខេត្ត នៅថ្ងៃ ៣០ សីហាជាមួយក្មេងរងគ្រោះដែរ ដើម្បីបំភ្លឺបន្ថែមពាក់ព័ន្ធករណីនេះ។
លោក ប៊ន់ វណ្ណារ៉ា នាយការិយាល័យប្រឆាំងការជួញដូរមនុស្ស និងការពារអនីតិជនខេត្តបាត់ដំបងបានឱ្យដឹងនៅថ្ងៃទី ៣០ សីហាថា លោកបានទទួលរបាយការណ៍បទល្មើសនេះហើយ ដោយលោកកំពុងចាត់ការតាមនីតិវិធី។
លោកថ្លែងថា៖ «ជានីតិវិធីរាល់សំណុំរឿងពីស្រុកមកត្រូវចូលមកការិយាល័យជំនាញ ហើយយើងពិនិត្យបន្ថែមទើបបញ្ជូនទៅកាន់តុលាការ»៕
