ព្រះសីហនុៈ រដ្ឋបាលខេត្ដព្រះសីហនុកំពុងសាងសង់អគារព្យាបាលអ្នកជំងឺកូវីដ ១៩ កម្រិតស្រាល កម្ពស់ ១ ជាន់ទំហំ ៣៣ ម៉ែត្រគុណ ៩០ ម៉ែត្រ ដែលអាចដាក់គ្រែព្យាបាលបានចំនួន ៣៥៦ គ្រែ ស្ថិតនៅក្នុងបរិវេណមន្ទីរពេទ្យបង្អែកខេត្ត ខណៈបច្ចុប្បន្ន ទីតាំងសម្រាប់ព្យាបាលអ្នកជំងឺកូវីដភាគច្រើនត្រូវបានជួលពីវិស័យឯកជន។
លោក ឃាង ភារម្យ អ្នកនាំពាក្យរដ្ឋបាលខេត្ដបានថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ៣០ សីហាថា អគារនេះ មានឈ្មោះថា «អគារតេជោព្យាបាលជំងឺកូវីដ ១៩» ខេត្តព្រះសីហនុ។ តាមគម្រោង ការសាងសង់ត្រូវចំណាយថវិកាប្រមាណ ៧០ ម៉ឺនដុល្លារអាមេរិក ដែលជាថវិកាចូលរួមពីសប្បុរសជន។
លោកបានឱ្យដឹងថា អគារព្យាបាលនេះអាចដាក់គ្រែសម្រាប់ព្យាបាលអ្នកជំងឺកូវីដ-១៩ កម្រិតស្រាលបានចំនួន ៣៥៦ គ្រែ (គ្រែ ១ ជាន់) ឬអាចដាក់បានចំនួន ៧១២ គ្រែប្រសិនប្រើគ្រែ ២ ជាន់។
លោកថ្លែងថា៖ «ការសាងសង់អគារព្យាបាលជំងឺកូវីដ ១៩ កម្រិតស្រាលនេះ គឺយើងបាននិងកំពុងដំណើរការហើយ។ បច្ចុប្បន្ននៅក្នុងខេត្ដរបស់យើងមានមន្ទីរសម្រាកព្យាបាលជំងឺកូវីដ ១៩ ចំនួន ៥ ទីតាំង ប៉ុន្ដែភាគច្រើនជាទីតាំងដែលយើងជួលពីវិស័យឯកជន ដូចជាផ្ទះសំណាក់ សណ្ឋាគារ»។
លោកបន្តថា៖ «អ៊ីចឹងហើយ ទើបយើងសាងសង់អគារ មន្ទីរពេទ្យសម្រាកព្យាបាលខ្លួនយើង។ ព្រោះបើតាមការព្យាករជំងឺកូវីដ ១៩ មិនអាចបញ្ចប់ក្នុងពេលឆាប់ៗនេះទេ។ ដូច្នេះយើងត្រូវមានអគារព្យាបាលដោយខ្លួនឯង ដើម្បីធានានិរន្តរភាពនៃការព្យាបាលជំងឺកូវីដ ១៩ នៅក្នុងខេត្ដព្រះសីហនុ»។
តាមរបាយការណ៍របស់រដ្ឋបាលខេត្ដព្រះសីហនុគម្រោងសាងសង់អគារព្យាបាលអ្នកជំងឺកូវីដ ១៩ នេះគឺធ្វើពីគ្រឹះសសរ បេតុង ដំបូលប្រក់ស័ង្កសី នៅក្នុងបរិវេណមន្ទីរពេទ្យបង្អែកខេត្តព្រះសីហនុ។
តាមការបញ្ជាក់របស់ក្រុមការងារជំនាញគម្រោងសាងសង់អគារនេះនឹងត្រូវបញ្ចប់ការសាងសង់ក្នុងរយៈពេល ៣ ខែ។
រដ្ឋបាលខេត្ដព្រះសីហនុនៅថ្ងៃទី ៣០ ខែសីហា ក៏បានថ្លែងអំណរគុណចំពោះលោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ និងក្រុមគ្រួសារ ដែលបានចូលរួមចំណែកផ្តល់ថវិកាចំនួន ១០ ម៉ឺន ដុល្លារអាមេរិក ដើម្បីសាងសង់អគារ ព្យាបាលជំងឺកូវីដ ១៩ នេះ។
ក្រៅពីនេះរដ្ឋបាលខេត្តក៏បានថ្លែងអំណរគុណលោក ទៀ វិចិត្រ និងក្រុមគ្រួសារ ដែលបានចូលរួមថវិកាចំនួន ៥ ម៉ឺនដុល្លារអាមេរិក។ លោក លី គួង និងក្រុមគ្រួសារបានចូលរួមថវិកាចំនួន ៥ ម៉ឺនដុល្លារ និងលោក លាង ឃុន ប្រធានក្រុមប្រឹក្សាភិបាលក្រុមហ៊ុនជីបម៉ុង និងក្រុមគ្រួសារបានចូលផ្តល់នូវដែក ១៦ លី ចំនួន ១៤,៦៥ តោន និងដែក ១២ លី ចំនួន ៤,៩២ តោន ដើម្បីសាងសង់អគារសម្រាប់ព្យាបាលអ្នកជំងឺកូវីដ ១៩ នេះផងដែរ៕