ភ្នំពេញៈ វ៉ាក់សាំងស៊ីណូវ៉ាក់ចំនួន ២ លានដូសបន្ថែមទៀត ដែលជាការបញ្ជាទិញពីរាជរដ្ឋាភិបាលកម្ពុជាត្រូវបានដឹកមកដល់នាព្រឹកថ្ងៃទី ៣១ សីហា ខណៈមានការបញ្ជាទិញបន្ថែមចំនួន ៥ លានដូសទៀត សម្រាប់ធ្វើការចាក់ដូសទី៣ ឬដូសជំរុញ ទៅដល់ប្រជាពលរដ្ឋដែលជាគោលនយោបាយរបស់លោកនាយករដ្ឋមន្ត្រី ហ៊ុន សែន ក្នុងការចាក់ដូសជំរុញនេះដែលគ្រោងបញ្ចប់នៅពាក់កណ្តាលឆ្នាំ ២០២២។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានថ្លែងនៅក្នុងពេលចុះទទួលវ៉ាក់សាំងស៊ីណូវ៉ាក់នាព្រលានយន្តហោះអន្តរជាតិភ្នំពេញថា វ៉ាក់សាំងចំនួន ២ លានដូស ដែលទើបមកដល់នៅពេលនេះនឹងត្រូវធ្វើការរៀបចំចាក់ដូសជំរុញ ទៅដល់ប្រជាពលរដ្ឋទូទៅតាមផែនការរបស់រាជរដ្ឋាភិបាល។
លោកស្រីថ្លែងថា៖ «ការចាក់វ៉ាក់សាំង នៅក្នុងប្រទេសកម្ពុជាមានដំណើរការលឿនមែនទែន ហើយដូសជំរុញនេះជាដំបូងយើងចាក់ជូនទៅដល់ក្រុមជួរមុខ និងប្រជាពលរដ្ឋដែលមានការប្រឈម ហើយនៅបន្តទៀតរាជរដ្ឋាភិបាលនឹងបន្តចាក់ដល់ប្រជាពលរដ្ឋទូទៅក្នុងប្រជាពលរដ្ឋ ១០ លាននេះ និងជាបន្តបន្ទាប់អាចនឹងចាក់ដូសជំរុញនេះទៅដល់យ៉ាងហោចណាស់ប្រជាជន ១២ លាននាក់»។
បើតាមលោកស្រី យក់ សម្បត្តិ មកដល់ត្រឹមចុងខែសីហានេះ កម្ពុជាទទួលបានវ៉ាក់សាំងកូវីដ ១៩ នៅក្នុងដៃសរុបចំនួនជាង ២៧ លានដូសហើយ ទាំងវ៉ាក់សាំងបានមកពីការទិញ និងវ៉ាក់សាំងជំនួយ។ ប្រមុខរាជរដ្ឋាភិបាលក៏បានធ្វើការបញ្ជាទិញវ៉ាក់សាំងស៊ីណូវ៉ាក់បន្ថែមទៀតចំនួន ៥ លានដូសដែលនឹងគ្រោងដឹកមកដល់កម្ពុជានៅក្នុងខែកញ្ញា។
ទាក់ទងនឹងគម្រោងចាក់វ៉ាក់សាំងកូវីដ ១៩ ទៅដល់កុមារអាយុក្រោម ១២ ឆ្នាំ លោកស្រី យក់ សម្បត្តិ បញ្ជាក់ថា ក្រុមគណៈកម្មការជំនាញនៃក្រសួងសុខាភិបាលកំពុងតែធ្វើការសិក្សាជាបន្តបន្ទាប់ ជាមួយនឹងអង្គការដៃគូ ក្នុងនោះមានអង្គការសុខភាពពិភពលោកជាពិសេសជាមួយនឹងក្រុមហ៊ុនផលិតវ៉ាក់សាំងមួយចំនួន។
លោកស្រីប្រាប់ថា៖ «ប្រសិនបើមានតម្រូវការចាំបាច់ ក្នុងការចាក់វ៉ាក់សាំងនេះទៅដល់មនុស្សក្រោមអាយុ ១២ ឆ្នាំទៀត ខ្ញុំគិតថា ប្រមុខរាជរដ្ឋាភិបាលនឹងធ្វើការសម្រេចដ៏ខ្ពង់ខ្ពស់ថានឹងត្រូវចាក់ដល់កុមារកម្ពុជាយើងទៀត លោកនឹងមិនព្រងើយកន្តើយលើរឿងនេះដើម្បីធ្វើឱ្យភាពសុំាកាន់តែមានភាពទូលំទូលាយ ការពារពីជំងឺនេះ»។
ទាក់ទងនឹងការចាក់ដូសទី ៣ លោក ហ៊ុន សែន បានបញ្ជាក់ទៅដល់ប្រជាពលរដ្ឋទូទៅកុំឱ្យមានការបារម្ភពីការចាក់ដូសទី ៣ នេះ ដោយរដ្ឋាភិបាលនឹងផ្តល់ការចាក់វ៉ាក់សាំងដូសទី ៣ ទៅដល់គ្រប់ៗគ្នា នៅពេលដែលវ៉ាក់សាំងចំនួន ៥ លានដូសដែលនឹងមកដល់ក្នុងខែកញ្ញា។
