ភ្នំពេញៈ ក្រសួងអប់រំ យុវជន និងកីឡាបានស្នើទៅដល់អភិបាល និងមន្ទីរអប់រំ យុវជន និងកីឡា រាជធានី-ខេត្តទាំងអស់ ធ្វើការពិនិត្យ និងវាយតម្លៃស្ថានភាពជាក់ស្តែងទៅលើសាលាដែលអាចនឹងមានលទ្ធភាពបើកដំណើរការឡើងវិញ នៅតាមតំបន់ដែលមានហានិភ័យទាប និងតំបន់ដែលមិនមានការឆ្លងមេរោគកូវីដ ១៩ ដើម្បីសុំគោលការណ៍សម្រេចពីប្រមុខរាជរដ្ឋាភិបាល។
លោក ហែម ស៊ីណារ៉េត ប្រធានមន្ទីរអប់រំ រាជធានីភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ២ កញ្ញាថា រដ្ឋមន្ត្រីក្រសួងអប់រំ លោក ហង់ជួន ណារ៉ុន បានប្រជុំជាមួយនឹងគ្រប់គណៈអភិបាល និងមន្ទីរអប់រំ រាជធានី-ខេត្តត្រូវប្រជុំ ពិភាក្សាលើការពិនិត្យ និងវាយតម្លៃក្នុងការបើកសាលារៀនឡើងវិញ។
លោកថ្លែងថា៖ «លោករដ្ឋមន្ត្រីបានលើកឡើងថា បន្ទាប់ពីកិច្ចប្រជុំពីថ្ងៃម្សិលមិញ (១ កញ្ញា) ហើយក្នុងរយៈពេល ២ សប្តាហ៍ក្រោយ ត្រូវបញ្ជូនរបាយការណ៍ឈ្មោះសាលា និងចំនួនសាលាដែលត្រូវបើកទៅឱ្យក្រសួងអប់រំ ដើម្បីលោកធ្វើការបូកសរុប ស្នើសុំគោលការណ៍សម្រេចទៅសម្តេចតេជោ»។
អភិបាលរាជធានីភ្នំពេញលោក ឃួង ស្រេង នឹងបង្កើតគណៈកម្មការមួយ ដោយមានសមាសភាពចូលរួមពីគ្រប់ខណ្ឌទាំងអស់រួមនឹងមន្ទីរអប់រំផងដែរ ក្នុងការចាប់ផ្តើមធ្វើការវាយតម្លៃ ទៅតាមសាលាក្នុងរាជធានីភ្នំពេញ ដើម្បីសម្រេចថា តើមានសាលាណាខ្លះអាចបើកឡើងវិញបាន។
លោក ស៊ីណារ៉េត បន្ថែមថា៖ «លោកអភិបាលមានបំណងបើកសាលាឱ្យបានច្រើនទៅតាមលទ្ធភាពដែលអាចធ្វើទៅបាន ដោយសារការខកខានមិនបានរៀនផ្ទាល់របស់សិស្ស គឺជាបញ្ហាមួយដែលប្រឈម និងប៉ះពាល់ចំពោះសតិអារម្មណ៍សិស្ស និងឪពុកម្តាយរបស់ពួកគេ។ យើងទទួលស្គាល់នូវចំណុចនេះ»។
ទាក់ទងនឹងចំនួនសាលាដែលអាចនឹងបើកឡើងវិញ ហើយថា តើនឹងអាចបើកនៅពេលណានោះលោក ស៊ីណារ៉េត មិនទាន់អាចប្រាប់បាននៅឡើយទេ រហូតមានការបញ្ចប់ការពិនិត្យ និងវាយតម្លៃរួចរាល់សិន។
នៅទូទាំងរាជធានីភ្នំពេញ សាលាកម្រិតពីថ្នាក់មតេយ្យសិក្សារហូតដល់មធ្យមសិក្សាសាធារណៈមានជាង ២៥០ សាលា។
