ភ្នំពេញៈ ក្រសួងអប់រំ យុវជន និងកីឡា តាមរយៈវិទ្យាស្ថានជាតិអប់រំ បានចុះអនុស្សរណៈជាមួយក្រុមហ៊ុនផុស្ការឌីជីថល ឯ.ក នៅថ្ងៃទី ៣១ ខែសីហា ហើយបានប្រកាសដាក់ឱ្យប្រើប្រព័ន្ធសាលារៀនឌីជីថល វីគីស្គូល «Wiki School» ដើម្បីលើកកម្ពស់ការដឹកនាំ ការគ្រប់គ្រង និងអភិបាលកិច្ចល្អ និងជួយដល់ការរៀន និងការបង្រៀនតាមបែបឌីជីថល។
ការប្រកាសដាក់ឱ្យប្រើប្រាស់នូវប្រព័ន្ធសាលារៀនឌីជីថល «Wiki School» ដែលមានកម្មវិធីគ្រប់គ្រងសាលាជាច្រើននេះធ្វើឡើងក្រោមអធិបតីភាពលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាថ្នាក់ដឹកនាំក្រុមហ៊ុនផុស្ការឌីជីថល ឯ.ក (Poscar Digital) រួមនឹងមន្ដ្រីមកពីក្រសួងអប់រំ និងក្រុមការងារក្រុមហ៊ុនសរុបប្រមាណ ១៤១ នាក់ទៀតតាមប្រព័ន្ធវីដេអូអនឡាញ។
លោក ហង់ជួន ណារ៉ុន បានថ្លែងថា កិច្ចសហការរវាងក្រុមហ៊ុនផុស្ការឌីជីថល ជាមួយនឹងក្រសួងអប់រំនេះ គឺមិនមែនជាលើកទី ១ ទេ គឺបានសហការគ្នាតាំងពីឆ្នាំ ២០១៨ មក ហើយក៏កំពុងបន្តកិច្ចសហការគ្នាក្នុងពេលមានការរីករាលដាលជំងឺកូវីដ ១៩ នេះផងដែរ ក្នុងការដាក់ឱ្យប្រើនូវឯកសារឌីជីថលជាច្រើនដើម្បីអាចឱ្យសិស្សរៀនតាមអនឡាញ។
លោករដ្ឋមន្ដ្រីថ្លែងថា៖ «ការដាក់ឱ្យប្រើប្រាស់ប្រព័ន្ធគ្រប់គ្រងសាលាឌីជីថលនេះគឺជួយពង្រឹងមិនត្រឹមតែការសិក្សារបស់សិស្សទេ ប៉ុន្ដែក៏ជួយពង្រឹងនូវការគ្រប់គ្រងសាលារៀនធ្វើឱ្យគ្រឹះស្ថានសិក្សាមានគណនេយ្យភាពចំពោះសិស្ស និងមាតាបិតាសិស្សធ្វើឱ្យគ្រូមានគណនេយ្យភាពចំពោះគណៈគ្រប់គ្រងផងដែរ»។
លោកថា៖ «ប្រព័ន្ធគ្រប់គ្រងសាលារៀនតាមបែបឌីជីថលនេះមានសារៈសំខាន់ណាស់ក្នុងការផ្លាស់ប្ដូរប្រព័ន្ធអប់រំតាមបែបឌីជីថល។ គ្រូអាចប្រើប្រព័ន្ធនេះដើម្បីបង្រៀនពីចម្ងាយក្នុងពេលបិទសាលា ដោយប្រើនូវកម្មវិធី Zoom ឬ Google Switch ហើយគណៈគ្រប់គ្រងមានលទ្ធភាពត្រួតពិនិត្យការបង្រៀនរបស់គ្រូ»។
លោករដ្ឋមន្ដ្រីបានឱ្យដឹងថាកន្លងទៅក៏មានក្រុមហ៊ុនឯកជនមួយចំនួនទៀតបានដាក់អនុវត្ដប្រព័ន្ធគ្រប់គ្រងសាលារៀនតាមបែបឌីជីថល និងអេហ្វ (Apps) សម្រាប់ជួយដល់ការគ្រប់គ្រងសាលារៀន ការរៀន និងការបង្រៀនរបស់ក្រសួងអប់រំផងដែរ។ ក្នុងនោះមានគ្រឹះស្ថានសិក្សាសាលាជំនាន់ថ្មី ដូចជា វិទ្យាល័យព្រះស៊ីសុវត្ថិ វិទ្យាល័យទួលទំពូង និងគ្រឹះស្ថានសិក្សាឯកជនមួយចំនួនទៀតក៏បានចាប់ផ្ដើមប្រើប្រាស់ប្រព័ន្ធនេះដែរ។
