.jpg)
ទីតាំងគម្រោងចាក់សំរាម នៅឃុំព្រែករាំង និងឃុំទឹកវិល ក្នុងស្រុកស្អាង ដែលពលរដ្ឋ ២៩២ គ្រួសារតវ៉ា។ រូបថត រដ្ឋបាលខេត្តកណ្តាល
កណ្តាលៈ តំណាងពលរដ្ឋ ២៩២ គ្រួសារ រស់នៅភូមិទួលខ្មួញ ឃុំព្រែករាំង និងឃុំទឹកវិល ស្រុកស្អាង បានដាក់ពាក្យស្នើសុំទៅធនាគារពិភពលោក ប្រចាំនៅកម្ពុជាឱ្យជួយអន្តរាគមន៍ផ្លាស់ប្តូរគម្រោងទីតាំងទុកដាក់ និងកែច្នៃសំរាមក្នុងស្រុកនេះ ដែលធ្វើឱ្យប៉ះពាល់ដល់ដីអាស្រ័យផលរបស់ពួកគេ។ ប៉ុន្តែមន្ត្រីរដ្ឋបាលខេត្តនេះអះអាងថា ដីក្នុងគម្រោងទីតាំងចាក់សំរាមនោះជាដីរដ្ឋមិនពាក់ព័ន្ធពលរដ្ឋឡើយ។
លោក រឿង សារ៉ុម តំណាងប្រជាពលរដ្ឋក្នុងឃុំទឹកវិល ថ្លែងនៅថ្ងៃទី ៣១ ខែសីហាថា ប្រជាពលរដ្ឋបានយកពាក្យទៅដាក់ នៅធនាគារពិភពលោកប្រចាំនៅកម្ពុជា កាលពីថ្ងៃទី ២៩ ខែសីហា ដើម្បីស្នើសុំជួយធ្វើអន្តរាគមន៍ ផ្លាស់ប្តូរទីតាំងទុកដាក់ និងកែច្នៃសំរាម ចេញពីទីតាំងតំបន់អាងទឹកព្រែករាំង ស្ថិតនៅក្នុងភូមិទួលខ្មួញ ភូមិព្រែករាំង និងឃុំទឹកវិល ស្រុកស្អាង ខេត្តកណ្តាល ព្រោះការបង្កើតទីតាំងចោលសំរាមនៅទីនេះ ធ្វើឲ្យប៉ះពាល់ដល់ដីអាស្រ័យផលរបស់ពលរដ្ឋ។
លោថ្លែងថា៖ «ឥឡូវគេមិនទាន់ធ្វើអីនៅលើទីតាំងនេះទេ ប៉ុន្តែពួកខ្ញុំផ្តិតមេដៃ ដាក់ពាក្យទៅហ្នឹងដើម្បីឲ្យមានការជួយពិនិត្យបន្ថែម សម្រាប់ការដោះស្រាយបញ្ហាជាមុន ព្រោះបើយើងអត់បានដាក់ពាក្យទៅ តែកាលណាគេមកចាក់ដី មកធ្វើអីនៅលើទីតាំងហ្នឹង យើងមិនអាចធ្វើការឃាត់បានទេ» ។
អ្នកស្រី ឆុំ សុធី តំណាងប្រជាពលរដ្ឋឃុំព្រែករាំង ថ្លែងនៅថ្ងៃទី ៣១ ខែសីហាថា រដ្ឋបាលខេត្តកណ្តាល បានចុះពិនិត្យ និងកំណត់យកទីតាំងក្បែរអាងស្តុកទឹកព្រែករាំង លើដីដែលប្រជាពលរដ្ឋអាស្រ័យផល ប្រមាណ ២០ហិកតា សម្រាប់ទុកដាក់ និងកែច្នៃសំរាម។
អ្នកស្រីបន្តថា បើទីតាំងខាងលើ ដំណើរការជាផ្លូវការនោះ នឹងមានផលប៉ះពាល់ធ្ងន់ធ្ងរជាទីបំផុត ចំពោះពលរដ្ឋភូមិទួលខ្មួញ និងភូមិព្រែករាំង ឃុំព្រែករាំង ព្រោះទីតាំងនោះ មានចម្ងាយតែប៉ុន្មានរយម៉ែត្រប៉ុណ្ណោះ ពីលំនៅដ្ឋានរបស់ពលរដ្ឋ។