ជាមួយគ្នានេះដែរ លោក វ៉ី សំណាង អភិបាលខេត្តកំពង់ស្ពឺក៏បានប្រាប់ភ្នំពេញប៉ុស្តិ៍ពីថ្ងៃទី ២ កញ្ញាផងដែរថា សាលារៀនជាង ៣០០ តាំងពីកម្រិតបឋមសិក្សារហូតដល់វិទ្យាល័យក្នុងទូទាំងខេត្តនេះ គ្រោងនឹងបើកឡើងវិញឆាប់ៗនេះ។
ខេត្តកំពង់ស្ពឺមានសាលាបឋមសិក្សាជាង ៣០០ អនុវិទ្យាល័យចំនួន ៧២ និងវិទ្យាល័យចំនួន ២៥ ហើយសម្រាប់សាលាដែលមិនអាចបើកដំណើរការបាន ក្នុងនោះមានវិទ្យាល័យចំនួន ១ អនុវិទ្យាល័យចំនួន ២ និងបឋមសិក្សាចំនួន ៥ ដោយសារតែទីតាំងសាលា ដែលមិនអាចបើកបាននេះ គឺនៅជិតទីតាំងដែលមានការផ្ទុះជំងឺកូវីដ ១៩ ប៉ុន្តែសាលាទាំងនេះក៏នឹងបើកដំណើរការនៅពេលដែលមានការថមថយនៃការឆ្លង។
លោក វ៉ី សំណាង ថ្លែងថា៖ «ខ្ញុំមានសុទិ្ធនិយមថា សាលានឹងបើកដំណើរការឡើងវិញទាំងអស់ ដោយសារតែកុមារ និងយុវវ័យ គ្រូបង្រៀន រួមនឹងមន្ត្រីអប់រំ ក្នុងខេត្តរបស់យើងភាគច្រើនបានចាក់វ៉ាក់សាំងរួចរាល់ហើយ»។ លោក ប្រាប់ថា៖ «សាលាស្ទើរតែទាំងអស់ក្នុងខេត្តកំពង់ស្ពឺអាចនឹងបើកឡើងវិញ បន្ទាប់ពីក្រុមការងារបច្ចេកទេសធ្វើការពិនិត្យ និងវាយតម្លៃថា វាមិនមានបញ្ហា ប៉ុន្តែសម្រាប់ថ្ងៃបើកដំណើរការនៅពេលណាគឺយើងមិនទាន់អាចកំណត់បាននៅឡើយទេ។ ខ្ញុំគិតថា ប្រហែលជាពាក់កណ្តាលខែកញ្ញានេះនឹងបើកឡើងវិញ»។
កញ្ញា មួន ធីតា អាយុ ១៨ ឆ្នាំ ជាសិស្សថ្នាក់ទី ១២ នៃវិទ្យាល័យជាស៊ីមបឹងកេងកងបានសម្តែងក្តីសប្បាយរីករាយ បន្ទាប់ពីដឹងថា ការបើកសាលាឡើងវិញអាចនឹងមានលទ្ធផលក្នុងពេលឆាប់ៗហើយយុវតីរូបនេះពិតជាចង់ចូលរៀនក្នុងសាលាជាងការបន្តការរៀនតាមអនឡាញ។ «ខ្ញុំបានចាក់វ៉ាក់សាំងរួចហើយ ហើយខ្ញុំសង្ឃឹមថា នឹងបើកសាលារៀនឆាប់ៗនេះ។ ខ្ញុំសប្បាយចិត្តពេលឮសម្តេចនិយាយ ពីគម្រោងបើកសាលារៀនឱ្យសិស្សចូលរៀនវិញនេះ»។
កញ្ញា មួន ធីតា បន្ថែមថា នាងមិនបានរៀនតាមអនឡាញជាប់លាប់ទេ តាំងពីដើមឆ្នាំមក ដែលធ្វើឱ្យនាងបារម្ភទៅថ្ងៃអនាគត ពិសេសការប្រឡងតែម្តង ដោយសារការរៀនតាមអនឡាញមិនដូចរៀនផ្ទាល់ជាមួយនឹងគ្រូនោះទេ។