លោក ងន់ ម័រ សហស្ថាបនិកក្រុមហ៊ុនផុស្ការបានឱ្យដឹងថា វីគីស្គូល ត្រូវបានអភិវឌ្ឍដោយក្រុមបច្ចេកទេស សុទ្ធតែជាបញ្ញវន្តខ្មែរ ដែលមានបទពិសោធជិត ២០ ឆ្នាំ ក្នុងវិស័យអប់រំ និងផ្នែកបច្ចេកវិទ្យាទំនើប។
ការបង្កើតប្រព័ន្ធនេះ ដើម្បីជួយដល់សាលារៀនឱ្យគ្រប់គ្រងរបាយការណ៍ផ្សេងៗបានឆាប់រហ័សកាត់បន្ថយការបោះពុម្ពរបាយការណ៍ សេចក្តីជូនដំណឹងដោយមានជំនួយពី Mobile App Wiki School។
លោកបានថ្លែងថា៖ «វីគីស្គូល មានទស្សនវិស័យបង្កើតប្រព័ន្ធសាលារៀនឌីជីថលនៅកម្ពុជា។
បេសកកម្មរបស់យើង គឺភ្ជាប់បណ្ដាញសាលារៀនទាំងអស់នៅកម្ពុជា តាមរយៈគុណតម្លៃរបស់ថ្នាក់ដឹកនាំក្រុមហ៊ុនដែលមានជំនាញ និងបទពិសោធជិត ២០ ឆ្នាំ លើវិស័យអប់រំ និងបច្ចេកវិទ្យាព័ត៌មាន»។
លោកបានឱ្យដឹងថា កន្លងមកនេះក្រុមហ៊ុនបានសហការរៀបចំប្រព័ន្ធវីគីស្គូល និងឧបករណ៍វត្តមានឌីជីថលនៅទីស្តីការក្រសួង អប់រំ សាលាភូមិន្ទរដ្ឋបាល សាលាជំនាន់ថ្មីនៃវិទ្យាល័យព្រះស៊ីសុវត្ថិសាលារាជធានីភ្នំពេញ ក្រសួងព័ត៌មាន និងសាលាឯកជនជាច្រើនទៀតនៅរាជធានីភ្នំពេញ។
លោកបានបន្តថា សព្វថ្ងៃក្រុមហ៊ុនកំពុងសហការជាមួយក្រសួងអប់រំក្នុងការផ្តល់មធ្យោបាយសិក្សាពីចម្ងាយសម្រាប់ថ្នាក់បឋមសិក្សា ដល់ថ្នាក់វិទ្យាល័យ ហើយក្រុមហ៊ុនក៏កំពុងតែជួយដល់ថ្នាក់ឧត្តមសិក្សាបន្ថែមផងដែរ។
លោក សៀវ សុវណ្ណា នាយកវិទ្យាស្ថានជាតិអប់រំបានថ្លែងថា កន្លងមក វិទ្យាស្ថានជាតិអប់រំបានស្នើសុំក្រុមហ៊ុនផុស្ការ ជួយផ្គត់ផ្គង់ និងបំពាក់ប្រព័ន្ធគ្រប់គ្រងសាលារៀនឌីជីថលវីគីស្គូល និងវិទ្យាស្ថានជាតិអប់រំ ដើម្បីលើកកម្ពស់ការដឹកនាំ ការគ្រប់គ្រង និងអភិបាលកិច្ចល្អ។
លោកបានបន្តថា ជាការឆ្លើយតបក្រុមហ៊ុនផុស្ការបានសម្រេចឧបត្ថម្ភដល់វិទ្យាស្ថានជាតិអប់រំនូវប្រព័ន្ធគ្រប់គ្រងសាលារៀនឌីជីថលខ្នាតធំមួយដែលអាចរក្សាទុកទិន្នន័យក្នុងម៉ាស៊ីនផ្ទុកទិន្នន័យ (SeverMachine) ក្នុងរយៈពេល ៧ ឆ្នាំ និងម៉ាស៊ីនវត្ដមានឌីជីថលចំនួន ៤ គ្រឿងដោយឥតគិតថ្លៃ ចាប់ពីខែសីហា ឆ្នាំ ២០២១ ដល់ខែសីហា ឆ្នាំ ២០២៨។
លោកថា៖ «ក្រុមហ៊ុនគ្រោងចំណាយថវិកា ១២ ម៉ឺនដុល្លារអាមេរិកលើការបំពាក់ប្រព័ន្ធគ្រប់គ្រងសាលារៀន វីគីស្គូល រួមទាំងឧបករណ៍វត្ដមានឌីជីថលចំនួន ៤ គ្រឿង លើការបណ្ដុះបណ្ដាលដល់មន្ដ្រីគ្រប់គ្រងតាមជំនាញឱ្យចេះប្រើប្រាស់ប្រព័ន្ធអប់រំបែបឌីជីថល និងគាំទ្រថែទាំបច្ចេកទេស»៕
វីដេអូ៖