ភ្នំពេញៈ លោក ឃួង ស្រេង អភិបាលរាជធានីភ្នំពេញបានថ្លែងឱ្យដឹងថា រាជធានីភ្នំពេញអាចនឹងត្រូវបើកឱ្យដំណើរការជាធម្មតាឡើងវិញ ក្រោយពីមើលឃើញសញ្ញានៃការថមថយការឆ្លងរីករាលដាលនៃជំងឺកូវីដ ១៩ ក្នុងពេលបច្ចុប្បន្នក្នុងពេលប៉ុន្មានសប្ដាហ៍ចុងក្រោយនេះ។
នៅក្នុងកិច្ចប្រជុំមួយតាមរយៈអនឡាញកាលពីរសៀលថ្ងៃទី ១ ខែកញ្ញា ស្ដីពីការរឹតបន្តឹងការអនុវត្តវិធានការបង្ការ និងទប់ស្កាត់ការឆ្លងរាលដាលជំងឺកូវីដ ១៩ ការពង្រឹងការធ្វើចត្តាឡីស័កតាមផ្ទះក្នុងភូមិសាស្ត្ររាជធានីភ្នំពេញ និងការរៀបចំបើកដំណើរការឡើងវិញនៃគ្រឹះស្ថានអប់រំទូទាំងរាជធានីភ្នំពេញ។
លោក ឃួង ស្រេង បានថ្លែងឱ្យដឹងថា ការឆ្លងរាលដាលនៃមេរោគកូវីដ ១៩ នៅក្នុងភូមិសាស្ត្ររាជធានីភ្នំពេញមានការធ្លាក់ចុះច្រើន ហើយចំនួនអ្នកស្លាប់ដោយសារជំងឺនេះក៏មានការថយចុះពី ៣០ នាក់មកត្រឹមតែចន្លោះពី ២ នាក់ទៅ ៦ នាក់ប៉ុណ្ណោះក្នុង ១ ថ្ងៃ ក្នុងរយៈពេល ២ ទៅ ៣ សប្តាហ៍ចុងក្រោយនេះ។
លោកថ្លែងថា៖ «យើងបានអនុវត្តការងារលើការទប់ស្កាត់ការរីករាលដាលជំងឺកូវីដ ១៩ នេះបានល្អប្រសើរហើយ ដោយពីមុនមានអ្នកជំងឺកូវីដ ១៩ កើនឡើងរហូត តែរយៈពេល ២ ទៅ ៣ សប្តាហ៍ចុងក្រោយនេះមានការថយចុះយ៉ាងខ្លាំង ចំណែកអ្នកស្លាប់ដោយជំងឺកូវីដ ១៩ បានថយចុះពី ៣០ នាក់ មកនៅត្រឹម ៦ នាក់ ឬ ២ នាក់ប៉ុណ្ណោះក្នុង ១ ថ្ងៃ។ ដែលនេះជាមោទនភាពរបស់យើងទាំងអស់គ្នា ដែលយើងត្រូវតែខិតខំប្រឹងប្រែងបន្តទៀត»។
អភិបាលរូបនេះបានថ្លែងទៀតថា៖ «ការថយចុះនេះជាសញ្ញាដ៏ល្អមួយក្នុងការបើករាជធានីភ្នំពេញទៅជាធម្មតាឡើងវិញ ទាំងវិស័យទេសចរណ៍ និងសាលារៀនផងដែរ ប៉ុន្តែអំឡុងពេលនេះដែរ អាជ្ញាធរក៏ដូចជាមន្ត្រីពាក់ព័ន្ធនៃភូមិសាស្ត្ររាជធានីភ្នំពេញក៏បាននិងបន្តរិះរកគ្រប់មធ្យោបាយ ដើម្បីឈានទៅរកការកាត់ផ្តាច់ឱ្យបាននូវការរីករាលដាលនៃជំងឺកូវីដ ១៩ ពិសេសមេរោគបំប្លែងខ្លួនថ្មីប្រភេទដែលតា (Delta)»។
ក្នុងកិច្ចប្រជុំនោះដែរ លោក មាន ចាន់យ៉ាដា អភិបាលរងរាជធានីភ្នំពេញ ក៏បានលើកឡើងបញ្ជាក់ឱ្យដឹងផងដែរថា រាជធានីភ្នំពេញបានឈានទៅរកភាពល្អប្រសើរហើយ បើមើលទៅលើលទ្ធផលនៃការឆ្លងជំងឺកូវីដ ១៩ ក្នុងរយៈពេល ២ ទៅ ៣ សប្តាហ៍ចុងក្រោយនេះ ពោលគឺក្នុងចំនួនមនុស្ស ១ ៨៩៨ នាក់ ដែលត្រូវយកសំណាកបានរកឃើញមានវិជ្ជមានកូវីដ ១៩ ចំនួនតែ ២៨ នាក់ប៉ុណ្ណោះ ស្មើនឹង ៣,៥៦% ក្នុងនោះមានប្រភេទដែលតាចំនួន ១១ នាក់ស្មើនឹង ១,៤៨%។
លោក មាន ចាន់យ៉ាដា បានថ្លែងថា៖ «លទ្ធផលនេះ គឺពិតជាបានមកពីការស្រោចវ៉ាក់សាំងជូនប្រជាពលរដ្ឋ និងការខិតខំប្រឹងប្រែងរបស់អាជ្ញាធរខណ្ឌទាំងអស់ក្នុងការសហការគ្នាប្រយុទ្ធនឹងជំងឺកូវីដ ១៩ នេះ»។
