ភ្នំពេញៈ កងកម្លាំងយោធាគ្រប់បណ្តាកងឯកភាព ដែលកំពុងប្រតិបត្តិការឈរជើងនៅតាមបណ្តោយព្រំដែនកម្ពុជា-ថៃ ត្រូវបានណែនាំឱ្យចូលរួមទប់ស្កាត់ការនាំចូលរថយន្តចង្កូតស្ដាំមកក្នុងប្រទេសកម្ពុជា។
តាមលិខិតបទបញ្ជាមួយដែលចុះហត្ថលេខាដោយលោក ឯក សំអូន មេបញ្ជាការយោធភូមិភាគទី ៥ កាលពីថ្ងៃទី ១ ខែកញ្ញា ឆ្នាំ ២០២១ បានឱ្យដឹងថា គ្រប់បណ្តាកងឯកភាពដែលឈរជើងនៅតាមខ្សែបណ្ដោយព្រំដែនត្រូវសហការជាមួយបណ្តាកងឯកភាព និងបណ្តាស្ថាប័នដែលមានការពាក់ព័ន្ធទប់ស្កាត់ឱ្យបានដាច់ខាតនូវការលួចនាំចូលរថយន្តចង្កូតស្តាំតាមច្រករបៀងនៅតាមបណ្ដោយព្រំដែន។
លិខិតដដែលបន្តថា ករណីមានយោធិនណា ឃុបឃិតក្នុងការលួចនាំចូលរថយន្តចង្កូតស្តាំ តាមច្រករបៀងនៅតាមខ្សែបណ្ដោយព្រំដែនល្មើសនឹងសេចក្តីសម្រេចនេះ មេបញ្ជាការកងឯកភាពនោះនឹងត្រូវប្រឈមចំពោះមុខច្បាប់។ មេបញ្ជាការប្រចាំទិសទី១ ទិសទី២ ទិសទី៣ (ប៉ៃលិន-សំឡូត) និងទិសទី៤ ត្រូវផ្សព្វផ្សាយបទបញ្ជានេះជូនដល់មេបញ្ជាការគ្រប់កងឯកភាព ស្ថិតនៅក្នុងភូមិសាស្ត្រទទួលខុសត្រូវរបស់ខ្លួនឱ្យបានឆាប់បំផុត។
លោក ជួប វុទ្ធី មេបញ្ជាការរងយោធាក្រុងប៉ៃលិន ប្រាប់ ភ្នំពេញ ប៉ុស្តិ៍ នៅថ្ងៃទី ១ ខែកញ្ញាថា អង្គភាពរបស់លោកទទួលបានលិខិតនេះ ហើយបានប្តេជ្ញាថា នឹងចូលរួមទប់ស្កាត់ឱ្យបានម៉ឺងម៉ាត់ជាទីបំផុត មិនឱ្យមានការនាំចូលរថយន្តដោយខុសច្បាប់នោះទេ។
លោកបន្តថា បទបញ្ជានេះគឺជាអនុសាសន៍ដ៏ល្អក្នុងការអនុវត្ត។ ដោយឡែកអង្គភាពរបស់លោកដែលធ្លាប់ប្រើប្រាស់រថយន្តចង្កូតស្តាំកន្លងមក គឺប្រើប្រាស់ដើម្បីបម្រើប្រជាពលរដ្ឋ។
ទោះជាយ៉ាងណា លោកថា បន្ទាប់ពីមានបទបញ្ជាឱ្យដល់គ្រប់អង្គភាព ដែលកំពុងឈរជើងនៅតាមបន្ទាត់ព្រំដែននេះ ត្រូវតែការពារឱ្យបានជាដាច់ខាតមិនអនុញ្ញាតឱ្យមានការនាំចូលរថយន្តខុសច្បាប់បន្តទៀតទេ។
លោកបានដាក់កម្លាំងអន្តរាគមន៍នៅតាមច្រកគោលដៅសំខាន់ៗ ដើម្បីឃ្លាំមើលជាប្រចាំ មិនអនុញ្ញាតឱ្យមានការនាំចូលរថយន្តនោះទេ។
