ភ្នំពេញៈ ប្រមុខរាជរដ្ឋាភិបាលកម្ពុជាបានអំពាវនាវដល់ស្ថាប័នពាក់ព័ន្ធ ទាំងជាតិ អន្តរជាតិ និងពលរដ្ឋគ្រប់រូបឱ្យបន្តយកចិត្តទុកដាក់ខ្ពស់ដល់ការងារអក្ខរកម្ម ដើម្បីសម្រេចបាននូវគោលដៅអភិវឌ្ឍន៍ប្រកបដោយចីរភាពឆ្នាំ ២០៣០ និងធានាបាននូវការសិក្សាពេញ ១ ជីវិតសម្រាប់ពលរដ្ឋគ្រប់រូប និងដើម្បីប្រែក្លាយពីពលករដែលប្រើកម្លាំងសុទ្ធសាធទៅជាការប្រើជំនាញស្របតាម "យុទ្ធសាស្ត្រកំណើនថ្មី" របស់កម្ពុជា។
លោកនាយករដ្ឋមន្ត្រី ហ៊ុន សែន បានលើកឡើងដូចនេះនៅក្នុងសារលិខិតក្នុងឱកាសប្រារព្ធទិវាអក្ខរកម្មជាតិ ៨ កញ្ញា ២០២១ ក្រោមប្រធានបទអក្ខរកម្មជាមូលដ្ឋានគ្រឹះនៃការសិក្សាពេញ ១ ជីវិត» ក្នុងអត្ថន័យជំរុញប្រជាពលរដ្ឋកម្ពុជាគ្រប់រូបឱ្យទទួលបានឱកាសសិក្សាពេញ ១ ជីវិត គ្រប់ពេលវេលា គ្រប់ទីកន្លែង និងគ្រប់មធ្យោបាយ និងប្រកបដោយវិជ្ជាសម្បទា បំណិនសម្បទា ចរិយាសម្បទា និងគុណសម្បទា ដើម្បីរួមចំណែកស្តារឡើងវិញសង្គមសេដ្ឋកិច្ច បន្ទាប់ពីវិបត្តិកូវីដ ១៩។
ទស្សនទាននៃប្រធានបទនៅឆ្នាំនេះ មិនសំដៅត្រឹមតែការរៀនអក្សរ និងលេខនព្វន្តប៉ុណ្ណោះទេ ប៉ុន្តែបានគិតគូរដល់ឱកាសសម្រាប់ប្រជាពលរដ្ឋទទួលបាននូវចំណេះដឹង ចំណេះធ្វើ សហគ្រិនភាព ជំនាញ មុខរបរ និងនវានុវត្តន៍លើគ្រប់ផ្នែក គ្រប់វិស័យ ជាពិសេសអក្ខរកម្មបច្ចេកវិទ្យា និងអក្ខរកម្មឌីជីថល ដែលសព្វថ្ងៃកំពុងមានភាពចាំបាច់ និងកំពុងមានការរីកចម្រើនយ៉ាងឆាប់រហ័ស។
លោក ហ៊ុន សែន បានលើកឡើងយ៉ាងដូច្នេះថា៖ «ដើម្បីបន្តចូលរួមលើកកម្ពស់ការងារអក្ខរកម្មនៅកម្ពុជាឱ្យកាន់តែមានប្រសិទ្ធភាពថែមទៀត ខ្ញុំសូមអំពាវនាវដល់ក្រសួង ស្ថាប័នពាក់ព័ន្ធ ត្រូវរៀបចំគោលនយោបាយ ក្របខ័ណ្ឌច្បាប់លិខិតបទដ្ឋាន និងយន្តការចាំបាច់ ដើម្បីដឹកនាំ គ្រប់គ្រង និងអនុវត្តឱ្យមានប្រសិទ្ធភាព និងគុណភាព ធានាបាននូវការសិក្សាពេញ ១ ជីវិតសម្រាប់ប្រជាពលរដ្ឋគ្រប់រូប»។
លោកបានបន្ថែមថា ក្រសួង ស្ថាប័ន គ្រឹះស្ថានសិក្សា មណ្ឌលសិក្សា ទីវត្តអារាមទាំងអស់ រាប់ទាំងការអប់រំទាំងក្នុង និងក្រៅប្រព័ន្ធ ត្រូវបន្តបង្កើតកម្មវិធីអប់រំកម្មវិធីសិក្សាពេញ ១ ជីវិត ទាំងផ្នែកអក្ខរកម្ម ទាំងផ្នែកវិជ្ជាជីវៈ ទាំងផ្នែកបច្ចេកវិទ្យាព័ត៌មានឱ្យកាន់តែសម្បូរបែប ដើម្បីឆ្លើយតបនឹងតម្រូវការអ្នកសិក្សា។