លោកនាយករដ្ឋមន្ត្រីបានបញ្ជាក់ដូចនេះកាលពីយប់ថ្ងៃទី ២៨ សីហា ក្នុងបណ្តាញសង្គមរបស់លោក ដោយបន្ថែមថា៖ «សុំកុំបារម្ភ ព្រោះយើងនឹងចាក់ដូសទី ៣ ជូនគ្រប់ៗគ្នាហើយវ៉ាក់សាំងសម្រាប់ចាក់ដូសទី ៣ នឹងមកដល់ក្នុងខែកញ្ញានេះ»។
បើតាមរបាយការណ៍របស់ក្រសួងសុខាភិបាល គិតត្រឹមយប់ថ្ងៃទី ៣០ សីហា អ្នកដែលបានចាក់ដូសទី៣ មានជាង ៦១ ម៉ឺននាក់ ខណៈដែលចំនួនសរុបនៃអ្នកចាក់វ៉ាក់សាំងចាប់ពីអាយុ ១២ ឆ្នាំឡើងទៅ បានចំនួនជាង ១០ លាននាក់ហើយនៃប្រជាពលរដ្ឋដែលត្រូវចាក់ចំនួន ១២ លាននាក់ នៅទូទាំងប្រទេស។
គួររំឭកផងដែរថា លោកនាយករដ្ឋមន្ត្រីបានសម្រេចដាក់ចេញនូវគោលនយោបាយចាក់វ៉ាក់សាំងកូវីដ ១៩ ដូសជំរុញ ដល់ប្រជាជនទូទៅដែលមានអាយុពី ១២ ឆ្នាំឡើងទៅ ដោយចាប់ផ្តើមពីខែសីហាឆ្នាំ ២០២១ រហូតដល់អំឡុងពាក់កណ្តាលឆ្នាំ ២០២២ ដោយលោកបានសម្រេចបន្តយកមិត្តចិន ធ្វើជាបង្អែកផ្នែកយុទ្ធសាស្ត្រក្នុងការផ្គត់ផ្គង់វ៉ាក់សាំងដល់កម្ពុជា ហើយប្រភពផ្សេងទៀតនៅបន្តជាប្រភពគាំទ្រ។
អ្នកអាទិភាពចាក់វ៉ាក់សាំងដូសជំរុញនេះត្រូវផ្តើមចេញពីក្រុមមន្ត្រីសុខាភិបាល និងមន្ត្រីបម្រើការជួរមុខក្នុងការប្រយុទ្ធនឹងជំងឺកូវីដ ១៩ និងចាប់ផ្តើមពីតំបន់ដែលមានហានិភ័យខ្ពស់ ប្រជាពលរដ្ឋដែលមានអាយុចាប់ពី ៦០ ឆ្នាំឡើងទៅ និងប្រជាពលរដ្ឋដែលមានប្រព័ន្ធការពាររាងកាយខ្សោយមុននឹងបន្តទៅចាក់ជូនពលរដ្ឋទូទៅ។
ក្រសួងសុខាភិបាលប្រកាសកាលពីសប្តាហ៍មុនថា សម្រាប់ប្រជាជនទូទៅ ការចាក់វ៉ាក់សាំងដូសទី៣ គួរធ្វើឡើងនៅចន្លោះខែទី ៦ និងខែទី ៨ បន្ទាប់ពីទទួលការចាក់វ៉ាក់សាំងមូលដ្ឋានបានគ្រប់ដូស ឯមន្ត្រីបម្រើការជួរមុខ មនុស្សចាស់អាយុចាប់ពី ៦០ ឆ្នាំឡើង និងអ្នកដែលមានប្រព័ន្ធការពាររាងកាយខ្សោយ អាចចាក់នៅចន្លោះខែទី ៤ និងខែទី ៦ បាន។
ជាមួយគ្នានេះ ក្រសួងសុខាភិបាលប្រកាសរកឃើញអ្នកឆ្លងវីរុសកូវីដ ១៩ បំប្លែងថ្មីប្រភេទដែលតា បន្ថែមទៀតចំនួន ១៦៤ ករណីក្នុងរយៈពេល ២ ថ្ងៃ ពីថ្ងៃទី ២៩-៣០ សីហា ដែលធ្វើឱ្យកម្ពុជាមកដល់ពេលនេះមានអ្នកឆ្លងវីរុសប្រភេទនេះជិត ២ ០០០ នាក់ហើយ ក្នុងរាជធានី-ខេត្ត ចំនួន ២៣ លើកលែងតែខេត្តចំនួន ២ ប៉ុណ្ណោះ គឺខេត្តកែប និងខេត្តក្រចេះ។
សេចក្តីប្រកាសព័ត៌មានរបស់ក្រសួងសុខាភិបាលនៅព្រឹកថ្ងៃទី ៣១ សីហា បានឱ្យដឹងថា លទ្ធផលនៃការវិភាគរបស់វិទ្យាស្ថានប៉ាស្ទ័រកម្ពុជា និងវិទ្យាស្ថានស្រាវជ្រាវសុខភាពសាធារណៈចាប់តាំងពីចុងខែមីនា រហូតដល់ថ្ងៃទី ៣០ សីហា កម្ពុជាមានអ្នកឆ្លងវីរុសប្រភេទដែលតាសរុបចំនួន ១ ៩១៦ នាក់ ក្នុងនោះរាជធានីភ្នំពេញមានអ្នកឆ្លងច្រើនជាងគេរហូតដល់ ៦១៨ នាក់៕