ភ្នំពេញៈ គណៈកម្មាធិការជាតិរៀបចំការបោះឆ្នោត (គជប) ប្រកាសឱ្យពលរដ្ឋទាំងអស់ត្រូវទៅពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ ២០២១ ដែលនឹងត្រូវចាប់ផ្តើមពីថ្ងៃទី ១២ ខែតុលា ដល់ថ្ងៃទី ៣០ ខែវិច្ឆិកា នៅតាមសាលាឃុំ-សង្កាត់ និងនៅតាមភូមិមួយចំនួនក្នុងឃុំ-សង្កាត់ទូទាំងប្រទេស សម្រាប់យកទៅប្រើប្រាស់ ក្នុងការបោះឆ្នោតឆ្នាំ ២០២២ ។
សេចក្តីជូនដំណឹងដែលចុះហត្ថលេខា ដោយលោក ប្រាជ្ញ ច័ន្ទ ប្រធាន គ.ជ.ប. កាលពីថ្ងៃទី ១ ខែកញ្ញា ការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២១ មានគោលដៅធានាឱ្យបញ្ជីបោះឆ្នោតមានភាពពេញលេញ ភាពត្រឹមត្រូវ និងមានបច្ចុប្បន្នភាពប្រកបដោយសុវត្ថិភាព តាមរយៈការស្រង់ និងលុបឈ្មោះអ្នកបោះឆ្នោត ដែលបានទទួលមរណភាព។ លុបឈ្មោះអ្នកបោះឆ្នោត ដែលត្រូវបាន ដកហូតសិទ្ធិបោះឆ្នោតជាបណ្តោះអាសន្ន និងលុបឈ្មោះអ្នកបោះឆ្នោត ដែលផ្លាស់លំនៅឋាន ឬទីសំណាក់ចេញទៅឃុំ-សង្កាត់ផ្សេង ដោយមានឯកសារជាសំអាងត្រឹមត្រូវ និងច្បាស់លាស់ ដើម្បីលុបចេញពីបញ្ជីបោះឆ្នោត។
សេចក្តីជូនដំណឹងបន្តថា ការពិនិត្យបញ្ជីឈ្មោះនេះ ដើម្បីកែតម្រូវឈ្មោះ ឬទិន្នន័យអ្នកបោះឆ្នោត តាមសំណើរបស់សាមីខ្លួនដោយផ្អែកលើឯកសារសំអាង។ ដោយឡែកប្រជាពលរដ្ឋខ្មែរ ដែលមានសិទ្ធិបោះឆ្នោត ហើយមិនទាន់បានចុះឈ្មោះបោះឆ្នោតពីមុនមក និងប្រជាពលរដ្ឋខ្មែរដែលមានអាយុ ១៨ ឆ្នាំឡើង (កើតមុន ឬកើតត្រឹមថ្ងៃទី ៦ ខែ មិថុនា ឆ្នាំ ២០០៤) ប្រជាពលរដ្ឋខ្មែរដែលបានផ្លាស់លំនៅឋាន ឬទីសំណាក់ចូលក្នុងឃុំ សង្កាត់ថ្មី ត្រូវទៅចុះឈ្មោះបោះឆ្នោតនៅតាមឃុំ-សង្កាត់ ដែលសាមីខ្លួនកំពុងរស់នៅ ឬស្នាក់អាស្រ័យនៅ ។
លោក ហង្ស ពុទ្ធា អ្នកនាំពាក្យគ.ជ.ប. បញ្ជាក់ថា ការពិនិត្យបញ្ជីឈ្មោះបោះឆ្នោតនេះ គឺដើម្បីជឿជាក់ថា ប្រជាពលរដ្ឋទំាងអស់ មានឈ្មោះនៅក្នុងបញ្ជីបោះឆ្នោត។ ប៉ុន្តែ បើពិនិត្យឃើញមានភាពមិនប្រក្រតី ដូចជាខុសអក្ខរាវិរុទ្ធ ឬខុសទិន្ន័យអ្វីមួយអាចស្នើសុំកែតម្រូវនៅតាមការិយាល័យចុះឈ្មោះបោះឆ្នោតនោះបាន។ មួយវិញទៀត នៅពេលដែលឃើញឈ្មោះ ក្នុងបញ្ជីបោះឆ្នោត មិនទាន់គ្រប់លក្ខខណ្ឌ ដូចជាអាយុក្រោម ១៨ ឆ្នាំ ប៉ុន្តែមានឈ្មោះក្នុងបញ្ជីបោះឆ្នោត ក៏ត្រូវកែសម្រួលដែរ។