អ្នកស្រីថ្លែងថា ៖«ផលប៉ះពាល់មានពីរយ៉ាង ទី១ បាត់បង់ដីដែលធ្លាប់អាស្រ័យផល តាំងពីឆ្នាំ ១៩៧៩ អាចធ្វើឲ្យយើងខ្ញុំត្រូវដាច់ពោះស្លាប់ និងទី២ ត្រូវបានអាជ្ញាធរយកសំរាមមកចាក់នៅក្បែរផ្ទះ ទទួលរងនូវក្លិនមិនល្អ ប៉ះពាល់ដល់សុខភាពធ្ងន់ធ្ងរ»។
ប៉ុន្តែលោក គ្រុយ ម៉ាឡែន នាយករដ្ឋបាលសាលាខេត្តកណ្តាល ថ្លែងនៅថ្ងៃទី ៣១ ខែសីហាថា រដ្ឋបាលខេត្តកណ្តាលបានធ្វើការសិក្សាទីតាំងចាក់សំរាម នៅស្រុកស្អាងនេះ ជាមួយមន្ត្រីធនាគារពិភពលោក ប្រចាំនៅកម្ពុជា។
មកដល់ថ្ងៃទី ៣១ ខែសីហានេះ រដ្ឋបាលខេត្ត កំពុងរង់ចាំការសម្រេចឆ្លើយតបមកវិញ ពីខាងធនាគារពិភពលោក បន្ទាប់ពីបានណែនាំទីតាំងចាក់សំរាម ដែលស្ថិតក្នុងស្រុកស្អាងនេះ សម្រាប់ការអនុវត្តគម្រោងកែលម្អការគ្រប់គ្រងសំណល់រឹង និងសំណល់ប្លាស្ទិក។
លោកថ្លែងថា៖ «យើងសង្ឃឹមថា ទីតាំងនោះ នឹងត្រូវលក្ខខណ្ឌដែលធនាគាពិភពលោកតម្រូវ ហើយខេត្តបានព្យាយាមដោះស្រាយបញ្ហាផ្សេងៗ ពាក់ព័ន្ធទីតាំងហ្នឹង ដើម្បីសម្រួលធ្វើយ៉ាងម៉េចឲ្យការអនុវត្តគម្រោងហ្នឹងអាចធ្វើទៅបាន» ។
បើតាមលោក គ្រុយ ម៉ាឡែន ក្រោយចុះទៅពិនិត្យមើលជាក់ស្តែង រដ្ឋបាលខេត្ត សម្រេចថា នឹងអាចកាត់ឆ្វៀលដីជូនដល់ធនាគារពិភពលោកអនុវត្តគម្រោង ១៥ ហិកតា ឬលើសពីនេះបន្តិច ដើម្បីធានាថា តម្រូវការជាក់ស្តែងរដ្ឋបាលខេត្តមិនខ្វះទីតាំងដី។
លោកបញ្ជាក់ថា ដីនៅទីនោះបានចុះបញ្ជីជាដីរដ្ឋរួចរាល់ហើយ។ ចំណែកមានប្រជាពលរដ្ឋមួយចំនួនតូច ដែលមានការតវ៉ានោះ អាជ្ញាធរកំពុងពិនិត្យនិងធ្វើកិច្ចការទៅតាមច្បាប់។
លោថ្លែងថា៖ «ជាក់ស្តែងការអនុវត្តនីតិវិធី យើងធ្វើចប់សព្វគ្រប់រួចរាល់អស់ហើយ យើងអត់មានពាក់ព័ន្ធ ប្រជាពលរដ្ឋដែលត្រូវកាន់កាប់ដីហ្នឹងទេ គឺដីហ្នឹងជាដីរដ្ឋ។ ចំណែកជនខិលខូចមួយចំនួន បំផុសបំផុលយ៉ាងណាលើដីនោះ ជារឿងផ្សេង ដែលត្រូវដោះស្រាយតាមច្បាប់» ។
លោក ប៊ូ សារឿន មន្ត្រីកិច្ចការសាធារណៈនៃការិយាល័យធនាគារពិភពលោកប្រចាំនៅកម្ពុជា ថ្លែងនៅថ្ងៃទី ៣១ ខែសីហាថា ធនាគារពិភពលោក ទើបបានទទួលលិខិតស្នើសុំពីតំណាងប្រជាពលរដ្ឋ ទាំង ២៩២ គ្រួសារ មកពីស្រុកស្អាងខេត្តកណ្តាល និងកំពុងពិនិត្យពិភាក្សាជុំវិញបញ្ហានេះ៕
វីដេអូ៖
