.jpg)
ក្រសួងអប់រំសម្របសម្រួលការបង្កើតគោលនយោបាយជាតិស្តីពីការគាំពារ និងអភិវឌ្ឍន៍កុមារតូច។ រូបថត MoEYS
កុមារតូចដែលចាប់ពីកំណើតរហូតដល់អាយុក្រោម ៦ ឆ្នាំ តែងមានការអភិវឌ្ឍលើផ្នែករាងកាយ និងស្មារតី ដែលជាតម្រូវការចាំបាច់សម្រាប់កុមារ។ ផ្នែកទាំងនេះតែងលូតលាស់ទន្ទឹមគ្នា ហើយជះឥទ្ធិពលឱ្យគ្នាទៅវិញទៅមក។ អត្ថបទប្រចាំខែកញ្ញា ឆ្នាំ ២០២១ នេះផ្ដោតលើការអប់រំកុមារតូច ដោយយោងលើ «គោលនយោបាយជាតិស្ដីពីការគាំពារ និងអភិវឌ្ឍន៍កុមារតូច» និង «ផែនការយុទ្ធសាស្ត្រសម្រាប់វិស័យអប់រំ ឆ្នាំ ២០១៩-២០២៣» សម្រាប់អនុវិស័យការអប់រំកុមារតូច។ បន្ទាប់មកនឹងមានខ្លឹមសារទាក់ទងនឹងការបង្កើតវីដេអូឃ្លីបស្ដីពី «លំនាំសកម្មភាពងាយៗសម្រាប់មាតាបិតា និងអ្នកអាណាព្យាបាលអនុវត្តជាមួយកូននៅតាមផ្ទះ» រួមជាមួយចំណុចណែនាំល្អៗក្នុងការបំបៅដោះកូន ដែលជាចំណែកសំខាន់ក្នុងការចូលរួមដល់ការអភិវឌ្ឍការអប់រំកុមារតូចផងដែរ។
ការវិនិយោគលើកុមារតូចតែងតែទទួលបានផលជាវិជ្ជមាន ឬអវិជ្ជមានក្នុងរយៈពេលវែងលើលទ្ធផលនៃការអភិវឌ្ឍ និងការអប់រំរបស់ពួកគេនាពេលអនាគត។ ជាក់ស្តែងការស្រាវជ្រាវជាច្រើនបានឱ្យដឹងថា កុមារដែលបានឆ្លងកាត់សេវាអប់រំកុមារតូច ឬការអប់រំនៅកម្រិតមត្តេយ្យសិក្សាគ្រប់រូបភាព តែងតែបានចូលរៀននៅសាលាបឋមសិក្សានៅអាយុ ៦ ឆ្នាំប្រកបដោយគុណភាព ហើយរៀនចប់បឋមសិក្សាដោយពុំមានការត្រួតថ្នាក់ និងបោះបង់ការសិក្សាឡើយ។
ក្នុងបរិបទនៃការធ្វើសមាហរណកម្មក្នុងតំបន់ និងពិភពលោក សេវាអប់រំកុមារតូចបានដើតួនាទីយ៉ាងសំខាន់ក្នុងការធ្វើឱ្យសម្រេចគោលដៅនៃការអប់រំ។ ទោះជាមានការខិតខំប្រឹងយ៉ាងណាក៏ដោយ ក៏នៅមានចំណុចសេសសល់មួយចំនួនទៀត ដែលត្រូវចាត់ជារបៀបវារៈអាទិភាព និងប្រែក្លាយជាសកម្មភាពចាំបាច់ ឆ្លើយតបតម្រូវការអភិវឌ្ឍន៍របស់កុមារតូច។
