.jpg)
គ្រូពេទ្យកំពុងយកសំណាកពីអាជីវករផ្សារបានលុង នៅថ្ងៃទី២កញ្ញា។ រូបថត មន្ទីរព័ត៌មានខេត្តរតនគិរី
រតនគិរី៖ រដ្ឋបាលខេត្តរតនគិរី កាលពីថ្ងៃទី ១ កញ្ញា បានចេញលិខិតសម្រេចបិទខ្ទប់ជាបណ្តោះអាសន្នផ្សារបានលុង នៅក្នុងភូមិជ័យជំនះ សង្កាត់ឡាបានសៀក ក្រុងបានលុង ចាប់ពីថ្ងៃទី ២ ខែកញ្ញា រហូតដល់មានការសម្រេចជាថ្មី ដើម្បីទប់ស្កាត់ការឆ្លងរាលដាលជំងឺកូវីដ ១៩ បន្ទាប់ពីរកឃើញមានអ្នកឆ្លង ១៩ នាក់។
នៅក្នុងលិខិត លោក ថង សាវុន អភិបាលខេត្តរតនគិរី បានបញ្ជាក់ថា ការបិទជាបណ្តោះអាសន្នទីតាំងផ្សារនេះ គឺក្នុងគោលបំណង ដើម្បីទប់ស្កាត់ការរាលដាលនៃជំងឺកូវីដ ១៩ ក្រោយពីបានរកឃើញមានវិជ្ជមានកូវីដ ១៩ តាមរយៈការធ្វើតេស្តរហ័សនៅថ្ងៃទី ១ ខែ កញ្ញា ឆ្នាំ ២០២១ ។
លោក ថង សាវុន បញ្ជាក់ថា៖ «អំឡុងពេលបិទខ្ទប់ ទីតាំងជាបណ្តោះអាសន្ននេះ រដ្ឋបាលក្រុងបានលុង ត្រូវហ៊ុមព័ទ្ធទីតាំងផ្សារបានលុង ផ្អាកការចេញចូលទីតាំងផ្សារបានលុង ស្រាវជ្រាវរកអ្នកពាក់ព័ន្ធផ្ទាល់ ឬប្រយោល ដើម្បីធ្វើចត្តាឡីស័ក និងយកសំណាក» ។
លិខិតដដែលនោះ បានប្រាប់ទៅប្រជាពលរដ្ឋដែលមានការពាក់ព័ន្ធផ្ទាល់ ឬដោយប្រយោល ជាមួយទីតាំងខាងលើ សូមអញ្ជើញមកជួប ឬជូនដំណឹង ដល់ក្រុមការងារមន្ត្រីសុខាភិបាលនៃរដ្ឋបាលខេត្តរតនគិរី ដើម្បីយកសំណាកទៅធ្វើតេស្តជាបន្ទាន់ ចាប់ពីថ្ងៃទី ១ ខែកញ្ញា តទៅ។
លោកអភិបាលខេត្តបានបញ្ជាក់ក្នុងលិខិតថា៖ «ត្រូវអនុវត្តការផាកពិន័យអន្តរការណ៍ចំពោះបុគ្គលណា ដែលមិនគោរពដោយចេតនា នូវវិធានការសុខាភិបាល និងវិធានការរដ្ឋបាល ដែលរាជរដ្ឋាភិបាល និងរដ្ឋបាលខេត្តរតនគិរី បានដាក់ចេញក្នុងការទប់ស្កាត់ការឆ្លងរាលដាលនៃជំងឺកូវីដ ១៩ ដោយមិនគិតដល់បទល្មើសព្រហ្មទណ្ឌដទៃទៀតឡើយ» ។
លោកវេជ្ជបណ្ឌិត អ៊ុង រតនា ប្រធានមន្ទីរសុខាភិបាលខេត្តរតនគិរី ថ្លែងនៅទី ២ កញ្ញាថា អាជ្ញាធរបានធ្វើការពិនិត្យ សំណាកអាជីវករ និងប្រជាពលរដ្ឋ នៅក្បែរផ្សារបានលុង ដើម្បីស្វែងរកជំងឺកូវីដ ១៩ នៅថ្ងៃទី ១ ខែកញ្ញា រកឃើញអ្នកមានវិជ្ជមានកូវីដ១៩ ចំនួន ១៩នាក់។
រហូតមកដល់ថ្ងៃទី ២ ខែកញ្ញានេះ មន្ត្រីសុខាភិបាល កំពុងស្វែងរកអ្នកពាក់ព័ន្ធទាំងផ្ទាល់ និងប្រយោលដើម្បីបន្តធ្វើតេស្ត។
លោកថ្លែងថា៖ «ក្រៅពីផ្សារបានលុង យើងអត់មានបិទទីតាំងណាផ្សេងទេពេលនេះ។ ចំនួនអ្នកជំងឺកូវីដ១៩ នៅខេត្តរតនគិរី គិតមកដល់ថ្ងៃទី ២ ខែកញ្ញា មានអ្នកវិជ្ជមានជិត ១ ០០០ នាក់ ចំណែកអ្នកជាសះស្បើយមានច្រើន ហើយ នៅសល់អ្នកកំពុងសម្រាកព្យាបាលជាង ៣០០ នាក់»។
បើតាមលោក អ៊ុង រតនា ជំងឺកូវីដ ១៩ នៅខេត្តរតនគិរី មិនទាន់មានការស្ងប់ទៅវិញនៅឡើយទេ ប៉ុន្តែក៏មិនមានការផ្ទុះខ្លាំងនោះដែរ។ យ៉ាងណាមន្ត្រីសុខាភិបាលនៅតែគ្រប់គ្រងបានចំពោះករណីដែលបានរកឃើញករណីផ្ទុះជំងឺកូវីដ ១៩ រប៉េះរប៉ោះនៅដោយកន្លែងក្នុងខេត្តនេះ៕
