.jpg)
គ្រាប់មីនដែលអ្នកជំនាញស៊ីម៉ាក់ទើបដោះបានក្នុងខេត្តព្រះវិហារ។ រូប CMAC
ភ្នំពេញៈ ក្នុងរយៈពេល ៧ ខែ ឆ្នាំ ២០២១ នេះ អង្គភាព CMAC បានធ្វើការរំដោះផ្ទៃដីចម្ការមីន និងចម្ការគ្រាប់សរុបចំនួន ៦៤ ៥៦២ ៥៣៩ ម៉ែត្រការ៉េ ស្មើនឹង ៩៨,៦០% នៃផែនការ ៧ ខែ ក្នុងឆ្នាំ ២០២១។
លោក ហេង រតនា អគ្គនាយកអង្គភាពស៊ីម៉ាក់បានសរសេរនៅលើទំព័រហ្វេសប៊ុកផ្លូវការរបស់លោកកាលពីថ្ងៃទី ៣០ សីហាថា លទ្ធផលកិច្ចប្រតិបត្តិការរំដោះផ្ទៃដីចម្ការមីន និង ចម្ការគ្រាប់ រួមជាមួយនឹងការបោសសម្អាតមីន និងសំណល់ជាតិផ្ទុះពីសង្គ្រាមក្នុងរយៈពេលនេះ ប្រព្រឹត្តទៅដោយរលូន និងទទួលបានលទ្ធផលគួរជាទីមោទនៈ។
ជាមួយគ្នានេះកិច្ចប្រតិបត្តិការនេះបានរុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះ គ្រប់ប្រភេទសរុបចំនួន ៣១ ៦៦៥ គ្រាប់។ ទន្ទឹមនឹងនេះក៏បានធ្វើការអប់រំពីគ្រោះថ្នាក់ ដោយសារគ្រាប់មីន និងសំណល់ជាតិផ្ទុះពីសង្គ្រាមដល់ក្រុមគោលដៅបានចំនួន ៨ ៩៩៧ លើក ស្មើនឹង ៣០០ ៤៣០ ខ្នងផ្ទះ និងមានប្រជាពលរដ្ឋចូលរួមសរុបចំនួន ៦០ ម៉ឺននាក់។
លោក ហេង រតនាថ្លែងថា៖ «ជាមួយគ្នានេះ ក្នុងន័យពង្រឹងភាពជាម្ចាស់ និងសមត្ថភាពរបស់អង្គភាពផងនោះ នៅដើមឆ្នាំ ២០២១ នេះ អង្គភាពបានខិតខំកសាងហេដ្ឋារចនាសម្ព័ន្ធរូបវន្ដផងដែរ»។
ទោះបីជាស្ថិតក្នុងស្ថានភាពដ៏លំបាកដោយសារជំងឺកូវីដ ១៩ ក៏ដោយ ក៏លោក ហេង រតនា បញ្ជាក់ថា ក្នុងរយៈពេល ៧ ខែ ឆ្នាំ ២០២១ នេះ អង្គភាពស៊ីម៉ាក់មានលទ្ធភាពបន្ដកៀរគរជំនួយ និងអនុវត្តគម្រោងកម្មវិធីនានាសរុបចំនួន ៤៣ គម្រោងក្នុងនោះគម្រោងកំពុងដំណើរការមានចំនួន ២៣ គម្រោង គម្រោងកំពុងចរចាមានចំនួន ១០ គម្រោង គម្រោងដែលរំពឹងទុកមានចំនួន ៤ គម្រោង។
លោកបញ្ជាក់ថា៖ «ជារួម ស្ថានភាពហិរញ្ញវត្ថុរបស់អង្គភាពទាំងមូលក្នុងរយៈពេល ៧ ខែ ដើមឆ្នាំ ២០២១ នេះអាចដំណើរការបាន និងមិនប៉ះពាល់ដល់កម្លាំងប្រតិបត្តិការឡើយ ទោះបីគម្រោងមួយចំនួនមានការយឺតយ៉ាវខ្លះក៏ដោយ»។
ភ្នំពេញប៉ុស្តិ៍ មិនអាចទាក់ទងលោក ហេង រតនា ដើម្បីសុំធ្វើអត្ថាធិប្បាយបន្ថែមជុំវិញបញ្ហានេះបានទេនៅថ្ងៃទី ១ ខែកញ្ញា ឆ្នាំ ២០២១។
លោក សំ វិរៈ ប្រធានមជ្ឈមណ្ឌលកងឯកភាពកំចាត់មីនទី ១ នៃ CMAC ប្រចាំខេត្តបន្ទាយមានជ័យប្រាប់ភ្នំពេញប៉ុស្តិ៍កាលពីថ្ងៃទី ៣០ ខែសីហា ថា នៅពេលដែលអង្គភាពស៊ីម៉ាក់មិនទាន់បានបោសសម្អាត រំដោះគ្រាប់មីនចេញពីចម្ការមីន ឬចម្ការដែលមានគ្រាប់យុទ្ធភណ្ឌមិនទាន់ផ្ទុះ និងមិនបានបញ្ជាក់ពីតំបន់ដែលមានសុវត្ថិភាព នោះប្រជាពលរដ្ឋក៏មិនអាចចូលទៅបង្កបង្កើនផលក្នុងការជំរុញឱ្យមានជីវភាពរីកចម្រើនបានដែរ ព្រោះពួកគាត់ខ្លាចគ្រោះថ្នាក់ជាយថាហេតុណាមួយ។
លោកបានថ្លែងថា៖ «យើងអាចបញ្ជាក់ជូនគាត់បាន នៅពេលដែលយើងបោសសម្អាតរួចហើយ បើនៅទេ យើងមិនហ៊ានអះអាងទេថា ដីនោះមានសុវត្ថិភាពជូនប្រជាពលរដ្ឋក្នុងការបង្កបង្កើនផលកសិកម្ម ឬអភិវឌ្ឍន៍ផ្សេងៗ»។
លោកបន្តទៀតថា ដោយឡែកការបោសសម្អាតមីន ក៏ដូចជារំដោះផ្ទៃដីចម្ការមីន និងគ្រាប់មិនទាន់ផ្ទុះ នៅក្នុងមូលដ្ឋានខេត្តបន្ទាយមានជ័យកំពុងតែប្រព្រឹត្តទៅដោយលូន និងស្របតាមផែនការដែលបានកំណត់ ៥០០ ហិកតា ក្នុង ១ ឆ្នាំ។
លោកបន្តថា បច្ចុប្បន្ននេះ អង្គភាពស៊ីម៉ាក់ប្រចាំខេត្តបន្ទាយមានជ័យ បាននិងកំពុងអនុវត្តនៅក្នុងស្រុកចំនួន ៤ ដែលនៅជាប់ព្រំដែនរួមមានស្រុកស្វាយចេក ស្រុកថ្មពួក ស្រុកម៉ាឡៃ និងស្រុកអូរជ្រៅ និង ១ ទៀតនៅក្នុងក្រុងប៉ោយប៉ែត ដែលតំបន់ទាំងនេះនៅតែមិនទាន់មានសុវត្ថិភាពទាំងស្រុងនៅឡើយ ដោយសារតែកន្លែងខ្លះនៅមានគ្រាប់មីននៅឡើយ។
បើតាម លោក សំ វិរៈ តាមផែនការរបស់រាជរដ្ឋាភិបាលដែលបានដាក់ចេញគោលដៅ គឺឱ្យបញ្ចប់ការបោសសម្អាតមីន និងរំដោះផ្ទៃដីឱ្យអស់នៅក្នុងឆ្នាំ ២០២៥ ប៉ុន្តែនៅមានកិច្ចការមួយចំនួនទៀត ដែលមិនទាន់ស្រាវជ្រាវអស់ គឺគ្រាប់មីន និងយុទ្ធភណ្ឌមិនទាន់ផ្ទុះនៅក្នុងទឹកដែលកំពុងធ្វើរាល់ថ្ងៃនេះ និងគ្រាប់ដែលមានសារធាតុគីមី ដែលទម្លាក់ដោយយន្តហោះសហរដ្ឋអាមេរិកក្នុងទសវត្សរ៍ ៧០ ក៏នៅមិនទាន់បានប្រមូលអស់ និងនៅច្រើនផងដែរ៕