ដើម្បីឆ្លើយតបនឹងបញ្ហាប្រឈមដែលនៅសេសសល់កន្លងមក និងសម្រេចគោលដៅ ៤.២ នៃគោលដៅអភិវឌ្ឍន៍ប្រកបដោយចីរភាព (SDGs 4.2) ដែលបានកំណត់ថា «នៅឆ្នាំ ២០៣០ ធានាថា កុមារតូចគ្រប់រូបនឹងទទួលបាននូវការអភិវឌ្ឍន៏ទាំងការថែរក្សា និងការអប់រំនៅកម្រិតមត្តេយ្យសិក្សាប្រកបដោយគុណភាព សម្រាប់ត្រៀមខ្លួនគ្រប់គ្រាន់សិក្សានៅកម្រិតបឋមសិក្សា»។
សាលា/ថ្នាក់មត្តេយ្យសិក្សា ជាមជ្ឈមណ្ឌលដ៏ពិសិដ្ឋសម្រាប់រៀបចំកុមារឱ្យបានត្រៀមខ្លួនរួចជាស្រេចមុននឹងពួកគេចូលរៀននៅកម្រិតបឋមសិក្សា និងបានត្រៀមខ្លួនគ្រប់ជ្រុងជ្រោយសម្រាប់ការសិក្សាពេញ ១ ជីវិត ព្រោះថា ប្រសិទ្ធភាពនៃសកម្មភាពរៀន និងបង្រៀននៅកម្រិតមត្តេយ្យសិក្សា បានបង្ហាញពីភាពផ្សារភ្ជាប់គ្នារវាងការសិក្សានៅមត្តេយ្យសិក្សា និងគុណភាពសិក្សារបស់កុមារនៅកម្រិតបឋមសិក្សា។
ក្រសួងអប់រំ យុវជន និងកីឡាបានដឹកនាំ និងសម្របសម្រួលក្នុងការរៀបចំគោលនយោបាយជាតិស្ដីពី «ការគាំពារ និងអភិវឌ្ឍន៍កុមារតូច» និងបានទទួលការឯកភាពពីគណៈរដ្ឋមន្ត្រីក្នុងសម័យប្រជុំពេញអង្គនាថ្ងៃទី ១៩ ខែកុម្ភៈ ឆ្នាំ ២០១០។ គោលនយោបាយជាតិស្ដីពីការគាំពារ និងអភិវឌ្ឍន៍កុមារតូច មានចក្ខុវិស័យក្នុងការធ្វើឱ្យកុមារតូចទាំងអស់ចាប់ពីកំណើតរហូតដល់អាយុក្រោម ៦ ឆ្នាំ ត្រូវទទួលបានសេវាគាំពារ និងអភិវឌ្ឍន៍ជាពិសេសកុមារតូចរងគ្រោះ កុមារតូចងាយរងគ្រោះ និងក្រខ្សត់ ដែលស្របតាមរដ្ឋធម្មនុញ្ញនៃព្រះរាជាណាចក្រកម្ពុជា។
គោលនយោបាយនេះបានកំណត់គោលដៅ និងគោលបំណងចម្បងចំនួន ៦ គឺ (១) ស្ត្រីទាំងអស់ទទួលបាននូវសេវាថែទាំ និងសេវាអប់រំសុខភាព ព្រមទាំងអាហារូបត្ថម្ភនៅពេលមានផ្ទៃពោះ (២) កុមារតូចទាំងអស់ទទួលបានការចុះបញ្ជីកំណើត ការថែទាំ ពិនិត្យសុខភាពជាប្រចាំ ថ្នាំបង្ការគ្រប់គ្រាន់ អាហារូបត្ថម្ភគ្រប់គ្រាន់ និងទទួលបានការហាត់រៀនពីដំបូង (៣) កុមារតូចទាំងអស់មានលក្ខណៈត្រៀមជាស្រេច ដើម្បីចូលរៀនថ្នាក់ទី ១ នៅអាយុ ៦ ឆ្នាំ (៤) បុគ្គលិកបច្ចេកទេស អ្នកថែទាំកុមារតូច មាតាបិតា និងអ្នកអាណាព្យាបាលមានចំណេះដឹងគ្រប់គ្រាន់លើការគាំពារ និងអភិវឌ្ឍន៍កុមារតូច (៥) គ្រប់ក្រសួង ស្ថាប័នពាក់ព័ន្ធទាំងអស់សហការគ្នាយ៉ាងជិតស្និទ្ធ ដើម្បីដោះស្រាយបញ្ហាដែលទាក់ទងនឹងការគាំពារ និងអភិវឌ្ឍន៍កុមារតូច (៦) កុមារតូចចាប់ពីប្រសូត រហូតដល់ពេលចូលរៀន មានការរីកចម្រើនផ្នែករាងកាយ ចំណេះដឹង ប្រាជ្ញា និងអារម្មណ៍នៅតាមផ្ទះរបស់ខ្លួន ព្រមទាំងតាមមណ្ឌលដែលផ្ដល់សេវាសុខភាព អាហារូបត្ថម្ភ និងអប់រំប្រកបដោយគុណភាព និងនិរន្តរភាព។
នៅក្នុងគោលនយោបាយស្ដីពីការគាំពារ និងអភិវឌ្ឍន៍កុមារតូចនេះផងដែរ រាជរដ្ឋាភិបាលបានដាក់ចេញនូវយុទ្ធសាស្ត្រសំខាន់ៗមួយចំនួន ដែលតម្រូវឱ្យមានការចូលរួមអនុវត្តតួនាទី ភារកិច្ច និងសម្របសម្រួលពីសំណាក់ក្រសួងស្ថាប័នពាក់ព័ន្ធ ដៃគូអភិវឌ្ឍន៍ ព្រមទាំងសង្គមស៊ីវិល ក្នុងគោលបំណងគាំទ្រ គាំពារ និងអភិវឌ្ឍន៍កុមារតូចឱ្យមានប្រសិទ្ធភាព។ នៅខែមេសា ឆ្នាំ ២០១៣ គណៈកម្មាធិការជាតិគាំពារ និងអភិវឌ្ឍន៍កុមារតូច (គ.ជ.គ.ក) ត្រូវបានបង្កើតឡើង និងមានតួនាទីជាអ្នកទទួលបន្ទុកលើការអនុវត្តផែនការសកម្មភាពជាតិស្ដីពីការគាំពារ និងអភិវឌ្ឍន៍កុមារតូច។
នៅក្នុងផែនការយុទ្ធសាស្ត្រវិស័យអប់រំឆ្នាំ ២០១៩-២០២៣ ក្រសួងអប់រំ យុវជន និងកីឡាបានដាក់ចេញគោលនយោបាយ និងយុទ្ធសាស្ត្រអាទិភាពនានា ក្នុងគោលបំណងពង្រឹងសេវាអប់រំកុមារតូចឱ្យមានគុណភាព ប្រកបដោយសមធម៌ បរិយាប័ន្ន និងលើកកម្ពស់គុណភាពមត្តេយ្យសិក្សាឱ្យស្របតាមស្ដង់ដា ព្រមទាំងពង្រឹងសមត្ថភាពអ្នកគ្រប់គ្រងអនុវិស័យកុមារតូច។ ក្នុងន័យនេះ ក្រសួងអប់រំ យុវជន និងកីឡាបានដាក់ចេញនូវវត្ថុបំណង និងយុទ្ធសាស្ត្រមួយចំនួនសម្រាប់អនុវិស័យអប់រំកុមារតូច ដូចជា៖
វត្ថុបំណងអនុវិស័យទី១ «បង្កើនលទ្ធភាពទទួលបានសេវាអប់រំកុមារតូចប្រកបដោយគុណភាព សមធម៌ និងបរិយាប័ន្ន» មានយុទ្ធសាស្ត្រចំនួន ៥ គឺ (១) បន្តបង្កើតមត្តេយ្យសិក្សានៅតាមសាលាបឋមសិក្សា និងអភិវឌ្ឍសាលាមត្តេយ្យសិក្សារដ្ឋ (២) អភិវឌ្ឍមត្តេយ្យសិក្សាសហគមន៍ដែលមានស្ដង់ដារទៅជាឧបសម្ព័ន្ធនៃគ្រឹះស្ថានសិក្សារដ្ឋ និងប្រែក្លាយមត្តេយ្យសិក្សាសហគមន៍ដែលមានលក្ខណៈស្ដង់ដាឱ្យទៅជាមត្តេយ្យសិក្សារដ្ឋ (៣) លើកកម្ពស់កម្មវិធីអប់រំមាតាបិតាតាមគ្រឹះស្ថានសិក្សាសាធារណៈ ជាពិសេសអន្តរាគមន៍ការគាំពារកុមារក្នុងរយៈពេល ១០០០ ថ្ងៃដំបូងនៃកំណើត (អាយុ ០ ទៅ ៣ ឆ្នាំ) (៤) ពង្រីកកម្មវិធីអប់រំបរិយាប័ន្ន សម្រាប់កុមារមានពិការភាពនៅមត្តេយ្យសិក្សារដ្ឋ និងមត្តេយ្យសិក្សាសហគមន៍ និង (៥) ផ្ដល់ទឹកស្អាត អនាម័យ និងអាហារូបត្ថម្ភ ព្រមទាំងលើកកម្ពស់សុខភាពនៅតាមសាលាមត្តេយ្យសិក្សា។
វត្ថុបំណងអនុវិស័យទី ២ «បន្តអភិវឌ្ឍសាលាមត្តេយ្យសិក្សាឱ្យស្របតាមស្ដង់ដារគុណភាព» មានយុទ្ធសាស្ត្រចំនួន ៣ គឺ (១) ពង្រឹងគុណភាពនៃការបណ្ដុះបណ្ដាល និង វិក្រឹតការគ្រូមត្តេយ្យសិក្សាឱ្យឆ្លើយតបតាមស្ដង់ដារ (២) ពង្រឹងអធិការកិច្ច និងវាយតម្លៃប្រព័ន្ធសេវាអប់រំកុមារតូច និង (៣) ពង្រឹងការអនុវត្តកម្មវិធីសិក្សា ការប្រើប្រាស់សម្ភារបង្រៀន និងរៀនសម្រាប់ការអប់រំកុមារតូចស្របតាមស្ដង់ដារ។
វត្ថុបំណងអនុវិស័យទី ៣ «ពង្រឹងសមត្ថភាពអ្នកគ្រប់គ្រងអនុវិស័យការអប់រំកុមារតូច និងអនុវត្តការគ្រប់គ្រងសាលារៀន» មានយុទ្ធសាស្ត្រចំនួន ២ គឺ (១) អភិវឌ្ឍសមត្ថភាព និងពង្រឹងយន្តការអនុវត្តតួនាទី និងទំនួលខុសត្រូវរបស់មន្ត្រីគ្រប់គ្រងអនុវិស័យការអប់រំកុមារតូច និង (២) ពង្រឹងអភិបាលកិច្ចល្អ លើការងារអប់រំកុមារតូច និងការរៀបចំផែនការ ផ្អែកលើលទ្ធផលការគ្រប់គ្រង និងការពិនិត្យតាមដាន និងវាយតម្លៃតាមរយៈការអនុវត្តការគ្រប់គ្រងតាមសាលារៀន។
ការអប់រំនៅកម្រិតមត្តេយ្យមានសារៈសំខាន់សម្រាប់ត្រៀមខ្លួននៅកម្រិតបឋមសិក្សា។
