.jpg)
សកម្មភាពចុះអនុវត្តវិធានការរដ្ឋនៅខេត្តព្រះសីហនុកាលពីខែសីហា ឆ្នាំនេះ។ រូបថត ប៉ូលិស
ព្រះសីហនុៈ រដ្ឋបាលខេត្តព្រះសីហនុសម្រេចបន្តដាក់ចេញវិធានការរដ្ឋបាលក្នុងភូមិសាស្ត្រខេត្តនេះរយៈពេល ១៤ ថ្ងៃបន្ថែមទៀត គិតចាប់ពីម៉ោងសូន្យនាថ្ងៃទី ៣ ខែកញ្ញារហូតដល់ថ្ងៃទី ១៦ ខែ កញ្ញា ឆ្នាំ ២០២១ ក្នុងគោលបំណងធានាដល់ការអនុវត្តវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ ១៩ ឱ្យមានប្រសិទ្ធភាពនិងភាពជោគជ័យ។
តាមសេចក្តីសម្រេចរបស់រដ្ឋបាលខេត្តដែលចុះហត្ថលេខាដោយលោក គួច ចំរើន អភិបាលខេត្តព្រះសីហនុនៅថ្ងៃទី ២ ខែ កញ្ញា ឆ្នាំ ២០២១ បានបញ្ជាក់ថា ក្នុងអំឡុងពេលនៃការបន្តអនុវត្តវិធានការរដ្ឋបាលនេះ ត្រូវបានហាមឃាត់ការធ្វើសកម្មភាពការងារ មុខរបរ និងអាជីវកម្មក្លិបកម្សាន្តគ្រប់ប្រភេទជាអាទិ៍ ខារ៉ាអូខេ, រង្គសាល, ឌីស្កូតែក និងបៀរហ្គាឌិន,រោងភាពយន្ត, រោងសម្ដែងសិល្បៈ, ហាងម៉ាស្សា កោស-ជប់, ហាងស្ទីម-សូណា ស្ប៉ា។ល។
សេចក្តីសម្រេចបន្តថា រាល់ការជួបជុំឬការប្រមូលផ្តុំមនុស្សជាលក្ខណៈឯកជនដែលមានការចូលរួមលើសពី ២០ (ម្ភៃ) នាក់ ត្រូវមានការអនុញ្ញាតពីអាជ្ញាធរមានសមត្ថកិច្ច លើកលែងតែការជួបជុំសមាជិកគ្រួសារ ដែលរស់នៅក្នុងលំនៅឋាន ឬទីសំណាក់ជាមួយគ្នា។
សេចក្តីសម្រេចនេះបញ្ជាក់ទៀតថា ហាមឃាត់ការជួបជុំ ឬការប្រមូលផ្ដុំមនុស្សដើម្បីសេពគ្រឿងស្រវឹងគ្រប់ប្រភេទ និងរាល់សកម្មភាពនៃការជួបជុំឬការប្រមូលផ្តុំមនុស្ស,សកម្មភាពការងារ មុខរបរ និងអាជីវកម្មដែលត្រូវបានអនុញ្ញាត ត្រូវអនុវត្តវិធានការសុវត្ថិភាពផ្នែកសុខាភិបាលឱ្យបានម៉ឹងម៉ាត់ ជាអាទិ៍ កាតព្វកិច្ចពាក់ម៉ាស់ និងកាតព្វកិច្ចរក្សាគម្លាត សុវត្ថិភាពបុគ្គល និងត្រូវប្រកាន់ខ្ជាប់នូវការធ្វើអនាម័យដើម្បីសម្លាប់មេរោគ ការវាស់កម្ដៅ និងការអនុវត្តវិធានការសុខាភិបាល ប្រើប្រាស់ប្រព័ន្ធ QR Code «ទប់ស្កាត់កូវីដ» Stop Covid) ជាពិសេសត្រូវអនុវត្តឱ្យបានខ្ជាប់ខ្ជួនបំផុតនូវវិធានការ «៣ ការពារ និង ៣ កុំ» ។
រដ្ឋបាលខេត្តបញ្ជាក់ថា បុគ្គល ឬនីតិបុគ្គលទាំងឡាយណាដែលមិនអនុវត្តតាមខ្លឹមសារនៃសេចក្តីសម្រេចនេះនឹងត្រូវទទួលទោសដូចមានកំណត់នៅក្នុងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ ១៩ និងជំងឺឆ្លងកាចសាហាវនិងប្រកបដោយគ្រោះថ្នាក់ធ្ងន់ធ្ងរផ្សេងទៀត និងលិខិតបទដ្ឋានគតិយុត្តពាក់ព័ន្ធជាធរមាន៕
