.jpg)
ស្ត្រីរងគ្រោះ ដែលត្រូវបានសង្គ្រោះពីតំបន់មួយក្នុងខេត្តហ្វូជៀន ប្រទេសចិន។ រូបថត ហ្វេសប៊ុក
ភ្នំពេញៈ ស្ថានទូតកម្ពុជានៅប្រទេសចិន និងសមត្ថកិច្ចចិនបានសហការគ្នាជួយសង្គ្រោះស្ត្រីខ្មែរម្នាក់កាលពីថ្ងៃទី ២៩ ខែសីហា ពីតំបន់ ១ កន្លែង ក្នុងស្រុកសុងស៊ីខោន ទីក្រុងណាភីង ខេត្តហ្វូជៀន ប្រទេសចិន បន្ទាប់ពីស្ត្រីរូបនេះបានសុំអន្តរាគមន៍ពីលោក ស ខេង រដ្ឋមន្ត្រីក្រសួងមហាផ្ទៃ។
លោក ជីវ ផល្លី ប្រធាននាយកដ្ឋានប្រឆាំងការជួញដូរមនុស្ស និងការពារអនីតិជនបានឱ្យដឹងនៅថ្ងៃទី ៣១ សីហា ថា៖ «កាលពីថ្ងៃទី ២៥ ខែ សីហា ឆ្នាំ ២០២១ គណនីហ្វេសប៊ុកមួយឈ្មោះ Bros Bee បានសរសេរសារផ្ញើចូលក្នុងគេហទំព័រហ្វេសប៊ុករបស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយសុំឱ្យសម្ដេចជួយអន្តរាគមន៍។ បន្ទាប់ពីទទួលបានព័ត៌មាននេះ មន្ត្រីជំនាញនាយកដ្ឋានបានធ្វើការស្រាវជ្រាវ ស៊ើបអង្កេតដោយបានរកឃើញទីតាំងដែលស្ត្រីនោះស្នាក់នៅ»។
លោក ជីវ ផល្លី ថ្លែងថា នារីរងគ្រោះឈ្មោះ អ៊ិត ឈូក អាយុ ៣០ ឆ្នាំ មានស្រុកកំណើតនៅឃុំនិទាន ស្រុកបសេដ្ឋ ខេត្តកំពង់ស្ពឺ ពេលនេះនារីរងគ្រោះត្រូវបានជួយសង្គ្រោះ និងមានសុវត្ថិភាព ហើយកំពុងស្នាក់នៅក្នុងស្ថានទូតកម្ពុជាប្រចាំប្រទេសចិន។
លោក ឆាយ គឹមខឿន អ្នកនាំពាក្យ អគ្គស្នងការរងនគរបាលជាតិប្រាប់នៅថ្ងៃទី ៣១ សីហាថា លោក មិនទាន់អាចដឹងបានថាមានស្ថានភាពប្រែប្រួលយ៉ាងណានោះទេនូវកម្រិត ឬក៏ស្ថានភាពនៃការជួញដូរមនុស្សឆ្លងដែន។
លោកថ្លែងថា៖ «យើងអាចដឹងបានដោយសារពេលគេបោកយកទៅ (ប៉ុន្តែ)ខាងក្រុមគ្រួសារគាត់អត់រាយការណ៍ឱ្យយើងដឹងទេ ពេលរងគ្រោះហើយទើបគាត់ស្នើសុំឱ្យយើងជួយ ពេលខ្លះយើងជួយហើយ ហើយយើងចង់រកមេខ្លោងក៏ត្រូវដាច់ខ្សែរយៈទៀត ព្រោះជនរងគ្រោះក៏លាក់ដែរ ដោយខ្លាចប៉ះពាល់កិត្តិយសគ្រួសារគាត់ ម្យ៉ាងអ្នកដែលឱ្យគេបោកប្រាស់ជួញដូរគឺឪពុកម្តាយរបស់គាត់តែម្តង»។
លោកថ្លែងថា៖ «ការបោកប្រាស់ពីការជួញដូរផ្លូវភេទដែលបច្ចុប្បន្ននេះមានរហូតដល់ការទំនាក់ទំនងគ្នាតាមផេចហ្វេសប៊ុក បន្ទាប់ពីចរចាគ្នាត្រូវរ៉ូវហើយថែមទាំងត្រូវមេខ្យល់ផ្តល់លុយកាក់ឱ្យក៏លួចចេញទៅបាត់ទៅ»៕