ដោយមើលឃើញពីការឈានចូលក្នុងបរិបទឧស្សាហកម្ម ៤.០ និងស្ថានភាពនៃការរីករាលនៃជំងឺកូវីដ ១៩ នៅលើពិភពលោក និងនៅកម្ពុជា ព្រមទាំងជាផ្នែកមួយនៃការអប់រំក្នុងបរិបទថ្មីតាមរយៈការប្រើប្រាស់បច្ចេកវិទ្យាឌីជីថល និងការសិក្សាពីចម្ងាយ ក្រសួងអប់រំ យុវជន និងកីឡា បាននឹងកំពុងរៀបចំបង្កើតវីដេអូឃ្លីបស្ដីពី «លំនាំសកម្មភាពងាយៗសម្រាប់មាតាបិតា និងអ្នកអាណាព្យាបាលអនុវត្តជាមួយកូននៅតាមផ្ទះ» ជាពិសេសនៅក្នុងអំឡុងពេលនៃការផ្អាកដំណើរការរបស់សាលារៀន។ វីដេអូឃ្លីបស្ដីពី លំនាំសកម្មភាពងាយៗសម្រាប់មាតាបិតា អ្នកអាណាព្យាបាលអនុវត្តជាមួយកូននៅតាមផ្ទះនេះ ត្រូវបានរៀបចំឡើងសម្រាប់ការអប់រំកុមារតូចចាប់ពីអាយុ ០ ឆ្នាំ ដល់អាយុក្រោម ៦ ឆ្នាំ និងក្នុងគោលបំណងចំនួន ៣ គឺ៖ (១) ផ្ដល់វិធីសាស្ត្រនៃលំនាំបង្រៀនសម្រាប់មាតាបិតា និងអ្នកអាណាព្យាបាលដើម្បីឱ្យគាត់មានឱកាសក្នុងការអប់រំ និងអភិវឌ្ឍសមត្ថភាពកុមារក្នុងជីវភាពរស់នៅប្រចាំថ្ងៃតាមក្រុមគ្រួសារ (២) លើកកម្ពស់សមត្ថភាពមាតាបិតា និងអ្នកអាណាព្យាបាល លើការអប់រំ ការបីបាច់ថែរក្សាសុខុមាលភាព និងរក្សាបាននូវអនាម័យចំពោះកុមារតូចគ្រប់រូបភាព និង (៣) បង្កើនស្មារតីមាតាបិតា អ្នកអាណាព្យាបាលគ្រប់រូបឱ្យចូលរួមធ្វើស្វ័យអប់រំ និងអភិវឌ្ឍសមត្ថភាពកុមារតូចនៅតាមក្រុមគ្រួសារ។
វីដេអូឃ្លីបនេះ បង្ហាញអំពីលំនាំសកម្មភាពដឹកនាំបង្រៀននៃសកម្មភាពគោល ក្នុងមេរៀនមួយចំនួននៃមុខវិជ្ជាចំនួន ៥ គឺ (១) មុខវិជ្ជាចិត្ត ចលភាព (២) មុខវិជ្ជាវិទ្យាសាស្ត្រ (៣) មុខវិជ្ជាសិក្សាសង្គម (៤) មុខវិជ្ជាបុរេ គណិត និង (៥) មុខវិជ្ជាភាសាខ្មែរ និងត្រូវបានផ្សព្វផ្សាយជាបន្តបន្ទាប់នៅក្នុងទំព័រ Facebook និង Youtube channel (ECCD Cambodia) ផ្លូវការរបស់អគ្គលេខាធិការដ្ឋាន គណៈកម្មាធិការជាតិគាំពារ និងអភិវឌ្ឍកុមារតូច និងក្នុងទំព័រ Facebook, Youtube (MoEYS Cambodia), App(MoEYS E-Learning) របស់ក្រសួងអប់រំ យុវជន និងកីឡា និងបានផ្សព្វផ្សាយតាមកញ្ចក់ទូរទស្សន៍ជាតិកម្ពុជា ២ (TVK-2) នៃក្រសួងព័ត៌មាន។