ចំណែកអាជ្ញាធរដែនដីគ្រប់លំដាប់ថ្នាក់ក៏ត្រូវបន្តយកចិត្តទុកដាក់ចូលរួមគាំទ្រឱ្យបានខ្លាំងក្លាថែមទៀត ក្នុងការអភិវឌ្ឍហេដ្ឋារចនាសម្ព័ន្ធ មជ្ឈមណ្ឌលសិក្សា និងជំរុញលើកទឹកចិត្តដល់ប្រជាពលរដ្ឋដែលមិនបានរៀនសូត្រ ឬបោះបង់ការសិក្សា ឱ្យមានឱកាសទទួលបានការរៀនសូត្រជាថ្មី ជាពិសេសត្រូវខិតខំបង្កលក្ខណៈងាយស្រួលដល់ពលរដ្ឋដែលមានពិការភាពឱ្យទទួលបានលទ្ធភាពក្នុងការសិក្សារៀនសូត្រប្រកបដោយសមធម៌ និងបរិយាប័ន្ន។
លោក ហ៊ុន សែន បានបន្ថែមថា៖ «ប្រព័ន្ធផ្សព្វផ្សាយទាំងអស់ ទាំងស្ថាប័នរដ្ឋ និងឯកជន សូមជួយផ្សព្វផ្សាយឱ្យបានទូលំទូលាយនូវរាល់កម្មវិធីអក្ខរកម្ម ដើម្បីឱ្យប្រជាពលរដ្ឋយើងមានការយល់ដឹងកាន់តែទូលំទូលាយ ក្រោមប្រធានបទអក្ខរកម្មជាមូលដ្ឋានគ្រឹះនៃការសិក្សាពេញ ១ ជីវិត។
ជាមួយគ្នានេះដែរ លោកនាយករដ្ឋមន្ត្រីក៏បានស្នើឱ្យក្មួយៗជាសិស្ស និស្សិតតាមគ្រឹះស្ថានសិក្សាសាធារណៈ និងឯកជន យុវជនសហភាពសហព័ន្ធយុវជនកម្ពុជា យុវជនកាយរឹទ្ធិ និងយុវជនកាកបាទក្រហមកម្ពុជា ត្រូវសកម្មចូលរួមជួយបង្រៀនដោយស្ម័គ្រចិត្តដល់អ្នកមិនចេះអក្សរ ដែលស្ថិតក្នុងមូលដ្ឋានរបស់ពួកគេរស់នៅ។
លោកបានបញ្ជាក់ថា៖ «វត្តអារាម និងវិហារសាសនានានា ក៏ត្រូវចលនាព្រះសង្ឃ បព្វជិតសាសនា តាជីដូនជី ចូលរួមជំរុញ កម្មវិធីអក្ខរកម្មវិជ្ជាជីវៈឱ្យកាន់តែខ្លាំងក្លាថែមទៀតតាមរយៈការទេសនាអប់រំអំពីសារៈប្រយោជន៍នៃការរៀនសូត្រ អំពីសីលធម៌ និងលើកកម្ពស់វប្បធម៌រស់នៅក្នុងភាពជាពលរដ្ឋសកល»។
លោក ហ៊ុន សែន បានបន្ថែមទៀតថា ប្រធានរោងចក្រ សហគ្រាស និងក្រុមហ៊ុនឯកជនត្រូវជួយជំរុញបើកថ្នាក់អក្ខរកម្មគួបផ្សំជាមួយថ្នាក់បំប៉នមុខជំនាញវិជ្ជាជីវៈផ្សេងៗដល់កម្មករ-កម្មការិនី ដើម្បីជាប្រយោជន៍របស់ពួកគេផង និងជាប្រយោជន៍ដល់ម្ចាស់រោងចក្រសហគ្រាសផង។
លោកមានប្រសាសន៍ថា៖ «យើងទាំងអស់គ្នាត្រូវចងចាំថា មានអក្ខរកម្មមានការគិតគូរ និងការសម្រេចចិត្តបានត្រឹមត្រូវមានអក្ខរកម្ម នាំឱ្យការអភិវឌ្ឍសហគមន៍កាន់តែរីកចម្រើន មានអក្ខរកម្ម មានសុខដុមជីវិតបុគ្គលគ្រួសារ និងសង្គម»។
លោកនាយករដ្ឋមន្ត្រីក៏បានបញ្ជាក់ផងដែរថា ទោះបីជាការបន្តឆ្លងរីករាលដាលនៃជំងឺកូវីដ-១៩ មិនអនុញ្ញាតឱ្យមានការជួបជុំប្រារព្ធទិវាអក្ខរកម្មជាតិ ៨ កញ្ញាដោយផ្ទាល់មុខដូចសព្វដងក៏ដោយ ក៏ទិវាជាតិប្រចាំឆ្នាំនេះ ត្រូវបានរៀបចំឡើងក្នុងទម្រង់ជាយុទ្ធនាការតាមប្រព័ន្ធអនឡាញ និងពីចម្ងាយតាមគ្រប់រូបភាពបានដែរ៕