.jpg)
ក្រុមកម្មករពេលចេញពីធ្វើការកាលពីខែឧសភា ឆ្នាំនេះ។ ហុង មិនា
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈប្រកាសបើកប្រាក់ឧបត្ថម្ភរបស់រាជរដ្ឋាភិបាលជូនកម្មករនិយោជិតចំនួន ៦ ៣៦៦ នាក់ នៃរោងចក្រសហគ្រាសចំនួន ២២ ក្នុងវិស័យកាត់ដេរ និងវិស័យទេសចរណ៍បន្ថែមទៀត ដែលទទួលបានការអនុញ្ញាតព្យួរកិច្ចសន្យាការងារ បន្ទាប់បើកជូនជាបន្តបន្ទាប់ ស្របតាមស្មារតីនៃកញ្ចប់វិធានការរបស់រាជរដ្ឋាភិបាល។
តាមសេចក្តីជូនដំណឹងរបស់ក្រសួងនេះ ស្តីពីការបើកផ្តល់ប្រាក់ឧបត្ថម្ភជូនបងប្អូនកម្មករនិយោជិតក្នុងវិស័យកាត់ដេរ និងទេសចរណ៍ដែលត្រូវបានព្យួរកិច្ចសន្យាការងារស្របតាមស្មារតីនៃកញ្ចប់វិធានការរបស់រាជរដ្ឋាភិបាល (លើកទី៦៨) កាលពីថ្ងៃទី ១ កញ្ញា ឆ្នាំ ២០២១ ឱ្យដឹងថា ធនាគារវីង (ខេមបូឌា) ម.ក នឹងផ្ញើសារអំពីការបើកប្រាក់នេះទៅលេខទូរស័ព្ទដែលកម្មករនិយោជិតបានផ្ដល់មកឱ្យក្រសួងតាមរយៈរដ្ឋបាលរោងចក្រសហគ្រាសកន្លងមក។
សេចក្តីជូនដំណឹងនេះបន្តថា ប្រាក់ឧបត្ថម្ភនេះនឹងត្រូវបើកផ្ដល់ជាប្រាក់រៀល និងអាស្រ័យលើចំនួនព្យួរកិច្ចសន្យាការងារ ក្នុងនោះចំនួន ១២១ ៥០០ រៀល សម្រាប់ការព្យួរការងាររយៈពេល ១១ ថ្ងៃ ដល់ ២០ ថ្ងៃ និង ១៦២ ០០០ រៀល សម្រាប់ការព្យួរការងារពី ២១ ថ្ងៃដល់ ១ ខែ។
ក្រសួងបញ្ជាក់ថា សម្រាប់អ្នកព្យួរការងារ ២ ខែ ប្រាក់ឧបត្ថម្ភនឹងត្រូវបើកជា ២ លើកដោយលើកទី២ នឹងបើកនៅថ្ងៃទី ២០ ខែ កញ្ញា ឆ្នាំ ២០២១។
ក្រសួងក៏បានរំឭកថា ធនាគារវីង (ខេមបូឌា) ម.ក នឹងបង្វិលប្រាក់នេះជូនរាជរដ្ឋាភិបាលវិញ ប្រសិនបើបងប្អូនខកខាន មិនបានទៅបើកប្រាក់ឧបត្ថម្ភនេះក្នុងរយៈពេល ១០ ថ្ងៃ បន្ទាប់ពីទទួលបានសារតាមទូរស័ព្ទពីធនាគារវីង (ខេមបូឌា) ម.ក។ ដើម្បីបើកប្រាក់ឧបត្ថម្ភនេះបានត្រូវយកអត្តសញ្ញាណប័ណ្ណសញ្ជាតិខ្មែរ និងទូរស័ព្ទដែលទទួលបានសារនោះទៅកាន់ភ្នាក់ងារវីងដែលនៅជិតបំផុត។ ចំពោះការបើកប្រាក់នេះក្រសួង មិនតម្រូវឱ្យបងប្អូនបង់ថ្លៃសេវាទៅភ្នាក់ងារវីងឡើយ។