លោកបានថ្លែងថា៖ «ប្រសិនបើមានករណីនាំចូលនៅតាមច្រកណាមួយនោះ តាមបទបញ្ជារបស់ឯកឧត្តម ឧត្តមសេនីយ៍ឯក ឯក សំអូន មេបញ្ជាការយោធភូមិភាគទី ៥ គឺមេបញ្ជាការដែលកំពុងកាន់ច្រកនោះត្រូវទទួលខុសត្រូវ និងមានវិធានការរួមជាមួយនឹងការដាក់វិន័យតឹងរ៉ឹងទៅលើមេបញ្ជាការរូបនោះ»។
លោក អ៊ុន សុវណ្ណា អ្នកនាំពាក្យក្រសួងការពារជាតិបានឱ្យដឹងដែរថា ពាក់ព័ន្ធនឹងករណីនេះ រាជរដ្ឋាភិបាលតាមរយៈអគ្គនាយកដ្ឋានពន្ធដារបានណែនាំឱ្យអនុវត្តទប់ស្កាត់មិនឱ្យមានការនាំចូលរថយន្តចង្កូតស្តាំចូលមកកាន់ប្រទេស ហើយកងទ័ពនៅតាមព្រំដែនមានតួនាទីក្នុងការចូលរួមសហការអនុវត្តឱ្យមានភាពរលូន។
លោកបានបញ្ជាក់ថា៖ «នៅពេលដែលមានសារាចរណែនាំហើយ ជំនាញរបស់គេបានអំពាវនាវឱ្យកងកម្លាំងឱ្យចូលរួមអនុវត្តឱ្យការអនុវត្តច្បាប់ឱ្យមានតម្លាភាព និងត្រឹមត្រូវ ព្រោះកងកម្លាំងប្រដាប់អាវុធចូលរួមសហការ ដើម្បីការពារ អនុវត្តច្បាប់ឱ្យបានល្អ»។
លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) បានប្រាប់ភ្នំពេញប៉ុស្តិ៍នៅថ្ងៃទី ១ កញ្ញាថា រថយន្តចង្កូតស្តាំនេះ តាមច្បាប់មិនត្រូវបានអនុញ្ញាតឱ្យមានការប្រើប្រាស់នៅក្នុងប្រទេសកម្ពុជានោះទេ ពីព្រោះការបើកបរនៅក្នុងប្រទេសកម្ពុជាបានប្រកាន់ស្តាំ ដោយប្រើប្រាស់ចង្កូតឆ្វេង។
លោកបានពន្យល់ថា ការប្រើប្រាស់រថយន្តចង្កូតស្តាំនៅពេលវ៉ាជែង វាបង្កឱ្យមានគ្រោះថ្នាក់ខ្លាំងណាស់ ព្រោះត្រូវវ៉ាជែងខាងឆ្វេងដែលនេះ ត្រូវតែចេញមកឱ្យផុតផ្លូវទើបអាចវ៉ាជែងបាន។ រថយន្តប្រភេទនេះមានគ្រោះថ្នាក់ដល់ខ្លួនឯងផង និងអ្នកដទៃផងនៅពេលដែលវ៉ាជែងនៅលើដងផ្លូវ។
លោកបានបញ្ជាក់ថា៖ «កាលពីឆ្នាំ ២០១៥ ឬ ២០១៦ មិនឱ្យកែចង្កូតទេ ជាជំនួសចេញស្លាកលេខពណ៌ ក្រហមតាំងពីពេលនោះមក ខ្ញុំថា បិទលែងឱ្យនាំចូលហើយ ប៉ុន្តែឥឡូវបែរជាលេចធ្លាយមានការនាំចូលមកទៀត ។ ជាគោលការណ៍ ខ្ញុំគាំទ្រចំពោះរាជរដ្ឋាភិបាល និងស្ថាប័នពាក់ព័ន្ធហាមនាំចូលរថយន្តចង្កូតស្តាំបន្តទៀត ព្រោះយើងមានច្បាប់មិនអនុវត្ត ហើយធ្លាយមកអ៊ីចឹង វាមិនមែនជារូបភាពល្អទេ»៕
វីដេអូ៖