.jpg)
ជនសង្ស័យត្រូវសមត្ថកិច្ចឃាត់ខ្លួនកាលពីម្សិលមិញ។ រូបថត ប៉ូលិស
ភ្នំពេញៈ បុរសជាឪពុកចុងម្នាក់ត្រូវបានតុលាការខេត្តកណ្តាលឃុំខ្លួនក្នុងពន្ធនាគារខេត្ត កាលពីថ្ងៃទី ៣០ សីហា ពាក់ព័ន្ធនឹងករណីចាប់រំលោភសេពសន្ថវៈកូនស្រីចុងអាយុ ១០ ឆ្នាំ បន្ទាប់ពីឃាត់ខ្លួនបានប៉ុន្មានម៉ោងនៅសង្កាត់ដើមមៀន ក្រុងតាខ្មៅ។
លោក រស់ សារិន ប្រធានការិយាល័យប្រឆាំងការជួញដូរមនុស្ស នៃស្នងការដ្ឋាននគរបាល ខេត្តកណ្តាល ប្រាប់នៅរសៀល ថ្ងៃទី ៣១ សីហាថា បុរសឈ្មោះ ជឹម ឌីណា អាយុ ៣៣ ឆ្នាំ ត្រូវបានចៅក្រមស៊ើបសួរសម្រេចចេញដីកាឃុំខ្លួនបណ្តោះអាសន្នក្នុងពន្ធនាគារខេត្តហើយ កាលពីថ្ងៃទី ៣០ សីហា។ ប៉ុន្តែក្នុងខ្លួនជនត្រូវចោទមិនឃើញមានផ្ទុកសារធាតុញៀនទេ។
លោកបញ្ជាក់ថា៖«ជនម្នាក់នេះត្រូវតុលាការចោទបទរំលោភសេពសន្ថវៈមានស្ថានទម្ងន់ទោសទាក់ទងអាយុជនរងគ្រោះ»។
លោក យី វណ្ណដា អធិការនគរបាលក្រុងតាខ្មៅ ឱ្យដឹងនៅរសៀលថ្ងៃទី ៣១ សីហា ថា ក្មេងស្រីរងគ្រោះឈ្មោះ ណ.ដ. អាយុ ១០ ឆ្នាំរស់នៅជាមួយជនត្រូវចោទ និងម្តាយក្នុងសង្កាត់ដើមមៀន ក្រុងតាខ្មៅ។ ជនជាឪពុកចុងត្រូវបានសមត្ថកិច្ចរបស់លោកឃាត់ខ្លួននៅថ្ងៃទី ៣០ សីហា។ ការឃាត់ខ្លួននេះធ្វើទៅតាមពាក្យបណ្តឹងរបស់ម្តាយក្មេងស្រីរងគ្រោះតែប៉ុន្មានម៉ោងប៉ុណ្ណោះដែលស្ថិតនៅសង្កាតដើមមៀន ក្រុងតាខ្មៅ។
លោកប្រាប់ថា៖ «យើងឃាត់ខ្លួនជនល្មើសហ្នឹងក្នុងរយៈពេលតែ២ម៉ោងប៉ុណ្ណោះ។ យើងកសាងសំណុំរឿងទៅតុលាការតែម្តង»។
បើតាមលោក វណ្ណដា ករណីនេះបានកើតឡើងតាំងពីថ្ងៃទី ១៦ សីហា ឆ្នាំ ២០២១។ ប៉ុន្តែទើបបែកការណ៍នៅថ្ងៃទី ៣០ សីហា បន្ទាប់ពីម្តាយក្មេងស្រីរងគ្រោះឃើញកូនស្រីមានសភាពស្លេកស្លាំងខុសប្រក្រតី។ បន្ទាប់មកទើបក្មេងរងគ្រោះប្រាប់ម្តាយថាឪពុកខ្លួនចាប់រំលោភបាន៣ដងនៅក្នុងផ្ទះហើយឈឺចាប់ត្រង់ប្រដាប់ភេទ។
លោកឱ្យដឹងតាមសម្តីម្តាយក្មេងរងគ្រោះថា ស្រ្តីរងគ្រោះជាស្រ្តីមេម៉ាយ និងមានកូនស្រីតែម្នាក់គត់ជាមួយប្តីមុន និងយកគ្នាជាប្តីប្រពន្ធជាមួយជនល្មើសរយៈពេលជាង ៩ ឆ្នាំ និងបានកូនចំនួន ៣ នាក់បន្ថែមទៀត។ លោកបន្តទៀតថា ម្តាយក្មេងស្រីរងគ្រោះជាកម្មករកាត់ដេររោងចក្រ ហើយក្រោយពីកូនស្រីរបស់គាត់ប្រាប់ពីហេតុការណ៍ចាប់រំលោភនេះ ហើយក៏មកប្តឹងនៅនគរបាលប៉ុស្តិ៍ដើមមៀនតែម្តង៕