លោក ហង់ជួន ណារ៉ុន កាលពីថ្ងៃទី ១ ខែកញ្ញា បានដឹកនាំកិច្ចប្រជុំតាមអនឡាញជាមួយនឹងគ្រប់អភិបាលរាជធានី-ខេត្ត និងមន្ទីរអប់រំ ដើម្បីផ្សព្វផ្សាយសេចក្តីណែនាំស្តីពីការបង្រៀន និងរៀនតាមបណ្តុំសម្រាប់គ្រឹះស្ថានសិក្សាសាធារណៈ និងឯកជននៅភូមិសាស្ត្រ ដែលមានហានិភ័យទាប។
លោករដ្ឋមន្ត្រីបានជម្រាបអង្គប្រជុំនូវគោលការណ៍ និងលក្ខណៈបច្ចេកទេស ពាក់ព័ន្ធនឹងការបើកដំណើរការសាលារៀនឡើងវិញនេះដោយអាជ្ញាធររាជធានី-ខេត្ត ត្រូវធ្វើការវាយតម្លៃពីស្ថានភាពជាក់ស្តែងលើករណីនេះ។
គួរបញ្ជាក់ផងដែរថា លោកនាយករដ្ឋមន្ត្រី ហ៊ុន សែន បានស្នើទៅក្រសួងអប់រំ ឱ្យធ្វើការពិភាក្សាជាមួយនឹងគ្រប់អភិបាលខេត្ត-រាជធានីទាំងអស់ ដើម្បីកំណត់ជ្រើសរើសសាលាសម្រាប់បើកឱ្យសិស្សរៀននៅតាមទីតាំងមួយចំនួនដែលពុំមានជំងឺឆ្លងកើតឡើង។
លោកថ្លែងថា៖ «ខ្ញុំសុំឱ្យមានការគិតគូរតាមរបៀបបត់បែន ហើយអនុវត្តតាមការជាក់ស្តែងតាមខេត្តនីមួយៗ។ ត្រូវធ្វើការពិនិត្យលើរឿងនេះ ដើម្បីចៀសវាងនូវកុមារជនបទរបស់យើងក្លាយជាជនរងគ្រោះពីជំងឺកូវីដ ក្នុងពេលដែលនៅតាមជនបទ ពុំមានកូវីដដូចនៅទីក្រុង និងទីប្រជុំជន»។
ជាមួយគ្នានេះដែរ អង្គការសង្គ្រោះកុមារអន្តរជាតិ (Save the Children) កាលពីថ្ងៃទី ១ ខែកញ្ញា បានចេញរបាយការណ៍មួយដោយបានលើកឡើងថា នៅប្រទេសកម្ពុជា កុមារជាង ៣ លាននាក់មិនបានទៅសាលារៀនឡើយ នៅក្នុងរយៈពេលភាគច្រើននាឆ្នាំកន្លងទៅដែលបង្កឡើងដោយការបិទសាលារៀនចំនួន ២ ដងចាប់ពីខែមីនា ឆ្នាំ ២០២០ មក។
របាយការណ៍លើកឡើងថា ការបិទសាលានេះដោយសារតែបញ្ហានៃការឆ្លងរាលដាលនៃជំងឺកូវីដ ១៩ ហើយជាមធ្យមការបាត់បង់ពេលវេលាចំនួនជិត ១០% នៃពេលវេលាសរុប ដែលកុមារនឹងត្រូវចូលរៀន មិនត្រឹមតែនឹងបង្កឱ្យមានការបាត់បង់ការរៀនសូត្រគួរឱ្យកត់សម្គាល់ប៉ុណ្ណោះទេ ប៉ុន្តែវាថែមទាំងធ្វើឱ្យកុមារជាច្រើនប្រឈមនឹងហានិភ័យនៃការឈប់រៀនទាំងស្រុង៕
វីដេអូ៖