ភ្នំពេញៈ នៅប្រទេសកម្ពុជា កុមារជាង ៣ លាននាក់ មិនបានទៅសាលារៀនឡើយ ក្នុងរយៈពេលភាគច្រើននាឆ្នាំកន្លងទៅ ដែលបង្កឡើងដោយការបិទសាលារៀនចំនួន២ដង ចាប់ពីខែមីនា ឆ្នាំ ២០២០មក។ នេះបើតាមរបាយការណ៍របស់អង្គការសង្គ្រោះកុមារអន្តរជាតិ(Save the Children)ចេញផ្សាយនៅថ្ងៃទី ១ ខែកញ្ញា ដែល ភ្នំពេញ ប៉ុស្តិ៍ ទទួលបាននាថ្ងៃនេះ។
របាយការណ៍ចំនួន ១២ ទំព័រ របស់អង្គការនេះ បានលើកឡើងថា ការបិទសាលានេះដោយសារតែបញ្ហានៃការឆ្លងរាលដាលនៃជំងឺកូវីដ ១៩។ ជាមធ្យម ការបាត់បង់ពេលវេលាចំនួនជិត ១០% នៃពេលវេលាសរុប ដែលកុមារនឹងត្រូវចូលរៀន មិនត្រឹមតែនឹងបង្កឱ្យមានការបាត់បង់ការរៀនសូត្រគួរឱ្យកត់សម្គាល់ប៉ុណ្ណោះទេ ប៉ុន្តែវាថែមទាំងធ្វើឱ្យកុមារជាច្រើនប្រឈមនឹងហានិភ័យនៃការឈប់រៀនទាំងស្រុង។
អង្គការសង្គ្រោះកុមារអន្តរជាតិបញ្ជាក់ថា៖ «នៅទូទាំងសកលលោក កុមារជាង ១,៥ ពាន់លាននាក់ មិនបានទៅសាលារៀន ដោយសារការបិទសាលារៀន ដែលបណ្តាលមកពីជំងឺកូវីដ ១៩ ចាប់តាំងពីដើមឆ្នាំ ២០២០ មក។ នេះជាលើកដំបូងនៅក្នុងប្រវត្តិសាស្រ្ត ដែលកុមារទាំងអស់ទទួលរងការរំខានចំពោះការអប់រំរបស់ពួកគេ»។
លោកនាយករដ្ឋមន្រ្តី ហ៊ុន សែន នាពេលថ្មីៗកន្លងមកនេះ បានស្នើឱ្យរដ្ឋមន្រ្តីក្រសួងអប់រំ យុវជន និងកីឡា លោក ហង់ជួន ណារ៉ុន ពិភាក្សាជាមួយអភិបាលរាជធានី-ខេត្តទាំងអស់ ដើម្បីបើកសាលារៀនឡើងវិញ នៅតាមទីតាំង ដែលគ្មានការឆ្លងរីករាលដាលជំងឺកូវីដ ១៩។
បន្ទាប់ពីមានការស្នើដូចនេះ ក្រសួងអប់រំ យុវជន និងកីឡា បានណែនាំនូវគោលការណ៍សំខាន់ៗមួយចំនួនដល់មន្ទីរអប់រំ យុវជន និងកីឡារាជធានី-ខេត្ត ការិយាល័យអប់រំ យុវជន និងកីឡា នៃរដ្ឋបាលក្រុង-ស្រុក-ខណ្ឌ គ្រប់គ្រឹះស្ថានសិក្សាសាធារណៈនិងឯកជន មាតាបិតា សិស្សានុសិស្ស ស្តីពីការបង្រៀន និងរៀនតាមបណ្ដុំនៅតាមគ្រឹះស្ថានសិក្សា នៅភូមិសាស្ត្រ ដែលមានហានិភ័យទាប៕
វីដេអូ៖