.jpg)
គណនីហ្វេសប៊ុកដែលកំពុងផ្សព្វផ្សាយផលិតផលគ្មានបញ្ជិកា។ រូបថត ក្រសួងសុខាភិបាល
ភ្នំពេញៈ ក្រសួងសុខាភិបាល ប្រកាសហាមឃាត់គណនីហ្វេសប៊ុកចំនួន ៨ ដែលកំពុងផ្សព្វផ្សាយលក់ផលិតផល បំប៉នសុខភាព លក់អាល់កុល និងផលិតផលសម្លាប់មេរោគគ្មានលេខបញ្ជិកា ឱ្យបញ្ឈប់សកម្មភាពជាបន្ទាន់ និងស្នើពលរដ្ឋមុននឹងទិញផលិតផល ឬឱសថគ្រប់ប្រភេទ ត្រូវពិនិត្យមើលលេខបញ្ជិកា លើសម្បកវេចខ្ចប់ឱ្យបានត្រឹមត្រូវ។
យោងតាមសេចក្ដីជូនព័ត៌មាន របស់ក្រសួងសុខាភិបាលចំនួន ២ ចុះថ្ងៃទី ២៦ និងថ្ងៃទី ៣០ ខែសីហា បានហាមឃាត់គណនីបណ្តាញសង្គមហ្វេសប៊ុក ឈ្មោះឃ្លាំងហ៊ូរមករា១៦៨, Home Store, BM Online shop និងសិប្បកម្មវេចខ្ចប់ទឹកសម្លាប់មេរោគ លក់អាល់កុល ដែលកំពុងផ្សព្វផ្សាយគ្មានលេខបញ្ជិកាពីក្រសួងសុខាភិបាល។
ចំណែកហ្វេសប៊ុកចំនួន ៤ ទៀតគឺ Quinn Healthy Glow, High Quality Au, Beauty Bliss Store និង Glowing healthy កំពុងផ្សព្វផ្សាយលក់ផលិតផលបំប៉នសុខភាពម៉ាក Swisseនិងផលិតផលបំប៉នសុខភាពមួយចំនួនទៀត គ្មានលេខបញ្ជិកាពីក្រសួងសុខាភិបាល។
ក្រសួងសុខាភិបាលបានឱ្យដឹងថា អនុលោមតាមច្បាប់ស្តីពីការគ្រប់គ្រងឱសថនិងច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថ តម្រូវឱ្យរាល់ការចរាចរផលិតផលឱសថឬផលិតផលដែលមានគុណភាពក្នុងការបង្ការ ឬព្យាបាលជំងឺគ្រប់ប្រភេទក្នុងព្រះរាជាណាចក្រកម្ពុជាត្រូវមានលេខទិដ្ឋាការឬលេខបញ្ជិកាពីក្រសួងសុខាភិបាល។
ក្រសួងបញ្ជាក់ថា៖ «សូមប្រជាពលរដ្ឋមុននឹងទិញផលិតផលឱសថ ឬផលិតផលបំប៉នសុខភាពគ្រប់ប្រភេទ សូមពិនិត្យមើលលតាបត្របញ្ជិកា ដែលមានបិទលើសម្បកវេចខ្ចប់ ហើយលតាបត្រដែលត្រឹមត្រូវគឺមាន ២ ផ្នែកទី១ ផ្នែកខាងលើ មានឈ្មោះគ្រឹះស្ថានអាហរ័ណនីហរ័ណឱសថ និងទី២ ផ្នែកខាងក្រោមមានលេខបញ្ជិកា»។
ក្រសួងសុខាភិបាលក៏បានជម្រាបជូនដល់បងប្អូនប្រជាពលរដ្ឋទាំងអស់ ត្រូវបញ្ឈប់ការប្រើប្រាស់ផលិតផលទាំងនោះជាបន្តទៀត ព្រោះផលិតផលទាំងនោះពុំអាចធានាបាននូវគុណភាពនិងសុវត្ថិភាពឡើយ។
ក្រសួងប្រាប់ពលរដ្ឋទាំងអស់ត្រូវឈប់ជឿការផ្សព្វផ្សាយផលិតផលបំប៉នសុខភាពម៉ាក Swisse គ្មានលេខបញ្ជិកា និងផលិតផលគ្មានលេខបញ្ជិកាផ្សេងៗទៀត ដែលកំពុងផ្សព្វផ្សាយលក់តាមហ្វេសប៊ុកទាំងនោះនិងត្រូវបញ្ឈប់ប្រើប្រាស់ផលិតផលទាំងនោះជាបន្តទៀត។
ក្រសួងសុខាភិបាលតម្រូវឱ្យម្ចាស់គណនីទាំងនោះ និងជនពាក់ព័ន្ធដទៃទៀត ត្រូវបញ្ឈប់ការនាំចូលចែកចាយឬផ្សព្វផ្សាយលក់ផលិតផលម៉ាក Swisse និងផលិតផលបំប៉នសុខភាពផ្សេងៗទៀត ដែលគ្មានលេខបញ្ជិកានេះជាបន្ទាន់។
ក្រសួងសុខាភិបាលបានព្រមានចាត់វិធានការតឹងរ៉ឹង ទៅតាមផ្លូវច្បាប់ចំពោះម្ចាស់គណនីទាំងនោះ និងជនពាក់ព័ន្ធទាំងឡាយណា ដែលនាំចូលចែកចាយឬផ្សព្វផ្សាយលក់ផលិតផលបំប៉នសុខភាពម៉ាក Swise និងផលិតផលផ្សេងៗទៀត ដែលគ្មានលេខបញ្ជិកាទៅតាមច្បាប់ស្តីពីវិសោធនកម្មច្បាប់ស្ដីពីការគ្រប់គ្រងឱសថជាធរមាន។
ក្នុងករណីប្រជាពលរដ្ឋបានជួបប្រទះឃើញជនណា កំពុងចែកចាយឬលក់ផលិតផលបំប៉នសុខភាពម៉ាក Swise និងផលិតផលផ្សេងៗទៀត ដែលគ្មានលេខបញ្ជិកា ក្រសួងឱ្យប្រញាប់ផ្ដល់ព័ត៌មាន ឬត្រូវការព័ត៌មានបន្ថែមពីនាយកដ្ឋានឱសថចំណីអាហារបរិក្ខារពេទ្យ និងគ្រឿងសំអាង សូមទំនាក់ទំនងទៅទូរស័ព្ទលេខ ០១២ ៣៥៥ ១៦១ ០១១ ៥៧៤ ៧៨៧ ០១២ ៩៨៣ ៣៣៤ ០១៧៦៦៧៧០ ០១២ ៥៦២ ៤៤៦ ០១៧ ៨៦៦ ៧៦០៕