លោកបន្តថា ដោយឡែកចំពោះប្រជាពលរដ្ឋដែលផ្លាស់ទីលំនៅពីទីតាំងចាស់មករស់នៅទីតាំងថ្មី អ្នកដែលមិនមានឈ្មោះក្នុងបញ្ជីត្រឹមត្រូវ និងពលរដ្ឋដែលមានអាយុចាប់ពី ១៨ ឆ្នាំឡើងទៅ ត្រូវទៅចុះឈ្មោះនៅឃុំសង្កាត់ដែលខ្លួនរស់នៅនោះ។
លោកថ្លែងថា៖ «ជារៀងរាល់ឆ្នាំ ច្បាប់តម្រូវឱ្យ គជប ធ្វើបច្ចុប្បន្នភាពបញ្ជីបោះឆ្នោត តាមរយៈការចុះបញ្ជី និងពិនិត្យឈ្មោះបោះឆ្នោតនេះ ដែលមានរយៈពេល ៣០ ថ្ងៃ សម្រាប់បញ្ជីបោះឆ្នោតដែលអត់ត្រូវយកទៅប្រើប្រាស់ការបោះឆ្នោត។ ប៉ុន្តែសម្រាប់បញ្ជីបោះឆ្នោត ឆ្នាំ ២០២១ នេះ យកទៅប្រើប្រាស់នៅឆ្នាំ ២០២២»។
បើតាមលោក ហង្ស ពុទ្ធា សម្រាប់ការពិនិត្យ និងចុះឈ្មោះបោះឆ្នោតនេះ ត្រូវបានធ្វើឡើងស្របតាមការណែនាំរបស់ក្រសួងសុខាភិបាល និងរាជរដ្ឋាភិបាល គឺ (៣ កុំ ៣ ការពារ) កុំឱ្យមានការឆ្លងនូវជំងឺកូវីដ ១៩ និងលើកទឹកចិត្តឱ្យមានការចាក់វ៉ាក់សំាងឱ្យបានគ្រប់គ្នា សម្រាប់ខ្លួនឯង គ្រួសារ ដើម្បីសុវត្ថិភាព និងមានភាពសុំាក្នុងសហគមន៍ទាំងមូល។
លោក សំ គន្ធាមី នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា ហៅកាត់ថា (និកហ្វិក) ឱ្យដឹងថា សម្រាប់ការពិនិត្យ និងចុះឈ្មោះបោះឆ្នោតប្រចាំឆ្នាំរបស់ គ.ជ.ប. គឺ និកហ្វិកមិនទាន់មានគម្រោងដាក់អ្នកសង្កេតការណ៍នៅតាមការិយាល័យនៅឡើយទេ។ ព្រោះស្ថានភាពនៃជំងឹកូវីដ ១៩ មិនទាន់ត្រូវបានបញ្ចប់ វាអាចនឹងងាយឆ្លងដល់បុគ្គលិករបស់លោក។
ទោះជាយ៉ាងណា លោកថា មិនទាន់សម្រេច ១០០% នៅឡើយទេលើបញ្ហានេះ ព្រោះអាចមានផែនការក្នុងការសង្កេតការណ៍ចល័ត ដោយមិនស្ថិតក្នុងការិយាល័យអចិន្ត្រៃយ៍ដែលមានមនុស្សប្រមូលផ្តុំគ្នា ការពារកុំឱ្យឆ្លងជំងឺកូវីដ ១៩។ ប៉ុន្តែបើស្ថានភាពនៃការគ្រប់គ្រងជំងឺកូវីដ ១៩ បានល្អនិងមិនមានការឆ្លងបន្តទៀត អង្គការរបស់លោក នឹងដាក់ភ្នាក់ងារសង្កេតការណ៍នៅតាមការិយាល័យ ដើម្បីឃ្លាំមើលពីការពិនិត្យឈ្មោះ និងចុះបញ្ជីបោះឆ្នោតនេះ។
លោថ្លែងថា៖ «យើងអត់នៅជុំគ្នាទេ យើងចល័ត។ បើនៅជុំគ្នាយើងបារម្ភពីអ្នកសង្កេតការណ៍របស់យើង ព្រោះវានៅមានកូវីដផង។ អ្នកសង្កេតការណ៍របស់យើងជាអ្នកស័គ្រចិត្ត។ បើលទ្ធភាពដែលច្រើន គឺប្រហែលឱ្យភ្នាក់ងារធ្វើការចល័តហើយ ព្រោះស្ថានភាពកូវីដ អត់ថមថយ។ ប៉ុន្តែ បើវាធូរស្រាលច្រើន យើងនឹងចូលរួមទៅតាមហ្នឹងដែរ»៕