ក្នុងករណីកម្មករនិយោជិតមិនបានទទួលសារទូរស័ព្ទពីធនាគារ វីង សូមទាក់ទងសួរព័ត៌មានបន្ថែម ឬធ្វើបច្ចុប្បន្នភាពលេខទូរស័ព្ទរបស់ខ្លួនទៅរដ្ឋបាលរោងចក្រសហគ្រាសរបស់ខ្លួន ហើយករណីនេះក្រសួងនឹងបន្តជូនដំណឹងអំពីការបើកផ្តល់ប្រាក់ឧបត្ថម្ភនេះ។
ភ្នំពេញប៉ុស្តិ៍មិនអាចទាក់ទងលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ដើម្បីសុំធ្វើការអត្ថាធិប្បាយបន្ថែមបានទេ កាលពីថ្ងៃទី ២ ខែកញ្ញា។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានឱ្យដឹងថាកន្លងមកនេះកម្មករប្រមាណ ៩០ ភាគរយបានទទួលបានប្រាក់ឧបត្ថម្ភពីរាជរដ្ឋាភិបាល ប៉ុន្តែប្រមាណ ១០ ភាគរយទៀតគឺមិនទទួលបានទេ ដោយសារបញ្ហាបច្ចេកទេសពាក់ព័ន្ធនឹងការខុសលេខទូរស័ព្ទ ឬក៏ខុសឈ្មោះ។
ក៏ប៉ុន្តែលោកថា ក្រោយមកបញ្ហានេះត្រូវបានដោះស្រាយជាបន្តបន្ទាប់ ដែលឥឡូវមិនសូវមានបញ្ហានេះកើតឡើងទៀតទេ។
ការផ្តល់ប្រាក់ឧបត្ថម្ភនេះបានជួយសម្រាលទុក្ខលំបាកពួកគាត់បានមួយកម្រិត ប៉ុន្តែការផ្តល់នេះ មានចំនួនតិចតួចពេក។
លោកថា មានកម្មករនិយោជិតច្រើនបានរងផលប៉ះពាល់ពីការព្យួការងារក្នុងអំឡុងនៃការរីករាលដាលនៃជំងឺកូវីដ ប៉ុន្តែអ្នកទទួលបានប្រាក់ឧបត្ថម្ភពីរាជរដ្ឋាភិបាលមានចំនួនតិចតួច។
បញ្ហានេះដោយសារម្ចាស់រោងចក្រសហគ្រាស និងសណ្ឋាគារខ្លះដែលមិនបានចុះបញ្ជីមិនបានរាយការណ៍ជូនដល់ក្រសួង។
លោកថ្លែងថា៖ «គេយកតែក្រុមហ៊ុន រោងចក្រសហគ្រាស ណាបានចុះបញ្ជី ប៉ុន្តែអាក្រុមហ៊ុនមិនបានចុះបញ្ជី ហើយព្យួរការងារកម្មករនិយោជិតអត់បាន ដល់អ៊ីចឹងវាអត់ល្អ...» ។
កាលពីថ្ងៃទី ២៩ ខែកក្កដា ឆ្នាំនេះក្រសួងធ្លាប់បានបើកផ្តល់ប្រាក់ឧបត្ថម្ភជូនកម្មករនិយោជិតចំនួន ៣ ៩៥៣ នាក់ នៃរោងចក្រសហគ្រាសចំនួន ៤៥ ក្នុងវិស័យកាត់ដេរ និងវិស័យទេសចរណ៍ដែលត្រូវបានព្យួរកិច្ចសន្យាការងារផងដែរ ស្របតាមស្មារតីនៃកញ្ចប់វិធានការរបស់រាជរដ្ឋាភិបាល (លើកទី៦៤)៕
វីដេអូ៖