ប្រធានមន្ទីរសុខាភិបាល លោក ងី មានហេង បានប្រាប់ឱ្យដឹងថា ចំនួននៃអ្នកឆ្លងវីរុសកូវីដ ១៩ ក្នុងខែសីហា មានការថយចុះជាងពាក់កណ្តាលធៀបនឹងខែឧសភា មិថុនា និងខែកក្កដា ដែលលទ្ធផលនេះគឺបានមកដោយសារការចាក់វ៉ាក់សាំង និងការចូលរួមរបស់ប្រជាពលរដ្ឋអនុវត្តបានយ៉ាងត្រឹមត្រូវនូវវិធានការសុខាភិបាល។
លោកបានថ្លែងថា៖ «ការចាក់វ៉ាក់សាំង និងការអនុវត្តវិធានការសុខាភិបាលគឺត្រូវតែដើរចូលគ្នា ដើរទន្ទឹមគ្នា ដើម្បីបានឈ្នះកូវីដ ១៩»។
នៅក្នុងការថ្លែងសារពិសេសមួយកាលពីយប់ថ្ងៃទី ៣១ ខែសីហា លោកនាយករដ្ឋមន្ត្រី ហ៊ុន សែន ក៏បានបញ្ជាក់ផងដែរថា ភាពស៊ាំកំពុងតែបានកើតនៅក្នុងភូមិសាស្ត្ររាជធានីភ្នំពេញ និងខេត្តកណ្តាល។
លោកថ្លែងថា៖ «រាជធានីភ្នំពេញ ការឆ្លងវីរុសកូវីដ ១៩ មានចំនួនធ្លាក់ចុះ ហើយអ្នកដែលបានឆ្លងក៏មិនមាននាំទៅដល់ជំងឺធ្ងន់ធ្ងរនោះទេ ឯការស្លាប់ក៏មានការថយចុះដែរ។ ដូច្នេះ ចំណុចនេះគឺជាចំណុចវិជ្ជមានមួយសម្រាប់ការបើកឡើងវិញនូវសង្គមសេដ្ឋកិច្ចនៅទូទាំងប្រទេសផងដែរ»។
លោកស្រី ឱ វណ្ណឌីន បានឱ្យដឹងតាមរបាយការណ៍ថា ប្រជាពលរដ្ឋចំនួន ២ ១២៨ ៧៩១ នាក់ បានចាក់វ៉ាក់សាំងនៅក្នុងរាជធានីភ្នំពេញចាប់តាំងពីថ្ងៃទី ១០ ខែកុម្ភៈ ដល់ថ្ងៃទី ៧ ខែកក្កដា។
របាយការណ៍ដដែលនេះបានឱ្យដឹងថា៖ «បើយោងទៅតាមស្ថិតិជំរឿនប្រជាជននៅក្នុងឆ្នាំ ២០១៩ ដែលត្រូវបានយកមកប្រើជាគោលក្នុងការចាក់វ៉ាក់សាំងសម្រាប់ក្រុមគោលដៅ ១០ លាននាក់នេះ ប្រជាពលរដ្ឋដែលមានអាយុលើសពី ១៨ ឆ្នាំនៅរាជធានីភ្នំពេញសរុបចំនួន ១ ៧៦៤ ៤៨៨ នាក់។ បើយោងតាមតួលេខនៃការពិនិត្យឡើងវិញនូវស្ថិតិប្រជាពលរដ្ឋនៅទូទាំងពិភពលោកក្នុងឆ្នាំ ២០២១ ដែលបានបង្ហាញពីស្ថិតិប្រជាពលរដ្ឋកម្ពុជានៅក្នុងរាជធានីភ្នំពេញ ដែលមានអាយុ ១៨ ឆ្នាំឡើងមានចំនួន ២ ១៤៥ ៥៩១ នាក់។ ដូចនេះ បើធៀបនឹងតួលេខតាមជំរឿនឆ្នាំ ២០១៩ (១ ៧៦៤ ៤៨៨ នាក់) ឃើញថា ប្រជាពលរដ្ឋនៅរាជធានីភ្នំពេញ ចាក់វ៉ាក់សាំងបានរហូតដល់ ១២០,៦៥% គឺលើស ១០០% ដែលនេះបញ្ជាក់ថា មានប្រជាពលរដ្ឋដែលមកពីខាងក្រៅរាជធានីភ្នំពេញបានមកចាក់វ៉ាក់សាំងផងដែរ»។
តាមរបាយការណ៍របស់ក្រសួងសុខាភិបាលគិតត្រឹមយប់ថ្ងៃទី ១ ខែកញ្ញា មានប្រជាពលរដ្ឋអាយុចាប់ពី ១៨ ឆ្នាំឡើងចំនួនជាង ៩,៣ លាននាក់ ឬស្មើនឹង ៩៣,២២% បានចាក់វ៉ាក់សាំង ធៀបជាមួយចំនួនប្រជាជនគោលដៅ ១០ លាននាក់។ ចំណែកក្រុមមនុស្សអាយុពី ១២ ឆ្នាំ ទៅក្រោម ១៨ ឆ្នាំ មានចំនួនជាង ១,៥ លាននាក់ ឬស្មើនឹង ៧៩,៩៨% ធៀបជាមួយនឹងប្រជាជនគោលដៅជិត ២ លាននាក់ដែលត្រូវចាក់វ៉ាក់សាំងកូវីដ។ ជាមួយគ្នានេះដែរ សម្រាប់អ្នកដែលបានចាក់វ៉ាក់សាំងដូសទី ៣ ឬដូសជំរុញ មានចំនួនជាង ៦២ ម៉ឺននាក់ផងដែរ៕
វីដេអូ៖