ការបំបៅកូនដោយទឹកដោះម្ដាយ គឺជាជម្រើសដ៏ល្អបំផុតសម្រាប់ការលូតលាស់ និងអភិវឌ្ឍប្រកបដោយសុខភាពល្អរបស់ទារក និងកុមារតូច។ ឈរលើមូលដ្ឋាននេះ គំនិតផ្ដួចផ្ដើមមួយចំនួនរបស់ក្រសួងសុខាភិបាល ត្រូវបានរៀបចំឡើងដើម្បីការពារ លើកកម្ពស់ និងគាំទ្រដល់មាតាក្នុងការបំបៅដោះកូន និងត្រូវបានអនុវត្តយ៉ាងទូលំទូលាយ។ ចំណុចណែនាំសំខាន់ៗសម្រាប់ការបំបៅដោះកូន មានដូចជា៖
-ទារកគួរតែត្រូវបានផ្ដល់ការបំបៅដោយទឹកដោះម្ដាយដំបូងនៅក្នុងអំឡុង ១ ម៉ោង បន្ទាប់ពីសម្រាលចេញពីផ្ទៃម្ដាយ។
-ការបំបៅកូនដោយទឹក ឬទឹកដោះគោ ឬវត្ថុរាវផ្សេងទៀតគួរតែត្រូវបានរារាំង។
-ទារកគួរតែទទួលបានអាហាររូបត្ថម្ភដោយទឹកដោះម្ដាយតែមួយមុខគត់ក្នុងអំឡុងពេល ៦ ខែដំបូង ដើម្បីទទួលបានការលូតលាស់ និងការអភិវឌ្ឍន៍ដ៏ល្អបំផុត។
-ការបំបៅកូនដោយទឹកដោះម្ដាយគួរតែបន្តឱ្យបានញឹកញាប់តាមតែអាចធ្វើបាន និងអាស្រ័យលើតម្រូវការរបស់ទារក និងកុមាររហូតដល់អាយុ ២ ឆ្នាំ និងលើសពីនេះ។
ជារួមការគាំពារ និងអភិវឌ្ឍន៍កុមារតូច មានគុណប្រយោជន៍ដល់អនាគតរបស់កុមារម្នាក់ៗ ក្នុងការក្លាយខ្លួនជាសសរទ្រូងនៃប្រទេសជាតិ។ ការគាំពារ និងអភិវឌ្ឍន៍កុមារតូច ជាការងារអាទិភាព ហើយជាផ្នែកមួយដ៏ចាំបាច់ក្នុងការផ្តល់នូវមូលដ្ឋានគ្រឹះដ៏រឹងមាំមិនអាចខ្វះបានសម្រាប់ការលើកកម្ពស់គុណភាព និងនិរន្តរភាពអប់រំ។
ក្រសួងអប់រំ យុវជន និងកីឡាតែងតែលើកទឹកចិត្តដល់មាតាបិតាទាំងអស់ឱ្យយកចិត្តទុកដាក់បន្ថែមទៀតក្នុងការចិញ្ចឹមបីបាច់ថែរក្សាកូនតូចៗរបស់ខ្លួនចាប់តាំងពីពេលមានផ្ទៃពោះមក ដោយចាត់ទុកថាជាពេលវេលាសំខាន់សម្រាប់ការចម្រើនវ័យផ្នែកកាយសម្បទារ និងបញ្ញាស្មារតី ជាពិសេសមាតាបិតា ឬអ្នកអាណាព្យាបាលត្រូវយកចិត្តទុកដាក់លើសមាសភាគពាក់ព័ន្ធនៃក្របខណ្ឌចិញ្ចឹមបីបាច់ថែរក្សាកូន ដែលមានលក្ខណៈត្រៀមបម្រុងគ្រប់ជ្រុងជ្រោយដែលផ្តោតលើ៖ សុខភាពល្អ អាហាររូបត្ថម្ភគ្រប់គ្រាន់ ការថែទាំកូនដែលមានលក្ខណៈឆ្លើយតបសុវត្តិភាព និងសន្តិសុខដល់កុមារ និងឱកាសសម្រាប់រៀនសូត្រក្នុងវ័យដំបូងរបស់កុមារតូច៕
